WELCOME TO PANNAGAM.COM & PTV

பண்ணாகம் இணையம்

NEWS - 2 

வடக்கு கிழக்கில் கடந்த சில நாட்களாக கொட்டி வரும் கடும் மழையினால் கிளிநொச்சி, முல்லைத்தீவு, அம்பாறை, மட்டக்களப்பு மாவட்டங்கள் கடுமையான வெள்ளப் பாதிப்புகளைச் சந்தித்துள்ளன.

கிளிநொச்சி – இரணைமடுக் குளம் நிரம்பும் நிலையில் அதன் வான்கதவுகள் திறந்து விடப்பட்டுள்ளன. முல்லைத்தீவில் முத்தையன் கட்டுக்குளம் உள்ளிட்ட பல குளங்களின் வான்கதவுகளும் திறந்து விடப்பட்டுள்ளன.

மழை வெள்ளத்தினாலும், குளங்களின் வான்கதவுகள் திறந்து விடப்பட்டுளள்ளதாலும், இரண்டு மாவட்டங்களிலும் பல கிராமங்கள் வெள்ளத்தில் மூழ்கியுள்ளன.

கிளிநொச்சி மாவட்டத்தில் 22 ஆயிரம் பேர் வரை பாதிக்கப்பட்டுள்ளதாக நேற்று மாலை மாவட்ட அனர்த்த முகாமைத்துவ பிரிவு தெரிவித்துள்ளது.

ஆயிரக்கணக்கான மக்கள் இடம்பெயர்ந்து தற்காலிக முகாம்களில் தங்கியுள்ளனர்.

முல்லைத்தீவு மாவட்டத்திலும் பல கிராமங்கள் வெள்ளத்தில் மூழ்கியுள்ளன.இதனால் ஆயிரக்கணக்கான மக்கள் பாதிக்கப்பட்டுள்ளனர்.

வடக்கு மாகாணத்தில் 17,062 குடும்பங்களைச் சேர்ந்த 55,453 பேர் பாதிக்கப்பட்டுள்னர் என்று தகவல்கள் கூறுகின்றன.

அதேவேளை, கிழக்கு மாகாணத்தில் 51,223 குடும்பங்களைச் சேர்ந்த 1,70,709 பேர் பாதிக்கப்பட்டுள்ளனர். அவர்களில் 826 குடும்பங்களைச் சேர்ந்த 2,622 பேர் 20 இடைத்தங்கல் முகாம்களில் தங்க வைக்கப்பட்டுள்ளனர்.

மட்டக்களப்பு மாவட்டத்தில் வெள்ளத்தினால், 9,953 குடும்பங்களைச் சேர்ந்த 33,288 பேரும், அம்பாறை மாவட்டத்தில் 39,849 குடும்பங்களைச் சேர்ந்த 1,32,573 பேரும், திருகோணமலை மாவட்டத்தில் 1421 குடும்பங்கபளைச் சேர்ந்த 4848 பேரும் பாதிக்கப்பட்டுள்ளனர்.

வடக்கு கிழக்கில் உள்ள பெரும்பாலான குளங்கள் நிரம்பி வான்பாய்ந்து கொண்டிருக்கின்றன. இதனால் வெள்ளப்பாதிப்பு அதிகரித்து வருகிறது.

நட்பு நாடு என்ற வகையில் இந்தியாவுடன் தனது அரசாங்கம் பணியாற்றும் என்றும் இந்தியாவின் நலன்களுக்கு பாதகமாக அமையக் கூடிய எந்தவொரு காரியத்தையும் செய்யப் போவதில்லை என்றும்  சிறிலங்கா அதிபர் கோத்தாபய ராஜபக்ச  தெரிவித்துள்ளார்.

