WELCOME TO PANNAGAM.COM & PTV

பண்ணாகம் இணையம்

NEWS -8

ஸ்ரீலங்காவின் இந்து சமய அலுவல்கள் பிரதி அமைச்சராக நியமிக்கப்பட்டிருந்த ஸ்ரீலங்கா சுதந்திரக் கட்சியின் வன்னி மாவட்ட நாடாளுமன்ற உறுப்பினர் காதர் மஸ்தான் அந்தப் பதவியிலிருந்து விலகியுள்ளார்.

ஸ்ரீலங்கா அரச தலைவர் மைத்திரிபால சிறிசேனவுடன் இன்றைய தினம் இடம்பெற்ற சந்திப்பையடுத்தே இந்து சமய விவகார பிரதி அமைச்சர் பதவியில் இருந்து இராஜினாமா செய்துள்ளதாக வன்னி மாவட்ட நாடாளுமன்ற உறுப்பினரும், பிரதி அமைச்சருமான கே.கே.மஸ்தான் ஐ.பீ.சி தமிழுக்குத் தெரிவித்தார்.

ஸ்ரீலங்கா அரச தலைவர் மைத்ரிபால சிறிசேனவினால் யூன் 12 ஆம் திகதி ஐந்து பிரதி அமைச்சர்களும், இராஜாங்க அமைச்சர்கள் இருவரும் நியமிக்கப்பட்டனர். இவர்களில் ஒருவரான ஸ்ரீலங்கா சுதந்திரக் கட்சியின் வன்னி மாவட்ட நாடாளுமன்ற உறுப்பினர் காதர் மஸ்தானுக்கு இந்து சமய அலுவல்கள் பிரதி அமைச்சர் பதவியும் வழங்கப்பட்டிருந்தது.

இதற்கு இந்து அமைப்புக்கள், மற்றும் அரசாங்கத்தில் அங்கம் வகிக்கும் அமைச்சர் மனோ கணேசன், ஆளும் கூடடணிக் கட்சிகளின் தமிழ் நாடாளுமன்ற உறுப்பினர்கள் என தமிழர் தரப்பினால் கடும் எதிர்ப்பு தெரிவிக்கப்பட்டதுடன், வடக்கு கிழக்கில் மாத்திரமன்றி கொழும்பிலும் இந்து அல்லாத ஒருவரை இந்து சமய அலுவல்கள் பிரதி அமைச்சராகராக நியமித்ததற்கு எதிராக போராட்டங்களும் வெடித்தன.

முஸ்லீம் இனத்தவரான காதர் மஸ்தானை இந்து சமய அலுவல்கள் பிரதி அமைச்சராக நியமித்ததன் மூலம் ஸ்ரீலங்கா அரச தலைவர் மைத்ரிபாலவும், அவரது அரசாங்கமும் இந்து மக்களின் மனங்களை காயப்படுத்தியுள்ளதாகவும் கண்டனங்கள் தெரிவிக்கப்பட்டன.

இந்த நிலையிலேயே ஸ்ரீலங்கா சுதந்திரக் கட்சியின் தலைவரும், அரச தலைவருமான மைத்ரிபால சிறிசேனவுடன் இன்றைய தினம் அவசரமாக சந்தித்து ஏற்பட்டுள்ள நிலமைகள் குறித்து கலந்துரையாடியதாக வன்னி மாவட்ட நாடாளுமன்ற உறுப்பினர் காதர் மஸ்தான் தெரிவித்தார்.

ஸ்ரீலங்கா அரச தலைவருடனான சந்திப்பின் போது இந்து சமய அலுவல்கள் பிரதி அமைச்சர் பதவியை பெற்ற பின் ஏற்பட்டுள்ள நிலமை தொடர்பில் கலந்துரையாடியதாகவும், அரசியல் நோக்கம் கருதி திட்டமிட்டு தனக்கு எதிரான செயற்பாடுகள் முன்னெடுக்கப்பட்டு வருவதாகவும் சுட்டிக்காட்டியதாகவும் பிரதி அமைச்சர் மஸ்தான் கூறினார்.

