WELCOME TO PANNAGAM.COM & PTV

பண்ணாகம் இணையம்

News-1

ஐக்கிய நாடுகள் மனித உரிமை கள் பேரவையில் இலங்கை அரசாங்கம் உறுதியளித்த வகை யில் காணாமல்போனோர் தொடர் பில் இலங்கை அரசாங்கம் பொறுப் புள்ளவர்களை சட்டத்தின் முன் நிறுத்தவேண்டும் என்று மனித உரிமைகள் கண்காணிப்பகம் கோரியுள்ளது.
காணாமல்போனோர் தொடர் பில் வடக்கு, கிழக்கின் 6 இடங் களில் நடவடிக்கையாளர்கள் செயற்படுகின்றனர். இவர்களை கண்காணிக்கும் நடவடிக்கை களும் அச்சுறுத்தல் நடவடிக்கை களும் அதிகரித்துள்ளதாக சர்வ தேச மனித உரிமைகள் கண் காணிப்பகம் தெரிவித்துள்ளது.
காணாமல் போனவர்களின் உறவினர்களின் கூட்டம் அண் மையில் நடைபெற்றது. அதற்கு செல்வதற்கு முன்னர் காணாமல் போனவர்களின் உறவுகளுக்கு சுமார் 6 இடங்களில் இருந்து தொலைபேசி அழைப்புக்கள் விடுக் கப்பட்டுள்ளன.
இதன்போது எதற்காக இந்த கூட்டம் இடம்பெறுகிறது உட்பட்ட பல்வேறு கேள்விகள் கேட்கப்பட்டுள்ளன. இதனையடுத்து குறித்த கூட்டத்தை தாம் நிறுத்திவிட்டதாக மனித உரிமைகள் செயற் பாட்டாளர் ஒருவர் தெரிவித்தார்.
காணாமல் போனவர்களின் உறவினர் கள் தமது உறவுகளின் நிலையை தெரிந்து கொள்ள பல வருடங்களாக காத்திருக்கின் றனர்.
இந்தநிலையில் ராஜபக்ஷவினர் ஆட் சிக்கு வந்தபின்னர் படையினர் காணாமல் போனோர் உறவுகளை பயமுறுத்தி அவர் களின் கோரிக்கைகளை மழுங்கடிக்கும் நட வடிக்கைகளை மேற்கொண்டு வருவதாக மனித உரிமை நடவடிக்கையாளர் ஒருவர் தெரிவித்ததாக சர்வதேச மனித உரிமைகள் கண்காணிப்பகத்தின் ஆசிய பணிப்பாளர் மீனாக்ஷி கங்குலி சுட்டிக் காட்டியுள்ளார்.
2005-2015 ஆண்டு காலப்பகுதியில் தற்போதைய ஜனாதிபதியே அப்போதைய பாதுகாப்பு செயலாளராக இருந்தார். தற் போதைய பிரதமர் மகிந்த ராஜபக்ஷவே அப் போதைய ஜனாதிபதியாக இருந்தார். 
இதன்போது ஆயிரக்கணக்கான தமிழர் கள் காணாமலாக்கப்பட்டனர். இந்த நிலை யில் காணாமல்போனவர்கள் இறந்துவிட்ட தாக தற்போதைய ஜனாதிபதி கோட்டாபய ராஜபக்ச தெரிவித்துள்ளார்.
இது பொறுப்புக்களை தவிர்க்கும் செயற் பாடாக பார்க்க வேண்டியுள்ளது. இந்தநிலை யில் இலங்கை அரசாங்கம் ஐக்கிய நாடுகள் மனித உரிமைகள் பேரவையில் உறுதி யளித்தபடி காணாமல்போனோர் விடயத்தில் குற்றவாளிகளை நீதிக்கு முன் நிறுத்தி தண்டனை பெற்றுக் கொடுக்க வேண்டும் என்று சர்வதேச மனித உரிமைகள் கண் காணிப்பத்தின் ஆசியப் பணிப்பாளர் மீனாக்ஷி கங்குலி கோரிக்கை விடுத்துள்ளார்.

கொரோனா வைரஸ் பாதிப்புக்கு 50 ஆயிரத்துக்கும் மேற்பட்டோர் பலியாகி இருப்பதாக சீனாவில் இருந்து தப்பியோடிய பிரபல தொழில் அதிபர் குயோ வெங்குயி தெரிவித்து இருப்பது பெரும் பரபரப்பை ஏற்படுத்தி உள்ளது.

சீனாவில் கொரோனா வைரஸ் பாதிப்பால் ஏற்படும் உயிர் இழப்புகளின் எண்ணிக்கை நாளுக்கு நாள் உச்சம் தொட்டு வருகிறது. இந்த வைரசால் ஏற்பட்ட உயிர் இழப்புகள் கடந்த 2002-03-ம் ஆண்டுகளில் உலகம் முழுவதும் பரவிய சார்ஸ் நோயால் ஏற்பட்ட உயிர் இழப்புகளைவிட தற்போது அதிகமாகி உள்ளது. அங்கு இதுவரை 908 பேர் இந்த வைரஸ் பாதிப்பால் உயிரிழந்து உள்ளனர். சுமார் 40 ஆயிரத்துக்கும் மேற்பட்டோர் பாதிக்கப்பட்டு இருக்கின்றனர்.