சிறிலங்கா அதிபராக பதவியேற்ற பின்னர் முதல் தடவையாக ‘ பாரத்சக்தி ‘ என்ற இணையதள செய்தி சேவையின் பிரதம ஆசிரியர் நிதின் ஏ.கோகலேவுக்கு வழங்கியிருக்கும் விரிவான நேர்காணல் ஒன்றிலேயே அவர்  இவ்வாறு கூறியுள்ளார்.

சிறிலங்கா அதிபரின் விரிவான நேர்காணலில் முக்கியமான அம்சங்கள் :

கேள்வி : பிராந்தியத்தியத்திலுள்ள சகல வல்லாதிக்க நாடுகளுடனும் சம அளவு தூரத்தில் இருக்க போவதாகவும், நடுநிலையாக இருக்க போவதாகவும் அதிபராக வந்தவுடன் நீங்கள் கூறினீர்கள். தேசிய பாதுகாப்பு உங்களுடைய முன்னுரிமைக்குரிய விடயமாக இருக்கிறது. யாருடன் அனுசரித்து நிற்கிறீர்கள் என்பதற்கு முக்கியத்துவம் கொடுக்காமல் தேசிய முன்னுரிமைக்குரிய விடயத்தில் நீங்கள் அக்கறை கொண்டிருக்கிறீர்கள். சிறிலங்காவில் இந்தியாவுக்கும் சீனாவுக்கும் இடையில் ஒரு போட்டி நிலவுகிறது என்பது பற்றி உங்கள் கருத்து என்ன?

பதில் : நாம் ஒரு நடுநிலையான நாடாக இருக்க விரும்புகின்றோம் என்பதை எனது பதவியேற்பு நிகழ்வின் போது கூட குறிப்பிட்டேன். இதற்கு உலகில் உதாரணங்கள் இருக்கின்றன. ஆனால் தற்போதைய புவிசார் அரசியலில் இந்து சமுத்திரம் மிகவும் முக்கியமான ஒரு பங்கை வகிக்கிறது என்பதை எல்லோரும் அறிவீர்கள்.

சிறிலங்கா புவியியல் ரீதியில் கேந்திர முக்கியத்துவம் வாய்ந்த ஒரு அமைவிடயத்தில் இருக்கிறது. சிறிலங்காக்கு கிழக்கிலிருந்து மேற்கிற்கு சகல கடற் பாதைகளும் நெருக்கமாகவே கடந்து செல்கின்றன. இந்த கடல் பாதைகளின் முக்கியத்துவத்தை நீங்கள் அறிவீர்கள்.

குறிப்பாக ஆசிய நாடுகள் அபிவிருத்தியடையும் போது அவற்றின் உற்பத்திகளை உலக நாடுகளுக்கு எடுத்து செல்ல வேண்டியிருக்கிறது. அதே வேளை அபிவிருத்தி அடையும் போது எரிபொருள் தேவைப்படுகிறது. அந்த எரிபொருள் மத்திய கிழக்கிலேயே இன்னமும்இருக்கிறது. அங்கிருந்தே எரிபொருள் வந்தாக வேண்டும். கனிய வளங்கள் ஆபிரிக்காவில் இருக்கின்றன. அவையும்அங்கிருந்து எமக்கு கிடைக்கின்றன. இது மிகவும் முக்கியமானதாகும்.

ஆனால் அந்த கடற் பாதைகள் உலகம் முழுவதற்கும் சுதந்திரமானதாக இருக்க வேண்டும். இக்கடற்பாதைகளை எந்தவொரு நாடும் கட்டுப்படுத்தக் கூடாது.

அதன் காரணத்தினால் தான் நடுநிலை என்பது பற்றி நான் கூறினேன். நாம் ஒரு நாட்டுடன் சேர்ந்து கொண்டு செயற்பட விரும்பவில்லை. சிறிலங்கா ஒரு சிறிய நாடு என்ற வகையில் ஏதாவதொரு நாட்டுடன் இணைந்து செயற்படுவது என்பது பிரச்சினையானது. வல்லரசுகளின் அதிகார சண்டைக்குள் அகப்பட்டுக் கொள்ள நாம் விருமபவில்லை.