எவ்வாறாயினும் மதங்களுக்கிடையில் முரண்பாடுகள் ஏற்படுவதை தவிர்ப்பதற்காகவும், பொது அமைப்புக்கள் சில கேட்டுக் கொண்டதற்கு இணங்கவும் தானாக முன்வந்து இந்து விவகார பிரதி அமைச்சர் பதவியை இராஜினாமா செய்வதாக அரச தலைவரிடம் அறிவித்து அதற்கமைய குறித்த பதவியிலிருந்து விலகியுள்ளதாகவும் தெரிவித்த அமைச்சர் மஸ்தான், ஏனைய அமைச்சுக்களின் பிரதி அமைச்சராக தொடர்ந்தும் செயற்படுவேன் என்றும் தெரிவித்தார்.

இந்து சமய விவகார பிரதி அமைச்சராக இஸ்லாமியரான காதர் மஸ்தான் நியமிக்கப்பட்டதற்கு கடும் எதிர்ப்புக் கிளம்பியுள்ள நிலையில், இந்த நியமனம் சிறிலங்கா அதிபரால் மீளாய்வு செய்யப்படும் என்று தகவல்கள் தெரிவிக்கின்றன.

இந்து மத விவகார பிரதி அமைச்சராக, காதர் மஸ்தான் நேற்று முன்தினம் நியமிக்கப்பட்டார். இதற்கு கூட்டு அரசாங்கத்தின் பங்காளிக் கட்சிகள் கடும் எதிர்ப்புத் தெரிவித்துள்ளன.

ஐதேகவின் நாடாளுமன்ற உறுப்பினர் வடிவேல் சுரேஸ் இதனைக் கடுமையாக சாடியிருந்தார்.

அத்துடன், இந்த நியமனத்தை தமிழ்த் தேசியக் கூட்டமைப்பும் எதிர்ப்பதாக,  கூட்டமைப்பின் நாடாளுமன்ற உறுப்பினர் மாவை சேனாதிராசாவும் கூறியிருந்தார்.

இதனிடையே, சைவ சமய அமைப்புகள் பலவும், இந்த நியமனத்துக்கு எதிராக போர்க்கொடி தூக்கியுள்ளன.

நேற்று நல்லூரில் சைம சமய அமைப்புகளின் சார்பில் எதிர்ப்பு ஆர்ப்பாட்டம் ஒன்றும் நடத்தப்பட்டது.

இந்த விவகாரம் தொடர்பாக, வடக்கு அபிவிருத்தி, புனர்வாழ்வு மீள்குடியேற்றம் மற்றும் இந்து சமய விவகார அமைச்சரான, டி.எம்.சுவாமிநாதன், சிறிலங்கா அதிபரின் கவனத்துக்குக் கொண்டு சென்றுள்ளார்.

“ஒரு அமைச்சர் என்ற வகையில், இந்த நியமனத்தில் எனக்கு எந்த அதிகாரமும் இல்லை.

சிறிலங்கா அதிபரே, பிரதி அமைச்சரை நியமிக்கும் அதிகாரம் கொண்டவர். இந்த விடயத்தை அவரது கவனத்துக்கு கொண்டு சென்றுள்ளேன். சிறிலங்கா அதிபரின் செயலர் ஒஸ்ரின் பெர்னான்டோவுக்கும் தகவல் தெரிவித்துள்ளேன்.

இந்த நியமனம் தொடர்பாக உடனடியாக சாதகமான பதில் அளிக்கப்படுடும் என்று சிறிலங்கா அதிபரின் செயலர் எனக்குத் தெரிவித்துள்ளார்.