இந்தநிலையில், சீனாவில் கொரோனா பாதிப்பால் 50 ஆயிரத்துக்கும் மேற்பட்டோர் உயிர் இழந்து இருப்பதாக சீனாவில் இருந்து தப்பியோடி அமெரிக்காவில் வசித்து வரும் பிரபல தொழில் அதிபர் குயோ வெங்குயி தெரிவித்து உள்ளார்.

செய்தி 2

சீனாவில் கொரோனா வைரஸ் பாதிப்பால் உயிரிழந்தவர்கள் எண்ணிக்கை 1,110 ஆக உயர்ந்துள்ளது.

சீனாவில் கடந்த டிசம்பர் மாத இறுதியில் ஹுபெய் மாகாண தலைநகர் உகானில் கொரோனா வைரஸ் கண்டறியப்பட்டது. இதன்பின்னர் பெய்ஜிங் மற்றும் ஷாங்காய் என நாடு முழுவதும் பரவியது என தகவல்கள் வெளியாகின. எனினும், உகானில் இந்த வைரஸ் அதிக பாதிப்பு ஏற்படுத்தியது. இதனால் தொடர்ந்து உயிரிழப்புகள் அதிகரித்து வருகின்றன.

நேற்று 94 பேர் உயிரிழந்துள்ளனர். இதனால் பலி எண்ணிக்கை 1,110 ஆக அதிகரித்து உள்ளது. இதேபோன்று 1,638 பேருக்கு புதிதாக பாதிப்பு உறுதி செய்யப்பட்டது. இதனால் 44,200க்கும் கூடுதலான பேருக்கு சீனா முழுவதும் வைரஸ் பாதிப்பு உள்ளது உறுதி செய்யப்பட்டு இருக்கிறது.


இந்தியாவின் உதவியில்லாமல் 2009 ஆண்டு யுத்தத்தை நிறைவு செய்திருக்க முடியாதென பிரதமர் மஹிந்த ராஜபக்ஷ தெரிவித்துள்ளார்.

இந்துஸ்தான் ரைம்ஸ் செய்திச் சேவைக்கு வழங்கிய செவ்வியிலேயே அவர் இதனைக் குறிப்பிட்டுள்ளார்.

குறித்த செவ்வியில் “விடுதலைப் புலிகள் இயக்கத்தை அழிக்க இந்தியா பெரும் உதவிகளை வழங்கியுள்ளது. அதாவது, கடந்த 2009ஆம் ஆண்டு யுத்தத்தை இந்தியாவின் உதவியின்றி எம்மால் நிறைவு செய்திருக்க முடியாது.

ஆனால் அந்த நாட்களில் இந்தியா தாம் வழங்கிய உதவிகளை வெளிப்படையாக அறிவிக்க விரும்பவில்லை. மேலும் இலங்கையின் உள்ளக விவகாரங்களில் சீனாவோ இந்தியாவோ தலையிட்டதில்லை. யுத்தத்தின் பின்னர் வடக்கு கிழக்கில் நாங்களே அபிவிருத்திகளைச் செய்தோம்.

தமிழ் தேசியக் கூட்டமைப்பு நாடாளுமன்றத்தில் அதிகப்படியான தமிழர்களை பிரதிநிதித்துவம் செய்தாலும் அதுவும் அபிவிருத்திகளை விரும்பவில்லை. மாறாக அதிகாரப்பகிர்வை கோரி தமிழர்களுக்கான தனி மாநிலத்தை கட்டியெழுப்பவே முயல்கிறது” எனக் குறிப்பிட்டுள்ளார்.

தென்னிந்திய நடிகர் ரஜினிகாந்த் இலங்கை வருவதில் எந்தத் தடையுமில்லை என நாடாளுமன்ற உறுப்பினர் நாமல் ராஜபக்ஷ தெரிவித்துள்ளார்.

தனது ட்டுவிட்டர் பக்கத்தில் நாடாளுமன்ற உறுப்பினர் நாமல் ராஜபக்ஷ இந்த விடயத்தினைத் தெரிவித்துள்ளார். அதில் மேலும்,

நடிகர் ரஜினிகாந்த் இலங்கை வருவதில் எந்தத் தடையுமில்லை. அது பற்றிய வதந்திகளில் எந்த உண்மையுமில்லை. நானும் எனது தந்தையாரும் ரஜினிகாந்த் திரைப்படங்களின் பெரும் ரசிகர்கள்.

அவர் இலங்கை வர விரும்பினால் நிச்சயம் வரலாம், ஒரு தடையுமில்லை – என குறிப்பிட்டுள்ளார்.

அண்மையில் வடக்கு மாகாண முன்னாள் முதலமைச்சர் சி.வி.விக்னேஸ்வரன் நடிகர் ரஜினிகாந்தினை இலங்கை வருமாறு அழைப்பு விடுத்திருந்தார்.

எனினும், அரசியல் ரீதியான பயணங்களுக்கு அவருக்கு அனுமதி வழங்கப் போவதில்லை என இலங்கை அரசாங்கம் கூறியதாக தமிழக ஊடகங்கள் செய்தி வெளியிட்டிருந்தன.

இந்தநிலையில் ரஜினி காந்த்திற்கு விசா வழங்க மறுப்பு தெரிவிக்கப்பட்டதாக வெளியான செய்தியினை இலங்கை அரசாங்கமும் அண்மையில் மறுத்திருந்தது என்பது குறிப்பிடத்தக்கது.

