WELCOME TO PANNAGAM.COM & PTV

பண்ணாகம் இணையம்

NEWS 12

அடுத்த அதிபர் தேர்தலில் கோத்தாபய ராஜபக்சவை வேட்பாளராக நிறுத்தும் விடயத்தில், கூட்டு எதிரணியில் பிளவு ஏற்பட்டுள்ளதாக செய்திகள் தெரிவிக்கின்றன.

கூட்டு எதிரணியின் கட்சித் தலைவர்கள் கூட்டம், நேற்று முன்தினம் இரவு மகிந்த ராஜபக்சவில் இல்லத்தில் இடம்பெற்றது.

பிவிதுரு ஹெல உறுமயவின் தலைவரான உதய கம்மன்பில இந்தக் கூட்டத்தில் பங்கேற்கவில்லை.

இந்தக் கூட்டத்தில், எதிர்கால அரசியல் நடவடிக்கைகளை, தாமரை மொட்டு சின்னத்தில், கூட்டு பொதுஜன முன்னணி என்ற பெயரில், முன்னெடுப்பது என்று இணக்கம் காணப்பட்டது.

கூட்டத்தின் முடிவில், நாடாளுமன்ற உறுப்பினர் குமார வெல்கமவிடம், கோத்தாபய ராஜபக்சவை அதிபர் வேட்பாளராக நிறுத்துவது பற்றிக் கலந்துரையாடப்பட்டதா என்று ஊடகவியலாளர்கள் கேள்வி எழுப்பியிருந்தனர்.

அதற்கு அவர், எமக்கு ஒரு ஜனநாயக தலைவரே தேவை. அந்த ஜனநாயக தலைவர் மகிந்த ராஜபக்ச மாத்திரமே  என்று தெரிவித்தார்.

அவ்வாறாயின், கோத்தாபய ராஜபக்சவை விரும்பவில்லையா என்று கேள்வி எழுப்பப்பட்டது.

அதற்கு அவர்,“ கோத்தாபய ராஜபக்ச அரசாங்கத்தின் பங்காளராக இருக்க முடியும், ஆனால், அரசுத் தலைவராக மகிந்த ராஜபக்சவை விட வேறு யாரும் இல்லை.” என்று கூறினார்.

அதேவேளை, இந்தக் கூட்டத்தின் பின்னர் கருத்து வெளியிட்ட நாடாளுமன்ற உறுப்பினர் வாசுதேவ நாணயக்கார, தமது தரப்பில் சமல் ராஜபக்ச மிகச் சிறந்த வேட்பாளராக இருப்பார் என்று நம்புவதாக தெரிவித்தார்.

அவர், மத்திய மற்றும் ஜனநாயக நிலைகளில் இருந்து வாக்குகளை பெறக் கூடியவர். சமல் ராஜபக்ச மிகச் சிறந்த நபர்.” என்றும் வாசுதேவ நாணயக்கார தெரிவித்துள்ளார்.

முன்னாள் இராஜாங்க அமைச்சர் விஜயகலா மகேஷ்வரன் கூறியது தான், தமிழீழத்தின் உண்மை நிலை என மதிமுக பொதுச்செயலாளர் வைகோ தெரிவித்துள்ளார். 

விஜயகலா மகேஷ்வரன், இராஜாங்க அமைச்சராக பொறுப்பில் இருந்த போது சில தினங்களுக்கு முன்பு யாழ்ப்பாணத்தில் நிகழ்ச்சி ஒன்றில் விடுதலைப் புலிகளை ஆதரித்து கருத்து தெரிவித்தமை பெரும் சர்ச்சையை ஏற்படுத்தியது.

இந்நிலையில் மதிமுக பொதுச்செயலாளர் வைகோ இது தொடர்பாக வெளியிட்ட அறிக்கையில், ´இலங்கையில் ஐக்கிய தேசியக் கட்சியைச் சார்ந்த தமிழ்ப் பெண்மணியான விஜயகலா அமைச்சராகப் பணியாற்றி வந்தார். இவரது கணவர் மகேஷ்வரன் ஐக்கிய தேசியக் கட்சியின் பாராளுமன்ற உறுப்பினராகவும், அமைச்சராகவும் பணியாற்றியவர். அவர் 2008 ஆம் ஆண்டு சுட்டுக் கொல்லப்பட்டார்.

அண்மையில் யாழ்ப்பாணத்தில் நடைபெற்ற ஒரு பொதுக்கூட்டத்தில் அமைச்சர் விஜயகலா மகேஷ்வரன் பின்வருமாறு கருத்து தெரிவித்தார், ´´இலங்கைத் தீவில், வடக்கு மாகாணத்தில் தமிழர்களுக்கு எதிரான கொடூரமான குற்றங்கள் அதிகரித்துவிட்டன. சான்றாக, அண்மையில் ஒரு ஆறு வயதுக் குழந்தை படுகொலை செய்யப்பட்டுள்ளது. கொள்ளை, வழிப்பறி, பெண்களுக்கு எதிரான பாலியல் வன்முறைகள், கொலைகள், நடைபெறுவதால் தமிழர்கள் மிகுந்த அச்சத்தில் உள்ளனர். தமிழீழ விடுதலைப் புலிகள் மீண்டும் எழுந்து வந்தால் தான் இந்தக் குற்றங்களைத் தடுக்க முடியும். தமிழர்கள் நிம்மதியாக வாழ முடியும்´´ என்று அமைச்சர் சொன்ன கருத்து தான் உண்மை நிலை ஆகும்.