அதேவேளை, மஸ்தானை பிரதி அமைச்சராக நியமிப்பதில் எனக்கு எந்த தயக்கமும் இல்லை என்பதையும் கூறிக் கொள்ள விரும்புகிறேன். அவருடன் கூட்டாக அமைச்சின் பணிகளை நிறைவேற்ற முடியும்” என்றும் அமைச்சர் சுவாமிநாதன் அறிக்கை ஒன்றை வெளியிட்டுள்ளார்.

அமெரிக்க அதிபர் டிரம்ப் மற்றும் பிற ஜி7 நாடுகளின் தலைவர்களுக்கும் உள்ள பிரிவினையை, கனடாவில் நடைபெற்ற உச்சிமாநாடு வெளிபடுத்தியுள்ளது.

முக்கிய தொழில்வள நாடுகளின் ஜி7 குழு நாடுகளின் உச்சி மாநாட்டில் ரஷ்யாவும் பங்கேற்க வேண்டும் என்று அமெரிக்க அதிபர் டொனால்டு டிரம்ப் கூறியிருந்தார்.

2014ம் ஆண்டு கிரிமியாவை ரஷ்யாவோடு இணைந்து கொண்டதை தொடர்ந்து ரஷ்யா இந்த அமைப்பில் இருந்து நீக்கப்பட்டது. ஆனால், ரஷ்யா இந்த உச்சி மாநாட்டில் பங்கேற்க விரும்புவதாக அதிபர் டிரம்ப் கூறினார்.

இந்நிலையில், ஜி7 நாடுகளின் மற்ற தலைவர்கள், ரஷ்யா இதில் பங்கேற்கக் கூடாது என்ற கருத்தினை ஒப்புக் கொண்டுள்ளதாக ஜெர்மன் சான்சிலர் ஏங்கெலா மெர்கல் தெரிவித்துள்ளார்

சமீபத்தில் டிரம்ப் நிர்வாகத்தால் விதிக்கப்பட்ட வர்த்தக வரிகளால் ஏற்பட்டுள்ள விரிசல்களும் இந்த உச்சிமாநாட்டில் தெரிகிறது.

டிரம்ப் விதித்த இந்த வரிகள் "சட்டவிதமானது" என்று கனடா கூறியிருந்தது.

ஜி7 மாநாடு

கனடா, அமெரிக்கா, பிரிட்டன், பிரான்ஸ், இத்தாலி, ஜப்பான் மற்றும் ஜெர்மனி நாடுகள் அடங்கிய ஜி7 உச்சி மாநாடு கனடாவின் கியூபெக்கில் லமாவ்பே நகரில் நடைபெறுகிறது.

60 சதவீத உலக அளவிலான நிகர மதிப்பை பிரதிநிதித்துவப்படுத்தும் நாடுகளின் தலைவர்கள் ஆண்டுதோறும் சந்தித்து வருகின்றனர்.

உலக அளவிலான பிரச்சனைகள் விவாதிக்கப்பட்டாலும், பொருளாதாரம்தான் நிகழ்ச்சிநிரலில் முதன்மை பெறுகிறது.

ரஷ்யா குறித்து கூறப்பட்டது என்ன?

"உங்களுக்கு பிடிக்கிறதோ, பிடிக்கவில்லையோ - இது அரசியல் ரீதியாக தவறாகக்கூட இருக்கலாம் - ஆனால், நாம் இயக்குவதற்கு ஒரு உலகம் உள்ளது, ஜி-8 நாடுகள் என இருந்ததில் இருந்து வெளியேற்றிய ரஷ்யாவை மீண்டும் இதில் சேர அனுமதிக்க வேண்டும்" என்று டிரம்ப் தெரிவித்தார்.

உக்ரைன் விவகாரத்தில் முன்னேற்றம் இல்லாதவரை, ரஷ்யாவை இதில் மீண்டும் இணைத்துக் கொள்ள முடியாது என ஐரோப்பிய ஒன்றிய உறுப்பினர்கள் அனைவரும் ஒப்புக் கொண்டுள்ளதாக ஜெர்மன் சான்சிலர் ஏங்கெலா மெர்கல் கூறியுள்ளார்.