அடிப்படையில் நாம் சகல நாடுகளுடனும் சேர்ந்து பணியாற்றவே விரும்புகின்றோம். எந்தவவொரு நாட்டுக்கும் பாதகமாக அமையக் கூடிய எந்தவொரு செயலையும் செய்வதற்கு நாம் விரும்பவில்லை.

இந்தியாவின் அக்கறைகளின் முக்கியத்துவத்தை நாம் விளங்கிக் கொள்கின்றோம். இந்தியாவின் பாதுகாப்புக்கு அச்சுறுத்தலாக அமையக் கூடிய நடவடிக்கைகளில் எம்மால் ஈடுபட முடியாது.

இந்த பிராந்தியத்தில் நாம் இருக்கின்றோம். இங்கு இந்தியாவே பெரிய வல்லரசு. மற்றைய நாடுகளின் கருத்துக்களையும் விளங்கிக் கொண்டு அதன் பிரகாரம் நாம் செயற்பட வேண்டியிருக்கிறது. இன்று சகலரும் விரும்புவதும் சகலருக்கும் முக்கியமாக தேவைப்படுவதும் பொருளாதார அபிவிருத்தியேயாகும்.

அந்த பொருளாதார அபிவிருத்தியை அடைவதற்கு நாம் ஒரு கட்டுப்படுத்தப்பட்ட அல்லது மட்டுப்படுத்தப்பட்ட ஆன்மாவாக இருக்க விரும்புகின்றோம். எமது நாட்டை , எமது தொழிற்துறைகளை எமது வணிகத்தை பாதுகாக்கும் அதே வேளை திறந்த போக்கையும் கடைபிடிக்க வேண்டும்.

உலகின் பொருளாதாரத்தில் ஈடுபாடு காட்டுவதற்கு நாம் தயாராகவே இருக்கின்றோம். அதன் காரணத்தினால் தான் இந்தியா, சிங்கப்பூர், மலேசியா, இந்தோனேசியா, சீனா , ஜப்பான் ஆகிய நாடுகளிடம் இருந்து உதவியைப் பெற விரும்புகின்றோம். இது முக்கியமானதாகும். ஆனால் யதார்த்த நிலைக்கும்  நாம் முகங்கொடுக்க வேண்டியிருக்கிறது.

சீனாவுடனான எமது ஈடுபாட்டை பொறுத்த வரையில் குறிப்பாக மகிந்த ராஜபக்சவின் ஆட்சி காலத்தில் அந்த ஈடுபாடு வெறுமனே வர்த்தக நோக்கத்திலானதாகும். ஆனால் ஆரம்பத்தில் இருந்தே உலக ஆய்வாளர்களும் அவதானிகளும் அந்த மண்டலத்துக்குள் எம்மை வைத்துவிட்டார்கள்.

அம்பாந்தோட்டை துறைமுகத்தைப் பொறுத்தவரையிலும் கூட இந்தியாவை சுற்றி வளைக்கின்ற முத்து மாலையின் ஒரு பகுதியாக அந்த துறைமுகத்தை காண்பிக்க அவர்கள் முயற்சித்தார்கள். ஆனால் எமது திட்டங்களின்படி அது அவ்வாறில்லை. துறைமுகத்தின் கட்டுப்பாட்டை நாம் சீனாவுக்கு ஒருபோதும் கொடுக்க கூடாது.

கேள்வி : ஆம். ஆனாலும் துரதிஷ்டவசமாக முன்னைய அரசாங்கம்  ?