ஆனால் பாராளுமன்றத்தில் அமைச்சருக்கு எதிராக கடுமையான கண்டனம் தெரிவிக்கப்பட்டு கூச்சல் குழப்பம் ஏற்பட்டது. இலங்கையின் வடக்கு மாகாண முதலமைச்சர் நீதியரசர் விக்னேஸ்வரன், அமைச்சர் விஜயகலா கூறியதில் தவறு இல்லை. அதுதான் உண்மை. இங்கு குற்றங்கள் அதிகரித்து விட்டதால் தான் அவ்விதம் கருத்து தெரிவித்தார் என்று விளக்கம் அளித்தார்.

எனினும் ஐக்கிய தேசியக் கட்சியினர், தங்கள் கட்சியின் சார்பில் அமைச்சர் பொறுப்பில் இருந்த ஒரே ஒரு தமிழரான விஜயகலாவுக்கு எதிராகக் கண்டனம் தெரிவித்ததால், அவர் தனது அமைச்சர் பதவியை இராஜினாமா செய்தார்.

இதிலிருந்து தாய்த் தமிழகத்துத் தமிழர்களும், தரணி வாழ் தமிழர்களும் ஒரு உண்மையை உணர்ந்து புரிந்து கொள்ள வேண்டும். தேசியத் தலைவர் பிரபாகரனின் நேரடிக் கண்காணிப்பில் விடுதலைப் புலிகளின் பாதுகாப்பில் தமிழர் தாயகம் இருந்தபோது, மக்களுக்கு எதிராக குற்றங்கள் எவையும் நடைபெறவில்லை. களவு, திருட்டு, மது, போதை, விபச்சாரம், கொலைகள், எதுவும் நடைபெறாமல் தமிழர்கள் நிம்மதியாக, பாதுகாப்பாக வாழ்ந்தனர். கலாச்சாரமும், பண்பாடும் பாதுகாக்கப்பட்டது.

ஆனால் இன்றோ நிலைமை தலைகீழாக மாறிவிட்டது. இராணுவத்தினரும், பொலிஸாரும் இளைய தலைமுறையைப் பாழாக்க மதுவையும், போதைப் பொருளையும் திணிக்கின்றனர். குற்றங்கள் அதிகரித்துவிட்டன. தமிழர்கள் மிகுந்த அச்சத்தில் வாடுகின்றனர்.

அமைச்சர் விஜயகலா கூறியது தான் அங்குள்ள ஈழத் தமிழர்களின் எண்ணமும், உணர்வும் ஆகும். கிரேக்க புராணத்தில் சாம்பல் குவியலில் இருந்து பீனிக்ஸ் பறவை விண்ணில் எழுந்தது போல், தமிழீழ விடுதலைப் புலிகளும் மண்ணில் புதைந்த வித்துக்கள் விருட்சமாவதைப் போல இன்றைய இளைய தலைமுறையினர் புலிகளாக மாறி எழுந்து வருவார்கள். சுதந்திரத் தமிழ் ஈழம் மலர்வது வருங்காலத்தின் கட்டாயம். வரலாற்றில் எழுதப்படப் போகும் பாடம் ஆகும்´´. எனவும் மதிமுக பொதுச்செயலாளர் வைகோ வெளியிட்ட அறிக்கையில் சுட்டிக்காட்டியுள்ளார்.
மூன்று நாள் உத்தியோகபூர்வ விஜயத்தை மேற்கொண்டு இலங்கை வந்துள்ள நோர்வே வெளிவிவகார இராஜாங்க அமைச்சர் ஜென் புரோலிச் ஹொல்ட், வட மாகாண முதலமைச்சர் சீ.வி.விக்னேஸ்வரனைச் சந்தித்துக் கலந்துரையாடியுள்ளார்.

இந்தச் சந்திப்பு யாழ். கைதடியிலுள்ள வட மாகாண முதலமைச்சர் அமைச்சு அலுவலகத்தில் இன்று (21) நண்பகல் இடம்பெற்றதாக தெரிவிக்கப்படுகின்றது.

அதனைத் தொடர்ந்து நோர்வே வெளிவிகார இராஜாங்க அமைச்சர், யாழ். குடாநாட்டின் பல்வேறு இடங்களுக்கும் விஜயம் செய்தார்.