பிரதமர் மகிந்த ராஜபக்சவின் புதல்வர்களான நாமல் மற்றும் ரோகித இருவரின் மாமியருக்கு கோட்டாபய அரசாங்கத்தின் கீழ் முக்கிய பதவிகள் வழங்கப்பட்டுள்ளதாக கொழும்புத் தகவல்கள் தெரிவிக்கின்றன.

இதன்படி நாமலின் மாமியாரான திலக் வீரசிங்க மற்றும் ரோகிதவின் மாமியாரான தீர்த்ரே டி லிவேரா ஆகியோருக்கே முக்கிய பதவிகள் வழங்கப்பட்டுள்ளதாக அந்த தகவல்கள் தெரிவிக்கின்றன.

விமானநிலையம் மற்றும் விமான போக்குவரத்து ஆணையத்தின் பணிப்பாளர்களாக இருவரும் நியமிக்கப்பட்டுள்ளதாக தெரியவருகிறது.

ஜனாதிபதி கோட்டாபயவின் பிரத்தியேக செயலாளராக ரோகித ராஜபக்ச ஏற்கனவே நியமிக்கப்பட்டுள்ளார்.

இதேவேளை ஜனாதிபதி கோட்டாபய ராஜபக்ச தான் ஆட்சிக்கு வந்த பின்னர் திறமை அடிப்படையில் அரச பதவிகளை வழங்க நிபுணர் குழுவை நியமிக்கவுள்ளதாக தெரிவித்திருந்தமை குறிப்பிடத்தக்கது.


ஜனாதிபதி கோட்டாபய ராஜபக்ஷ கொழும்பு தேசிய வைத்தியசாலைக்கு திடீர் கண்காணிப்பு விஜயமொன்றை மேற்கொண்டுள்ளார்.

வைத்தியசாலைக்கு இன்று (வியாழக்கிழமை) காலை சென்று வெளிநோயாளர் பிரிவைப் பார்வையிட்ட அவர், வைத்தியர்களை சந்தித்து மக்களின் நலன்கள் குறித்து கேட்டறிந்தார்.

அத்தோடு மக்களை சந்தித்து மக்களின் நலன்கள், தேவைகள் மற்றும் பிரச்சினைகள் குறித்தும் கேட்டறிந்தார்.

மேலும் வைத்தியசாலையின் நடவடிக்கைகள், நிர்மாணப் பணிகள் குறித்தும் ஜனாதிபதி இதன்போது கேள்வி எழுப்பினார்.

கோட்டாபய ராஜபக்ஷ ஆட்சிக்கு வந்ததன் பின்னர் விசேட பொருளாதார மையம், மோட்டார் போக்குவரத்து திணைக்களம் உள்ளிட்ட பல இடங்களுக்கு இவ்வாறு திடீர் கண்காணிப்பு விஜயங்களை மேற்கொண்டிருந்தமை குறிப்பிடத்தக்கது.

சிறிலங்கா அதிபர் கோத்தாபய ராஜபக்ச எதிர்வரும் 14ஆம், 15ஆம் நாட்களில் சீனாவுக்கு முதலாவது அதிகாரபூர்வ பயணத்தை மேற்கொள்ளவுள்ளார் என தகவல்கள் தெரிவிக்கின்றன.

சீன அதிபர் ஷி ஜின்பிங்கின் அழைப்பை ஏற்று, சிறிலங்கா அதிபர் இந்தப் பயணத்தை மேற்கொள்ளவுள்ளார்.

முன்னதாக ஜனவரி மாதம் முதல் வாரம், சிறிலங்கா அதிபர் பயணத்தை மேற்கொள்வதற்கு பீஜிங் பரிந்துரைத்திருந்தது என்றும்,  பின்னர் மீளாய்வு செய்யப்பட்டு, 14, 15ஆம் நாள்களில் பயணத்தை மேற்கொள்வதற்கு இணக்கம் ஏற்பட்டுள்ளதாகவும் தெரிவிக்கப்படுகிறது.

நொவம்பர் மாதம் சிறிலங்கா அதிபராகப் பதவியேற்ற பின்னர் கோத்தாபய ராஜபக்ச மேற்கொள்ளவுள்ள இரண்டாவது வெளிநாட்டுப் பயணம் இதுவாகும்.

அவர் நொவம்பர் 28 தொடக்கம் 30 வரை இந்தியாவில் அதிகாரபூர்வ பயணத்தை மேற்கொண்டிருந்தார் என்பது குறிப்பிடத்தக்கது.

மட்டக்களப்பு மாவட்டத்தில் தொடர்ந்து பெய்த மழை மற்றும் மாதுறு ஓயாவின் வான்கதவுகள் திறக்கப்பட்டதன் காரணமாக இதுவரையில் சுமார் 7,300 குடும்பங்கள் இடம்பெயர்ந்துள்ளதாக மட்டக்களப்பு மாவட்ட அனர்த்த முகாமைத்துவ நிலையம் தெரிவித்தது.

மட்டக்களப்பு மாவட்டத்தின் 14 பிரதேச செயலாளர் பிரிவுகளில் சுமார் 12 பிரதேச செயலாளர் பிரிவுகள் வெள்ள அனர்த்தம் காரணமாக பாதிக்கப்பட்டுள்ள. இதில் கிரான் மற்றும் ஏறாவூர்ப்பற்று பிரதேச செயலாளர் பிரிவுகளில் மக்கள் கடும் பாதிப்பினை எதிர்கொண்டுள்ளனர்.