பதில் : முன்னைய அரசாங்கம் 99 வருட குத்தகைக்கு அம்பாந்தோட்டை துறைமுகத்தை சீனாவுக்கு கொடுத்து விட்டது. சீனா எங்களது நல்ல நட்பு நாடு என்ற போதிலும் கூட , எமது அபிவிருத்திக்கு சீனாவின் உதவி தேவை என்ற போதிலும் கூட அது ஒரு தவறு என்று கூறுவதற்கு நான் பயப்படவில்லை. மீண்டும் பேச்சுவார்த்தை நடத்தி எமக்கு உதவ சிறந்ததொரு உடன்படிக்கைக்கு வருமாறு நான் அவர்களிடம் வேண்டுகோள் விடுப்பேன்.

அம்பாந்தோட்டை துறைமுகம் தொடர்பில் செய்து கொள்ளப்பட்ட உடக்படிக்கை குறித்து மக்கள் அதிருப்தி  அடைந்திருக்கிறார்கள். நாம் எதிர்காலத்தை பற்றி சிந்திக்க வேண்டியிருக்கிறது. என்ன நடக்கும் ? முதலீட்டுக்காக ஒரு சிறிய நிலத்தைக் கொடுப்பது வேறு விடயம். வர்த்தக சொத்தையோ அல்லது விடுதியையே அமைக்க அனுமதிப்பது ஒரு பிரச்சினை அல்ல.

ஆனால் கேந்திர முக்கியத்துவம் உடைய ஒரு துறைமுகத்தை அவ்வாறு  கொடுப்பது ஏற்புடையதல்ல. அதன் கட்டுப்பாடு எம்மிடம் இருக்க வேண்டும். நாம் மீண்டும் பேச்சுவார்த்தை நடத்த வேண்டியிருக்கிறது. மிகவும் முக்கியமான ஒரு இடத்தின் கட்டுப்பாட்டை கையளிப்பது ஏற்புடையதல்ல. அதுவே எனது நிலைப்பாடு. இந்தியாவுடன் நெருக்கமாக பணியாற்ற நாம் விரும்புகின்றோம்.

அத்துடன் சீனாவுடன் சேர்ந்து பணியாற்றவும் நாம் விரும்புகின்றோம். இராஜதந்திர உறுவுகளும் பொருளாதார உறவுகளும் எல்ல இடத்திலும் காணப்படுகின்றன. சீனாவுடன் நெருக்கமாக இந்தியா செயற்படுகிறது. இந்தியாவின் முதலீடு சீனாவுக்கு செல்கிறது என்பதை நான் அறிவேன்.

சீனாவின் முதலீடும் இந்தியாவுக்கு வருகிறது. அதே போன்றே நாமும் முதலீடுகளையும் உதவிகளையும் விரும்புகின்றோம். ஆனால் நாம் இராணுவ ரீதியிலோ புவிசார் அரசியல் போட்டா போட்டியிலோ சம்பந்தப்பட்டு; கொள்ள விரும்பவில்லை.

இந்தியா , சிங்கப்பூர், ஜப்பான் , அவுஸ்ரேலியா போன்ற உலக நாடுகளுக்கு நான் ஒரு விடயத்தை சொல்லிக் கொள்ள விரும்புகின்றேன். சீனாவின் ஈடுபாடு குறித்து அந்த நாடுகள் அஞ்சுகின்றன என்பது யாதார்த்தம். ஆனால் உண்மையில் எமது நோக்கம் வர்த்தக ரீதியானதே.

சிறிலங்காவில் வந்து முதலீடு செய்யுமாறு இந்தியா , சிங்கப்பூர், ஜப்பான் ,அவுஸ்ரேலியா ஆகிய நாடுகளை அழைக்கின்றேன். சீனா மாத்திரம் முதலீடு செய்வதற்கு அனுமதிக்காதீர்கள். இந்த நாடுகளின் அராங்கங்கள் அவற்றின் தனியார் நிறுவனங்களை சிறிலங்காவில் வந்து முதலீடு செய்யுமாறு உற்சாகபடுத்த வேண்டும்.