ஜி7-ஐ தவிர "மற்ற வடிவங்களில்" பேச ரஷ்யா ஆர்வமுடன் இருப்பதாக க்ரெம்லின் செய்தி தொடர்பாளர் தெரிவித்தார்.

தூத்துக்குடியில் ஸ்டெர்லைட் ஆலைக்கு எதிரான போராட்டத்தில் போராடியவர்கள் மீது துப்பாக்கிச்சூடு நடத்தப்பட்டு 13 பேர் பலியானார்கள். 
இந்த சம்பவத்தில் ரஜினி, கமல், சூர்யா, விஷால், கார்த்தி, சிவகார்த்திகேயன் முதல் சூரி வரை எல்லா பெரிய, சின்ன நடிகர்களுமே தங்களது எதிர்ப்பையும் கண்டனங்களையும் வலுவாக பதிவு செய்தனர். ஆனால் விஜய்யோ, அஜித்தோ இதுவரை வாயே திறக்கவில்லை.
தமிழ்நாட்டில் ரஜினிக்கு பிறகு விஜய், அஜித் இருவருக்கு தான் ரசிகர்கள் அதிகம். இருவரது ரசிகர்களும் நினைத்தால் ஒரு செய்தியை உலக அளவிற்கு கொண்டு செல்ல முடியும். ஆனால் தமிழ்நாட்டில் நடந்த இத்தனை பெரிய சம்பவத்துக்கு இருவருமே கண்டனம் தெரிவிக்காதது அவர்களின் ரசிகர்களுக்கு கடும் அதிருப்தியை ஏற்படுத்தி இருக்கிறது.
ரசிகர் ஒருவர் இதுபற்றி கூறும்போது ‘விஜய்யாவது இதற்கு முன்பு சில பிரச்சினைகளில் கண்டனம் தெரிவித்தார். அனிதா பலியானபோது வீட்டுக்கே சென்று ஆறுதல் கூறினார். ஆனால் இந்த சம்பவத்தில் அவரும் கருத்து கூறவில்லை.
இவர்கள் கண்டனம் தெரிவிப்பார்கள் அதனை உலக அளவில் கொண்டு செல்லலாம் என்று காத்திருந்தோம். ஆனால் அப்படி ஒரு சம்பவம் நடந்ததே தெரியாத மாதிரி இருந்துகொண்டார்கள். மிகவும் வேதனையாக இருக்கிறது’ என்றார். விஜய், அஜித் மட்டும் அல்லாது முன்னணி கதாநாயகிகளும் தூத்துக்குடி சம்பவத்திற்கு கண்டனம் தெரிவிக்கவில்லை.

யாழ்ப்பாணத்தில் மின்சாரம் தாக்கி தந்தையும் மகனும் பரிதாபமாக உயிரிழந்த சம்பவம் பெரும் சோகத்தை ஏற்படுத்தியுள்ளது.

56 வயதான ஜெகனாந்தன் மற்றும் 29 வயதான சஞ்சீவன் ஆகியோர் மின்சார தாக்கத்தினால் உயிரிழந்துள்ளனர்.

இந்த அனர்த்தம் இன்று காலை வடமராட்சி கரணவாய் கிழக்குப் பகுதியில் இடம்பெற்றதாக பொலிஸார் தெரிவித்தனர்.

வீட்டில் தொலைக்காட்சி வேலை செய்யாத காரணத்தால், கேபிள் இணைப்பில் வயரைப் பொருத்த முற்பட்டுள்ளனர். இதன்போது அதி உயர் மின் அழுத்தம் தாக்கியதிலேயே தந்தையும், மகனும் உயிரிழந்துள்ளனர்.