மாவடியோடை அணைக்கட்டினை ஊடறுத்து பாய்ந்த வெள்ளம் மற்றும் உறுகாமம் குளம் ஆகியவற்றின் ஊடாக வெளியேறிய மாதுறு ஓயாவின் நீரினால் இந்த பாதிப்புகள் ஏற்பட்டுள்ளன.

ஏறாவூர் பற்று பிரதேச செயலாளர் பிரிவிற்குட்பட்ட சித்தாண்டி பிரதேசத்தில் 312 குடும்பங்களைச் சேர்ந்த 1,072 பேர் வந்தாறு மூலை மத்திய மகா வித்தியாலயத்திலும், வந்தாறுமூலை மேற்கில் 185 குடும்பங்களைச் சேர்ந்த 420 பேர் வந்தாறுமூலை கணேசா வித்தியாலயத்திலும் தங்கவைக்கப்பட்டுள்ளனர்.

இதேவேளை, கிரான் பிரதேச செயலகப் பிரிவிற்குட்பட்ட கிரான் பிரதேசத்தில் ஏற்பட்ட வெள்ளம் காரணமாக பாதிக்கப்பட்ட 53 குடும்பங்களைச் சேர்ந்த 179 பேர் ரெஜி கலாசார மண்டபத்திலும், சந்திவெளி பிரதேசத்தில் பாதிக்கப்பட்ட 33 குடும்பங்களைச் சேர்ந்த 93 பேர் சந்திவெளி சித்திவிநாயகர் வித்தியாலயத்திலும் தங்க வைக்கப்பட்டுள்ளனர்.

மட்டக்களப்பு மாவட்டத்தின் ஏறாவூர்ப்பற்று, கிரான் பிரதேச செயலாளர் பிரிவு, வாகரை பிரதேச செயலாளர் பிரிவு, ஓட்டமாவடி மத்தி மற்றும் வாழைச்சேனை பிரதேச செயலாளர் பிரிவுகளில் பகுதிகளில் 9 இடைத்தங்கல் முகாம்கள் அமைக்கப்பட்ட நிலையில் அவற்றில் 6,287 குடும்பங்களைச் சேர்ந்த 21,104பேர் தங்கவைக்கப்பட்டிருப்பதாக அனர்த்த முகாமைத்து நிலையம் தெரிவித்தது.

இடம்பெயர்ந்த நிலையில் உறவினர் நண்பர்கள் வீடுகளில் 1,026 குடும்பங்களைச் சேர்ந்த 3,122பேர் தங்கியுள்ளதாகவும் அனர்த்த முகாமைத்துவ நிலையம் தெரிவித்துள்ளது.

இதேநேரம், வெள்ள அனர்த்தம் காரணமாக பல பகுதிகளில் போக்குவரத்து பாதிக்கப்பட்டுள்ளது. குறிப்பாக மட்டக்களப்பு-கொழும்பு பிரதான வீதியில் சித்தாண்டி பகுதி ஊடாக வெள்ளம் ஊடறுத்துப் பாய்வதன் காரணமாக போக்குவரத்து பெரிதும் பாதிக்கப்பட்டுள்ளது.

இதேபோன்று, மட்டக்களப்பு மாவட்டத்தின் பிரதான குளமான உன்னிச்சைக் குளத்தின் மூன்று வான்கதவுகளும் மூன்று அடி திறக்கப்பட்டுள்ளதன் காரணமாக வவுணதீவு பகுதிக்கான போக்குவரத்து சிரமத்தின் மத்தியில் மேற்கொள்ளப்படுகிறது.

மட்டக்களப்பு மாவட்டத்தில் பெய்துவரும் மழை மற்றும் உன்னிச்சைக் குளத்தினை அண்டியுள்ள காட்டுப்பகுதியில் பெய்துவரும் மழை காரணமாக உன்னிச்சைக் குளத்தின் நீர்மட்டம் 32அடியை எட்டியுள்ளது.

இந்த நிலையில் குளத்தின் மூன்று வான்கதவுகளும் மூன்று அடி திறக்கப்பட்டுள்ள. இதன்காரணமாக வவுணதீவு உட்பட பல பகுதிகள் நீரில் மூழ்கியுள்ளன.

அத்துடன், வவுணதீவு பிரதேசத்திற்கு செல்லும் வலையிறவு தாம்போதி ஊடாக ஒரு அடிக்கு மேல் நீர்பாய்வதன் காரணமாக மக்கள் பெரும் சிரமங்களுடன் போக்குவரத்தினை மேற்கொண்டு வருகின்றனர்.

இதேபோன்று, நவகிரி குளத்தின் வான்கதவுகள் திறக்கப்பட்டுள்ளதன் காரணமாக வெல்லாவெளி பிரதேசத்தின் பல பகுதிகள் நீரில் மூழ்கியுள்ளதுடன் சில பகுதிகளில் மக்களின் போக்குவரத்துகள் பாதிக்கப்பட்டுள்ளன.

மண்டூர்-வெல்லாவெளி பிரதான வீதியை ஊடறுத்து வெள்ளம் பாய்வதன் காரணமாக குறித்த வீதியூடான போக்குவரத்து பாதிக்கப்பட்டுள்ளது.

இதேபோன்று, செங்கலடி-பதுளை வீதியில் கோப்பாவெளி பகுதியில் புதிய பாலம் அமைக்கும் பணிகள் மேற்கொள்ளப்பட்டுவரும் நிலையில் அமைக்கப்பட்டுள்ள தற்காலிக வீதியும் உடைப்பெடுத்துள்ளதால் போக்குவரத்தில் பெரும் பாதிப்பு ஏற்பட்டுள்ளது.