ஒரு நாட்டை முதலீடு செய்ய அனுமதித்து விட்டு மனம் குமுற கூடாது. அதனால் நான் பகிரங்கமாகவே கூறுகின்றேன். சிறிலங்காவில் வந்து இந்த நாடுகள் முதலீடு செய்வதை நான் விரும்புகின்றேன். சிறிலங்கா ஒரு சிறிய நாடு. பெரிய நாடுகளின் போட்டா போட்டிக்குள் அகப்படுவதற்கு நான் விரும்பவில்லை. தயவு செய்து அதை விளங்கிக் கொள்ளுங்கள்.

எம்மீது நெருக்குதல்களை பிரயோகிப்பதை விடுத்து எம்மை கொண்டு எமது பொருளாதார அபிவிருத்திக்கு உதவுகின்ற செயற்பாடுகளில் ஈடுபடுங்கள். பல வழிகள் இருக்கின்றன. பணத்தை மாத்திரம் நான் கூறவில்லை. எமது உற்பத்திகளை நீங்கள் கொள்வனவு செய்யுங்கள்.

எம்மிடம் தேயிலை, கறுவா, மிளகு, தெங்கு ஆகியவை இருக்கின்றன. விவசாயத்துறையில் எமக்கு நீங்கள் உதவ முடியும். கல்வித்துறை இருக்கிறது. உயர் தொழிநுட்ப கம்பனிகள் அதில் முதலீடு செய்யலாம். நிச்சயமாக நான் அதிகாரிகளின் கெடுபிடிகளை இல்லாமல் செய்ய விரும்புகின்றேன்.

நாட்டின் நன்மைக்காக பழைய கட்டங்கள் ஒழுங்கு  விதிகளில் இருக்கக் கூடிய சிக்கல் தன்மையை இல்லாமல் செய்ய நான் விரும்புகின்றேன். முதலீட்டுக்கு வசதியான சூழ்நிலையை நான் உருவாக்குவேன்.

கேள்வி : நீங்கள் கூறிய இந்த விடயங்கள் கவனத்தில் எடுக்கப்பட வேண்டியவை. ஆனால் இவ்வாரம் இந்தியாவுக்கு நீங்கள் செல்லவிருக்கிறீர்கள். அங்கு நீங்கள் இந்திய தவைர்களுடன் பேசக் கூடிய சில விடயங்களை கூறுங்கள் ?

பதில் : ஒரு நட்பு நாடு என்ற வகையில் இந்தியாவுடன் சேர்ந்து பணியாற்றுவோம் என்பதை இந்திய அரசாங்கத்துக்கு மீண்டும் நான் உறுதியாகக் கூறுவேன். இந்தியாவின் பாதுகாப்பு நலன்களுக்கு பாதகமாக அமையக் கூடிய எந்தவொரு காரியத்திலும் நாம் ஈடுபட மாட்டோம்.

பலதுறைகளில் முதலீடுகளை செய்து எமக்கு உதவுமாறு நான் அவர்களிடம் வேண்டுகோள் விடுப்பேன். கல்வித்துறையிலும் தொழிநுட்பட அபிவிருத்தியிலும் எமக்கு உதவுமாறு கேட்பேன். அது முக்கியமானதாகும். தற்போதைய இந்திய அரசாங்கமும் பிரதமர் நரேந்திர மோடியும் அயல் நாடுகளுடனான அணுகுமுறைகளை மாற்றிக் கொண்டிருப்பதாக நான் நினைக்கின்றேன்.

கேள்வி : நீங்கள் இந்தியாவில் பேசுவதற்கு பெருமளவு விடயங்கள் இருக்கின்றன. இந்திய தலைவர்களுடன் சிறப்பான பேச்சுவார்த்தைகளை நடத்துவீர்கள் என்று நம்புகின்றேன். இறுதியாக 2 கேள்விகள். ஒன்று அதிபர் தேர்தலில் மக்கள் வாக்களித்த வாக்களித்த விதம், தமிழர்களும் முஸ்லிம்களும் உங்களுக்கு வாக்களித்திருந்தால் நீங்கள் மகிழச்சியடைந்திருப்பீர்கள் என்றும், எனினும் நீங்கள் தெரிவு செய்யப்பட்டு விட்டீர்கள் என்றும் தெளிவாக குறிப்பிட்டிருந்தீர்கள். முழு நாட்டுக்குமே நீங்கள் அதிபர் என்றும் கூறியிருந்தீர்கள். சிறுபான்மை இனத்தவருடனான நல்லிணக்க செயற்முறைகளை எவ்வாறு முன்னெடுப்பீர்கள் ?