உயிரிழந்தவர்கள் யாழ்ப்பாணம் நகரில் கையடக்க தொலைபேசி விற்பனை நிலையத்தை ஒன்றை நடத்தி வருகின்றனர்.

சம்பவம் தொடர்பில் நெல்லியடிப் பொலிஸார் விசாரணைகளை மேற்கொண்டு வருகின்றனர்

யாழ்ப்பாணம் மேல் நீதிமன்ற நீதிபதியாகக் கடமையாற்றிய மாணிக்கவாசகர் இளஞ்செழியன் திருகோணமலை மாவட்ட மேல்  நீதிமன்ற நீதிபதியாக இடமாற்றப்பட்டுள்ளார்.

இதேவேளை திருகோணமலை மாவட்ட மேல் நீதிமன்ற நீதிபதியாகக் கடமையாற்றிய அன்னலிங்கம் பிரேம்சங்கர், யாழ்ப்பாணம் மேல் நீதிமன்ற நீதிபதியாக இடமாற்றப்பட்டுள்ளார். இவர் ஏற்கனவே யாழ்ப்பாணம் மேல் நீதிமன்ற நீதிபதியாகக் கடமையாற்றியமை குறிப்பிடத்தக்கது.

அதேவேளை வவுனியா மேல் நீதிமன்ற நீதிபதி பாலேந்திரன் சசிமகேந்திரன், கொழும்பு மேல் நீதிமன்ற நீதிபதியாக இடமாற்றப்பட்டுள்ளார்.

மேல் நீதிமன்ற நீதிபதியாக பதவி உயர்வு பெற்ற திருமதி சிறிநிதி நந்தசேகரன், கல்முனை மேல் நீதிமன்ற நீதிபதியாக நியமிக்கப்பட்டுள்ளார். அத்துடன் வவுனியா மேல் நீதிமன்ற
நீதிபதியாக என்.எம்.எம் அப்துல்லா நியமிக்கப்பட்டுள்ளார் என அறியமுடிகிறது.

பௌத்தர்களின் புதின வெசாக் கொண்டாட்டம் யாழ்ப்பாணத்திலும் களைகட்டியுள்ள நிலையில், யாழ். மேல்நீதிமன்ற நீதிபதி மா.இளஞ்செழியன் பிரதம அதிதியாக கலந்துகொண்டார்.

யாழ்ப்பாணத்தில் பல பகுதிகளிலும் வெசாக் வலயங்கள் அமைக்கப்பட்டு, வெசாக் தின நிகழ்வுகள் கொண்டாடப்பட்டு வருகின்றன. யாழ். வெசாக் வலயத்தை யாழ். பாதுகாப்பு படை தலைமையகம் ஏற்பாடு செய்துள்ளது.

‘யாழ்ப்பாண பட்டினமும் தர்ம எழுச்சியும்’ எனும் பெயரில் நேற்று ஞாயிற்றுக்கிழமை இரவு குறித்த வெசாக் வலயம் யாழ்ப்பாணம் வீரசிங்கம் மண்டபத்திற்கு முன்பாக ஆரம்பமானது

நேற்று முதல் மூன்று நாட்களுக்கு இடம்பெறும் இந்நிகழ்வில் வெசாக் தோரணங்கள், வெளிச்சக் கூடு கண்காட்சிகள், பௌத்த பக்தி பாடல் நிகழ்வுகளுடன் அன்ன தானமும் வழங்கப்பட்டு வருகின்றன. இந்த வெசாக் வலயத்தை அதிகளவான மக்கள் பார்வையிட்டு வருகின்றனர்.

இதேவேளை, யாழ் பாதுகாப்பு படைத்தலைமையகத்தின் எற்பாட்டில் யாழ்ப்பாண பட்டிணமும் புத்தசாசன தர்மம சிந்தனை என்னும் கருப்பொருளில் புனித வெசாக்வலய நிகழ்வுகள் நேற்று யாழ் பண்ணை திறந்த முற்ற வெளிமைதானத்தில் நடைபெற்றது.