இதேநேரம், தற்போது மழையுடனான காலநிலை குறைந்து வெள்ள நிலைமையும் ஓரளவு குறைந்துவருகின்ற போதிலும் மாவடியோடை அணைக்கட்டு உடைப்பு மற்றும் தொடரும் சீரற்ற காலநிலை காரணமாக மக்கள் இடைத்தங்கல் முகாம்களிலேயே தங்கவைக்கப்பட்டுள்ளனர்.

இடைத்தங்கல் முகாம்களில் உள்ளவர்களுக்கு சமைத்த உணவுகள் வழங்கப்பட்டுவரும் நிலையில் பொது அமைப்புகளினால் பல்வேறு உதவிகள் வழங்கப்பட்டு வருகின்றன.

வடக்கு மாகாண ஆளுநராக, சுகாதார அமைச்சின் செயலராக உள்ள பிஎம்எஸ் சாள்சை நியமிப்பதற்கான கலந்துரையாடல்கள் நடத்தப்பட்டு வருவதாக, சிறிலங்கா அதிபர் கோத்தாபய ராஜபக்ச தெரிவித்துள்ளார்.

அச்சு, இலத்திரனியல் ஊடகங்களின் ஆசிரியர்களுடன் நடத்தப்பட்ட சந்திப்பின் போதே அவர் இந்த தகவலை வெளியிட்டார்.

வடக்கு மாகாணத்துக்கு மாத்திரம் இன்னமும் ஆளுநர் ஒருவர் நியமிக்கப்படாமல் இருப்பது குறித்த கேள்விக்குப் பதிலளித்த அவர்,

‘தமிழ் தேசிய கூட்டமைப்புடன் பணியாற்றுவதில் உள்ள சிரமங்கள் உள்ளிட்ட பல்வேறு காரணங்களை சுட்டிக்காட்டி பலரும், ஆளுநர்  பதவிக்கான வாய்ப்பை நிராகரித்ததால் வடக்கு மாகாணத்திற்கு ஆளுநரை நியமிப்பது ஒரு பிரச்சினையாக மாறியுள்ளது.

தற்போது, சுங்கத் திணைக்கள முன்னாள் பணிப்பாளர், பிஎம்எஸ் சாள்சை நியமிப்பதற்கான கலந்துரையாடல்கள் நடத்தப்பட்டு வருகின்றன.

அவர் இப்போது, சுகாதார அமைச்சின் செயலராக உள்ளார். அவர் இணங்கினால் எமக்கு எந்தப் பிரச்சினையும் இல்லை.

முன்னதாக நாங்கள் முத்தையா முரளிதரனை அணுகிறோம். அவர் அந்த வாய்ப்பை நிராகரித்து விட்டார்” என்றும் அவர் கூறினார்.

இலங்கையில் இந்திய தமிழர் என்று அடிக்கிறர்கள், இங்கே வந்தால் இலங்கை தமிழர்கள் என்று ஒதுக்குகிறார்கள், எங்கே தான் செல்வது நாங்கள். குடியுரிமை இல்லையென்றால் எங்களை கடலில் தள்ளிவிடுங்கள் என கடலூர் அகதிகள் முகாமில் இலங்கை தமிழர்கள் வேதனை தெரிவிக்கின்றனர்.

பாகிஸ்தான், வங்கதேசம் மற்றும் ஆப்கானிஸ்தான் உள்ளிட்ட நாடுகளில் இருந்து இந்தியாவில் குடியேறிய இந்து, சீக்கியர், பௌத்தம், சமணம், பார்சி மற்றும் கிறிஸ்துவ மதத்தினருக்கு குடியுரிமை வழங்குவதற்கான குடியுரிமை சட்டத் திருத்த மசோதாவை மக்களவையில் மத்திய அரசு தாக்கல் செய்தது. மத்திய அரசு குறிப்பிட்ட வெளிநாடுகளில் இருந்து வந்த முஸ்லீம்கள் மற்றும் இலங்கை அகதிகள் ஆகியோர் குடியுரிமை சட்ட திருத்த பட்டியலில் இடம்பெறாதது குறிப்பிடத்தக்கது.

பெரிதும் எதிர்பார்க்கப்பட்ட இந்தியா வாழ் இலங்கை அகதிகளை குடியுரிமை பட்டியலில் சேர்க்காதது குறித்து முகாம்களில் வசிக்கும் இலங்கை தமிழர்களுக்கு பெரும் ஏமாற்றத்தை ஏற்படுத்தியுள்ளது.

குடியுரிமை சட்ட திருத்த மசோதா தங்களுக்கு ஒரு அடையாளத்தை ஏற்படுத்தும் என்று பெரிதும் எதிர்பார்க்கபட்டநிலையில், பட்டியலில் இடம்பெறாமல் இருப்பது தங்களின் எதிர்காலத்தை கேள்விக்குறியாக்கி இருக்கிறது என்று அவர்கள் கவலை கொள்கின்றனர்.

கடலூர் மாவட்டத்தில் நான்கு இலங்கை அகதிகள் முகாம் உள்ளது இந்த முகாம்களில் 400க்கும் மேற்பட்ட குடும்பங்கள் வசித்துவருகின்றனர். இதில் குறிஞ்சிப்பாடி பகுதியில் உள்ள இலங்கை அகதிகள் முகாமில் மட்டும் 169 குடும்பங்கள் என மொத்தம் 525 பேர்கள் வசித்து வருகின்றனர். 1990ஆம் ஆண்டு இந்தியா வந்த இவர்கள் கடந்த 30ஆண்டுகளாக இங்கே வசித்து வருகின்றனர்.