சந்திப்பின் பின்னர் ஊடகங்களுக்குக் கருத்துத் தெரிவித்த வட மாகாண முதலமைச்சர், நான் ஜனாதிபதியிடமும் வேறுயாரிடமும் என்னை நீடிக்கும்படியோ, எங்களுடைய பதவியை நீடிக்கும்படியோ கோரவில்லை.

மேலும் மாகாண சபைத் தேர்தலை அரசு பிற்போட்டு நீண்ட காலம் எடுத்துக் கொண்டால் ஆளுநரின் ஆட்சிவரும், ஆளுநரின் ஆட்சி வந்தால் 13 ஆவது திருத்தச் சட்டத்தில் எங்களுக்குத் தந்த அதிகாரம் இல்லாமல் போய்விடும் என அவர் சுட்டிக்காட்டியுள்ளார்.

அதனைத் தவிர்க்க எங்களுடைய ஆட்சியை நீடிக்க வேண்டும் அல்லது தேர்தலை நடத்த வேண்டும் என்றும் முதலமைச்சர் தெரிவித்துள்ளார்.

தேர்தலைப் பிற்போட அரசு தீர்மானித்துள்ளதா என ஊடகவியலாளர் ஒருவர் எழுப்பிய கேள்விக்குப் பதிலளிக்கும் போதே முதலமைச்சர் இந்த கருத்துக்களை முன்வைத்துள்ளார்.

உலக வல்லரசுகளில் ஒன்றான அமெரிக்கா ஐக்கிய நாடுகளின் மனித உரிமைகள் பேரவையில் இருந்து உத்தியோகபூர்வமாக வெளியேறியுள்ளதாக தகவல் கிடைத்துள்ளது.

அமெரிக்காவின் இந்த தீர்மானத்தால் சர்வதேச அரசியல் தளத்தில் ஒருவித அதிர்வு நிலை ஏற்பட்டுள்ளதுடன், உலக நாடுகளிடையே அதிர்ச்சி ஏற்பட்டுள்ளது.

மேற்குறித்த அமெரிக்காவின் தீர்மானத்தினை ஐக்கிய நாடுகளுக்கான அமெரிக்க நிரந்தர பிரதிநிதி நிக்கி ஹெலி தெரிவித்துள்ளார்.

மனித உரிமைகள் பேரவையில் விலகிக்கொள்ள அமெரிக்க ஜனாதிபதி டொனால்ட் ட்ரம்பின் நிர்வாகம் தீர்மானித்ததாக இதற்கு முன்னர் ஊடகங்களில் தகவல்கள் வெளியாகியிருந்தன.

அமெரிக்காவின் இந்த தீர்மானம் குறித்து ஐக்கிய நாடுகள் சபை அதிருப்தி வெளியிட்டுள்ளது. உலக நிலைமைகளைக் கருத்திற் கொண்டு இந்தத் தீர்மானத்தை எடுத்ததில் இருந்து அமெரிக்கா தவிர்ந்திருக்கலாம் என ஐக்கிய நாடுகள் மனித உரிமைகள் பேரவையின் ஆணையாளர் இளவரசர் செய்யித் அல் ராத் ஹசைன் தெரிவித்துள்ளார்.

இது அமெரிக்காவினால் எடுக்கப்பட்டுள்ள ஒருதலைப்பட்சமான தீர்மானமாகும் என 'ஹியுமன் ரைற்ஸ் வோஜ்' அமைப்பு சுட்டிக்காட்டியுள்ளது.

எவ்வாறாயினும் அமெரிக்காவின் இந்த தீர்மானம் கவலைக்குரிய விடயம் என பிரித்தானிய வெளிவிவகார அமைச்சர் பொரிஸ் ஜோன்ஸ்டன் தெரிவித்துள்ளார்.

இதேவேளை இலங்கையில் இடம்பெற்ற போர் குற்றம் உள்ளிட்ட மனிதாபிமானச் சிக்கல்கள் தொடர்பில் இலங்கை அரசாங்கத்திற்கு எதிராக ஐ.நா மனித உரிமைப் பேரவையில் அமெரிக்கா தீர்மானங்களைக் கொண்டுவந்திருந்ததுடன் அவை கணிசமானளவு நாடுகளின் பங்களிப்புடன் நிறைவேற்றப்பட்டமை குறிப்பிடத்தக்கதாகும்.

மனித உரிமைப் பேரவையில் பலம் வாய்ந்த நாடாகவும் ஏனைய நாடுகளை தான் கொண்டுவரும் தீர்மானத்தினை ஆதரிக்க வைக்கவல்ல வல்லாதிக்கமிக்க சக்தியாகவும் விளங்கிய அமெரிக்கா மனித உரிமைப் பேரவையிலிருந்து விலகியமை ஈழத் தமிழ் மக்களிடையே ஒருவித அதிர்ச்சியினை ஏற்படுத்தியுள்ளதாக அரசியல் அவதானிகள் சுட்டிக்காட்டியுள்ளனர்.