குறித்த நிகழ்வில் யாழ் இந்திய உதவித் துணைத்தூதுவர் ச.பாலச்சந்திரன், மற்றும் யாழ் மேல்நீதிமன்ற நீதிபதி மா.இளஞ்சழியன் ஆகியோர் பிரதம அதிதிகளாக கலந்துகொண்டு புனித வெசாக் வலயத்தின் பிரதான வெளிச்சக்கூட்டினை ஆரம்பித்து வைத்தனர்.

குறித்த நிகழ்வில் வடக்கு மாகாண பிரதிப் பொலிஸ்மா அதிபர் ரொஹான் பெர்னாண்டோ மற்றும் வடக்கு மாகாண கடற்படைத் தளபதி ரவீந்திர விஐயவர்த்தன, மதத்தலைவர்கள், அரச உயர் அதிகாரிகள், பொதுமக்கள் எனப் பலரும் கலந்துகொண்டனர்.

வவுனியா உள்ளூராட்சி சபைகளில், ஐதேக, சிறிலங்கா சுதந்திரக் கட்சி, பொதுஜன முன்னணி போன்ற சிங்களப் பேரினவாதக் கட்சிகளுடனும், ஈபிடிபியுடனும் இணைந்து ஈபிஆர்எல்எவ் ஆட்சியமைக்க மேற்கொண்ட நடவடிக்கைகளால் அதிருப்தியடைந்து, தமிழ்த் தேசிய விடுதலைக் கூட்டணியில் இருந்து ஜனநாயக தமிழ் அரசுக் கட்சி வெளியேறியுள்ளது.

கடந்த உள்ளூராட்சித் தேர்தலில் ஈபிஆர்எல்எவ், தமிழர் விடுதலைக் கூட்டணி, ஜனநாயக தமிழ் அரசுக் கட்சி புனர்வாழ்வு அளிக்கப்பட்ட விடுதலைப் புலிகள் கட்சி உள்ளிட்ட கட்சிகள் இணைந்து- தமிழ்த் தேசிய விடுதலைக் கூட்டணி என்ற அமைப்பை உருவாக்கி – உதயசூரியன் சின்னத்தில் போட்டியிட்டிருந்தன.

தமிழ்த் தேசியக் கூட்டமைப்பின் கொள்கைகளால் அதிருப்தியடைந்து, அதிலிருந்து வெளியேறிய கட்சிகள் மற்றும் ஏனைய கட்சிகள் கூட்டமைப்புக்கு மாற்றான அணி என்று தம்மை பிரகடனம் செய்திருந்தன.

உள்ளூராட்சித் தேர்தலுக்குப் பின்னர் இந்த அணியில் இருந்து புனர்வாழ்வு அளிக்கப்பட்ட விடுதலைப் புலிகள் கட்சி வெளியேறியது. தமக்கு உரிய பிரதிநிதித்துவம் அளிக்கப்படவில்லை என்றும், ஈபிஆர்எல்எவ் சர்வாதிகாரத்தனத்துடன் நடப்பதாகவும் அதனை ஆனந்தசங்கரி கண்டு கொள்ளவில்லை என்றும் அந்தக் கட்சி குற்றம்சாட்டியிருந்தது.

இந்த நிலையில், இந்தக் கூட்டணியில் இருந்து நேற்று விலகிக் கொள்வதாக ஜனநாயக தமிழ் அரசுக் கட்சி அறிவித்துள்ளது.