''இரண்டு தலைமுறைகள் தாண்டியும் எங்களுக்கு குடியுரிமை வழங்குவது குறித்து மத்திய அரசு பரிசீலனை செய்யாமல் இருப்பது வேதனை தருகிறது'' என்று கூறுகின்றனர் இங்கே வசிக்கும் இலங்கை அகதிகள்.

குறிஞ்சிப்பாடி இலங்கை அகதிகள் முகாமில் வசிக்கும் குணரத்தினம், குடியுரிமை பட்டியலில் இந்தியா வாழ் இலங்கை தமிழர்கள் இடம் பெறாதது குறித்து கூறும்போது, "1990ல் தமிழ்நாட்டிற்கு அகதிகளாக வந்தோம், நங்கள் வந்து 30 வருடங்கள் ஆகிவிட்டன ஆனால் இதுவரையிலும் அகதிகளாகதான் இருக்கிறோம் இதனால் பெரிதும் மன உளைச்சலுக்கு ஆளாகியிருக்கிறோம். நான் இங்கே வரும்போது எனது வயது 19. இங்கே வந்த பிறகு நான் திருமணமாகி எனது குழந்தை வளர்ந்து இப்போது 25 வயதில் எனது மகன் இருக்கிறான். எங்களது காலம் தான் ஓடிவிட்டது.

ஆனால், எங்களது பிள்ளைகள் இங்கேயே பிறந்து, வளர்ந்து பட்டங்கள் பெற்றும் அவர்களால் சரியான வேலைக்கு போகமுடியாமல், கூலி வேலைகளுக்கு போக வேண்டிய நிலை இருக்கிறது, குடியுரிமை இல்லாததால் அவர்களால் மற்றவர்களை போல அரசாங்க வேலைக்கு போகமுடியாத நிலை ஏற்படுகிறது. ஆகவே அரசானது மற்ற நாடுகளில் இருந்து வந்தவர்களுக்கு குடியுரிமை தருவதாக சொன்னது போல எங்களுக்கும் குடியுரிமை கொடுக்கவேண்டும் என்பதுதான் எங்களின் எதிர்ப்பார்ப்பாக இருக்கிறது," என்கிறார்.

குடியுரிமை குறித்து பேசிய சரோஜாதேவி என்ற பெண், "இலங்கையில் வேதனைகளை தாங்கிக்கொள்ள முடியாமல் தான் நாங்கள் இந்தியா வந்துவிட்டோம். 29வயதில் இங்கே வரும்போது இரண்டு குழந்தைகளுடன் வந்தேன் இப்போது எனது வயது 59 ஆகிவிட்டது.

எனது பிள்ளைகளுக்கு திருமணமாகி பேரக்குழந்தைகளும் இருக்கின்றனர். எங்களுக்கு குடியுரிமை வழங்கினால் என் பிள்ளை மற்றும் பேரப்பிள்ளைகள் எதிர்கால வாழ்க்கை நலமாக இருக்கும். நாங்களும் தமிழர்கள் தான் இலங்கையில் இருந்தால் எங்களை இந்திய தமிழர் என்று அடிக்கிறர்கள், இங்கே வந்தால் இலங்கை தமிழர்கள் என்று ஒதுக்குகின்றனர்.

இதுபோன்ற சூழலில் நாங்கள் எங்கே தான் செல்வது," என கண்ணீர் மல்க தெரிவித்தார்.

அவரை தொடர்ந்து பேசிய 65 வயது உடைய ஸ்ரீரங்கம்மாள் சொல்லும்போது, "எனது தந்தை இங்கே பிறந்தவர், இந்தியா எங்களது தாய்நாடு என்று நம்பி தான் இங்கே வந்திருக்கிறோம். இலங்கை சென்று வாழ்வதற்கு எங்களுக்கென்று எதுவுமில்லை பிறகு எங்களால் அங்கே சென்று எப்படி வாழமுடியும்.

நாங்கள் பள்ளிக்கூடம் சென்றாலும் அகதி, மருத்துவமனை சென்றாலும் அகதி, வேலைகளுக்கு சென்றாலும் அகதி, எங்கே சென்றாலும் எங்களை பயத்தோடு பார்க்கின்றனர். நாங்கள் இந்தியா வம்சாவளியை சேர்ந்தவர்கள் என்பதை எங்களால் நிரூபிக்க முடியும் ஆகவே எங்களுக்கு குடியுரிமை கட்டாயம் வேண்டும் இதற்காக தான் 30 ஆண்டுகால இங்கே காத்திருக்கிறோம் அப்படி எங்களுக்கு குடியுரிமை கொடுக்க முடியாதென்றால் எங்கள் அனைவரையும் கப்பல் மூலமாக கடலில் தள்ளி விட்டுவிடுங்கள்," என்று வேதனையுடன் தெரிவித்தார்.

இந்தியாவில் பிறந்த இலங்கை அகதிகள் முகாமில் வசிக்கும் பொறியியல் படிப்பை முடித்த இளைஞர் கீர்த்திகன்(வயது 25) குடியுரிமை இல்லாமல் தாங்கள் படும் பிரச்சனை குறித்து சொல்லும்போது, "நான் பிறந்தது, வளர்ந்தது எல்லாமே இந்தியா தான், இங்கே நான் ஒரு இந்தியனாக தான் வாழ்ந்து கொண்டிருக்கிறேன்.

ஆனால் இங்கே படிப்பை முடித்த என்னால் படிப்பிற்கு தகுந்த வேலைக்கு செல்ல முடியவில்லை. அப்படியே எதாவது கிடைக்கும் வேலைகளுக்கு சென்றாலும் குறைந்த சம்பளம் மட்டுமே கிடைக்கிறது.

இந்த நிலை மாறவேண்டும் என்று நீண்ட நாட்களாக எதிர்பார்த்துக் கொண்டிருக்கிறேன். குடியுரிமை சட்ட திருத்த மசோதாவில் எங்களுக்கான அடையாளம் கிடைக்கும் என்று பெரிதும் எதிர்ப்பார்த்தோம் ஆனால் எங்களை பட்டியலில் சேர்க்காமல் இருந்தது பெரும் ஏமாற்றம் மற்றும் கஷ்டமாக இருக்கிறது. எங்களை போன்ற இளைஞர்கள் இலங்கை சென்று வாழ வேண்டும் என்ற எண்ணம் எங்களுக்கு ஒருபோதும் தோன்றியதில்லை.

இந்தியாவிலே பிறந்து, இந்த கலாசாரத்தில் ஒத்து வாழ்ந்து கொண்டிருக்கும் எங்களுக்கு, இங்கேயே குடியுரிமை வழங்க மத்திய அரசு ஏற்பாடு செய்யவேண்டும் என கேட்டுக் கொள்கிறோம்" என்று தெரிவித்தார்.

23.11.2019 யேர்மன் தமிழ் கலாச்சார மன்றத்தின் ஒன்றுகூடல் மன்றத் தலைவர் திரு.இக.கிருஷ்ணமூர்த்தி தலமையில் இனிதே நடைபெற்றது. 

 யேர்மன் தமிழ் கலாச்சார மன்றத்தின் 2019 இவ் வருடத்திற்கான  நிறைவு ஒன்றுகூடல் மன்றத் தலைவர் திரு.இக.கிருஷ்ணமூர்த்தி தலமையில் இனிதே நடைபெற்றது.  இவ் ஒன்று கூடலில் மன்ற அங்கத்தவர்கள் மன்ற கலைவகுப்பு மாணவர்கள் ,பெற்றோர்கள், ஆதரவாளர்கள் என பலரும் கலந்து சிறப்பித்தார்கள். 
இவ்வருடம் 2019  மன்றத்தால் நாடத்தப்பட்ட நிகழ்வுகள் மற்றும் சமூகப்பணிகள் பற்றிய  அறிக்கையை தலைவர் மக்களுக்கு எடுத்துக்கூறினார்.  யேர்மன் தமிழ் கலாச்சார மன்றம்  யேர்மனிய மக்கள் மத்தியில் ஒரு நற்பெயரைப்பெற்று விளங்குவதாகவும் பல வேலைத்திட்டங்களை இலகுவாக செய்வதற்கு இது உதவியாக உள்ளதையும் சுட்டிக்காட்டினார். மன்றத்தின் நிர்வாக அங்கத்தவர்களின் பாரிய முயற்சியும் புரிந்துணர்வும் மூன்று வருடங்களில் மன்றத்தின் வளர்ச்சியில் தெரிகிறது என்றார். தொடர்ந்து அடுத்தவருடம் 2020 க்கான திட்டங்கள் பல அடுத்த நிர்வாகசபையில் ஆராயப்பட்டு நடைமுறைக்கு வரும் எனவும் அதற்கான நடவடிக்கைகள் மன்ற நிர்வாகம் எடுத்துவருகிறது. இதற்கு எல்லோரும் ஒத்துழைப்பு வழங்கவேண்டும் என கேட்டுக்கொண்டார்.  
ஒன்றுகூடல் மாலை 16.30.மணிக்கு ஆரம்பித்து இரவு 20.00மணி வரை நடைபெற்றது இதில் மன்றச் செயலாளர் இராசாத் அவர்களின் திருமணவரவேற்பும் மன்ற உறுப்பினர்களால் செய்யப்பட்டது. இரவு விருந்துடன்ஒன்று கூடல்  சிறப்பாக நிறைவு பெற்றது. 

தமிழகத்திலுள்ள தமிழ் அரசியல்வாதிகள் தங்களுடைய சுயநல மற்றும் சந்தர்ப்பவாத அரசியல் தேவைகளுக்காக இலங்கை மக்களை பகடைக்காயாக பயன்படுத்தி வருவதாக மஹிந்த ராஜபக்ஷவின் மகனும், நாடாளுமன்ற உறுப்பினருமான நாமல் ராஜபக்ஷ தெரிவித்துள்ளார்.

இலங்கையின் ஜனாதிபதியாக கோட்டாபய ராஜபக்ஷ தெரிவாகியுள்ள பின்னணியில், தமிழக அரசியல்வாதிகள் வெளியிட்டுள்ள கருத்துக்களுக்கு பதிலளிக்கும் வகையிலேயே நாமல் ராஜபக்ஷ இதனைக் குறிப்பிட்டுள்ளார்.