இதுதொடர்பாக ஜனநாயக தமிழ் அரசுக் கட்சியின் பொதுச் செயலாளர் வி.எஸ்.சிவகரன்  நேற்று வெளியிட்டுள்ள அறிக்கையில் கூறியிருப்பதாவது –

தமிழ் தேசியக் கூட்டமைப்பிடம் கொள்கையில்லை. ஜனநாயகத் தன்மை இல்லை சர்வாதிகாரம் காணப்படுகின்றது. எந்த விதமான நிபந்தனையும் இல்லாமல் அரசாங்கத்துடன் சரணகதி அரசியல் நடாத்துகிறார்கள். மக்களின் உணர்வுகளுக்கு மதிப்பளிக்கவில்லை எனும் அடுக்கடுக்கான பல்வேறு விதமான குற்றச்சாட்டுடன் கூட்டமைப்பில் இருந்து வெளியேறி  தமிழ் தேசிய விடுதலை கூட்டமைப்பை ஏற்படுத்தி தமிழர் விடுதலை கூட்டணியின் உதய சூரியன் சின்னத்தில் ஐந்து கட்சிகள் இணைந்து ஒப்பந்தத்தின் அடிப்படையில் போட்டியிட்டோம்.

உள்ளுராட்சி மன்றங்களில் எவருக்கும் ஆதரவு வழங்குவதில்லை எனும் தீர்மானம் மேற்கொள்ளப்பட்டது.

அதற்கு மாறாக வவுனியாவில் ஈ.பி.ஆர்.எல்.எப் நடந்து கொண்டது அரசியல் அநாகரிகம். கொள்கையில்லாமல் தமிழ்த் தேசியக் கூட்டமைப்பு கூட்டு வைக்கிறது என குற்றஞ்சாட்டி விட்டு அதே வேலையை எம்மால் செய்ய முடியுமா?

பதவி பெறுவது தான் முக்கியம் என்றால் எதற்காக இந்த கூட்டில் நாம் தொடர வேண்டும். கொள்கையில்லாத தமிழ் தேசிய நீக்கத்தை ஏற்படுத்தும் நோக்கிலான கூட்டில் நாம் தொடர விரும்பவில்லை என்பதை மிகத் தெளிவாகத் தெரிவித்துக் கொள்கிறோம்.

வவுனியாவில் பொது எதிரியாகிய தேசிய கட்சிகளுடன் கை கோர்த்தமையை வன்மையாக கண்டிக்கின்றோம்.

தமிழ்த் தேசிய விடுதலைப் போக்கை கொள்கையற்ற பதவி ஒரு போதும் சமப்படுத்தப் போவது இல்லை. பதவி பெறுவது விடுதலை அரசியலுக்கு அறமும் இல்லை.

இன அழிப்பை ஏற்படுத்திய தேசிய கட்சிகளுடனும் காட்டி கொடுத்து கூட்டி கொடுத்த தேச விரோத ஈ.பி.டி.பி, கருணா குழு போன்றவற்றுடன் வாக்களித்த மக்களின் விருப்புக்கு மாறாக ஆட்சி அமைத்த தமிழ்த் தேசியக் கூட்டமைப்பின் அநாகரிக பிற்போக்குதனத்தை நாமும் பின்பற்றுவது அதை விட அசிங்கமாகும்.

ஆகவே  தமிழ்த் தேசியத்துக்கு மாறானவர்களுடன் இணைந்து பதவி இலாபம் தேடியதால் இந்த கொள்ளையற்ற கூட்டில் தொடர முடியாது என நாம் தீர்மானித்து அக் கூட்டணியில் இருந்து இன்று முதல் உத்தியோகபூர்வமாக வெளியேறுகின்றோம்.

அரசியலில் எந்த சந்தர்ப்பத்திலும் ஆதாய சூதாடியாக நாம் இருக்க விரும்பவில்லை என்பதில் திடமான கொள்கையில் பயணிப்பவர்கள் நாம்.

ஆகவே இவ்வாறான பதவி, சுகபோகங்களுடன் கூட்டிணைந்தமைக்காக மக்களிடம் மன்னிப்பு கோருகின்றோம்.

காலம் இவர்களுக்கு தகுந்த பதில் வழங்கும் என்பதில் எமக்கு மாற்றுக் கருத்து இல்லை” என கூறப்பட்டுள்ளது.