இது தொடர்பாக தமிழில் அவர் விடுத்த அறிக்கையில், தமிழகத்திலுள்ள சில தமிழ் அரசியல் தலைவர்கள் இலங்கைத் தமிழ் மக்களை பற்றி ஒருபோதும் ஆழமாக சிந்தித்தது இல்லை என அவர் குறிப்பிட்டுள்ளார்.

இலங்கை தமிழ் மக்களின் அடிப்படை தேவைகளை பூர்த்தி செய்யும் வகையில் தமிழக அரசியல் தலைவர்கள் ஆக்கபூர்வமான செயற்பாடுகளை முன்னெடுத்தது கிடையாது எனவும் அவர் தெரிவித்துள்ளார்.

இலங்கையின் ஜனாதிபதியாக கோட்டாபய ராஜபக்ஷ தெரிவு செய்யப்பட்டமைக்கு இந்திய பிரதமர் உள்ளிட்ட பல நாடுகளின் அரச தலைவர்கள் வாழ்த்துக்களை தெரிவித்ததாகவும் அவர் சுட்டிக்காட்டியுள்ளார்.

தமிழகத்தில் தங்களது சுயநல சந்தர்ப்பவாத அரசியலை தக்க வைத்துக் கொள்வதற்காக இலங்கை தமிழ் மக்களை பற்றி அக்கறையுள்ளவர்களாக காட்டி முதலை கண்ணீர் வடிக்கும் மதிமுக பொதுச் செயலாளர் வைகோ, விடுதலை சிறுத்தைகள் கட்சியின் தலைவர் தொல்.திருமாவளவன், பாட்டாளி மக்கள் கட்சித் தலைவர் ராமதாஸ், தமிழர் தேசிய முன்னணி தலைவர் பழ.நெடுமாறன் ஆகியோரின் அறிக்கையை தான் அவதானித்ததாகவும் நாமல் ராஜபக்ஷ கூறியுள்ளார்.

குறித்த தமிழக அரசியல் தலைவர்களின் அறிக்கைகளில் அப்பட்டமான சந்தர்ப்பவாத அரசியலைத் தவிர, அவற்றில் வேறேதும் கிடையாது என அவர் சுட்டிக்காட்டியுள்ளார்.

இலங்கை மக்களை பகடைக்காய்களாக்கும், எம்மக்களிடையே பகையையும், இனவாதத்தையும் தூண்டிவிடும் மூன்றாந்தர அரசியலைத் தவிர, தமிழக அரசியல் தலைவர்கள் வேறென்ன ஆக்கப்பூர்வமான விடயத்தை செய்துள்ளார்கள் என்றும் அவர் கேள்வி எழுப்பியுள்ளார்.

2009ஆம் ஆண்டு யுத்தம் நிறைவடைந்த காலத்தில் மறைந்த முன்னாள் முதலமைச்சர் மு.கருணாநிதியின் கட்சியான திராவிட முன்னேற்ற கழகத்தின் சார்பில் நாடாளுமன்ற குழுவொன்று இலங்கைக்கு விஜயம் செய்ததையும் அவர் தனது அறிக்கையில் நினைவூட்டினார்.

இந்த விஜயத்தின் போது குறித்த குழுவினர் வடக்கு - கிழக்கு பகுதிகளுக்கு சென்று பார்வையிட்டதாகவும், முன்னாள் ஜனாதிபதி மஹிந்த ராஜபக்ஷவுடன் சிநேகப்பூர்வ கலந்துரையாடல்களை நடத்தியதாகவும் அவர் நினைவூட்டியுள்ளார்.

இந்த விஜயத்தில் தொல்.திருமாவளவன் கலந்துக்கொண்டிருந்த அதேவேளை, தமது நிலைப்பாட்டையும் அவர் தெளிவுற அறிந்துக்கொண்டதாக அவர் சுட்டிக்காட்டினார்.

அவ்வாறு தமது நிலைப்பாட்டை அறிந்து தொல்.திருமாவளவன் இன்று இவ்வாறு சந்தர்ப்பாத அறிக்கையை விடுவது அதிர்ச்சியை ஏற்படுத்தியுள்ளதாக நாமல் ராஜபக்ஷ கூறுகின்றார்.

தமது ஜனாதிபதி உட்பட எமது எதிர்கால அரசாங்கமானது அனைத்து சந்தர்ப்பங்களிலும் வெளிப்படைத் தன்மையுடனும், நல்லெண்ணத்துடனும் செயற்படும் என அவர் உறுதியளித்துள்ளார்.

இலங்கையின் நிகழ்கால ஜனாதிபதி மற்றும் அரசாங்கத்தை விமர்சிப்பதை விடுத்து, நடைமுறை அரசியலில் இலங்கை தமிழ் மக்களை பற்றி சிந்திப்பது சாலச் சிறந்தது என நாமல் ராஜபக்ஷ அனைத்து தமிழக அரசியல்வாதிகளிடமும் கேட்டுக்கொண்டுள்ளார்.

ஊடகங்களில் சுயநல, சந்தர்ப்பவாத அறிக்கைகளை மட்டுமே விட்டு பரபரப்பை ஏற்படுத்துவதை விடுத்து, இலங்கை தமிழ் மக்களின் எதிர்கால வாழ்வு சுபிட்சமாக அமைய முடிந்த வரை பொறுப்புடன் செயற்படுவது காலத்தின் கட்டாயம் என தான் தமிழக அரசியல் தலைவர்களிடம் கேட்டுக்கொள்வதாக நாடாளுமன்ற உறுப்பினர் நாமல் ராஜபக்ஷ தெரிவித்துள்ளார்.