பதில் : அபிவிருத்தியே அதற்கு ஒரே வழி என்பதே எனது நம்பிக்கை. கடந்த பல வருடங்களாக தமிழ் அரசியல் தலைவர்களும் சிங்கள தலைமைகளும் கூட நடைமுறை சாத்தியமற்ற விடயங்களை பேசிக் கொண்டிருந்தார்கள். மக்களை முட்டாள்களாக்குவதற்கே முயற்சித்தார்கள்.

எம்மால் செய்யக் கூடியவற்றின் மீதே நாம் முதலில் கவனம் செலுத்த வேண்டும். இந்த நாட்டில் சிறிலங்காயராக வாழ்வதற்கு ஒவ்வொருவருக்கும் நல்ல சந்தர்ப்பத்தை வழங்க வேண்டும். நல்ல கல்வியை வழங்க வேண்டும். அதற்கும் சிறப்பான வாழ்வைப் பெறுவதற்கு; நல்ல தொழில் வாய்ப்பைப் பெறுவதற்கும் கண்ணியமாக வாழ்வதற்கும் நல்ல வாய்ப்புக்களை கொடுக்க வேண்டும். அதற்கான உகந்த சூழலை நான் உருவாக்குவேன்.

ஏனைய அரசியல் விடங்களை யும் முன்னெடுக்கலாம். அவற்றை பற்றியும் பேசலாம். ஆனால் மக்களின் நல்வாழ்வை அலட்சியம் செய்து அந்த அரசியல் விடயங்களில் மாத்திரம் கவனம் செலுத்த முடியாது. நாட்டையும் அதன் பகுதிகளையும் உட்கட்டமைப்பு அபவிருத்திகளையும் மேம்படுத்துவது முக்கியமானதாகும். எம்மால் முடிந்ததை நாம் செய்தோம்.

அந்த பகுதிகளில் கூடுதல் தொழில் வாய்ப்புக்களை உருவாக்குவதற்கு கல்வியை மேம்படுத்துவதற்கும் தனியார் தொழிற்துறை செயற்பாடுகளை அதிகரிப்பதில் கவனம் செலுத்த வேண்டும். கல்வி என்று நான் குறிப்பிடும் போது பொதுவான கல்வியைக் கூறவில்லை. தொழிற் கல்வியையும் விருத்தி செய்ய வேண்டும்.

நீண்ட காலமாக பாடசாலை செல்வதற்கே வாய்ப்பை பெறாத காடுகளில் சண்டையிட்டுக் கொண்டிருந்தவர்கள் இப்போது அவர்களுக்கு சிலவகையான பயிற்சிகளைக் கொடுத்து அவர்களின் ஆற்றல்களை மேம்படுத்தவும் குறிப்பிட்ட சில தொழில் வாய்ப்புகளை அவர்கள் பெறுவதற்கும் நாம் வகை செய்ய வேண்டும்.இந்த தொழில் வாய்ப்புகளை உருவாக்கிவரும் சமமான தொழில் வாய்ப்புகளை பெருவதற்கும் அந்த பகுதிகளை அபிவிருத்தி செய்வதே எமது கவனத்திற்குறிய விடயங்கள்.

கேள்வி: இறுதி கேள்வி நீங்கள் ஒரு எதேச்சதிகாரி அல்லது சிங்கள இனவாதித் தலைவர் என்பது மேற்கு நாடுகள் உங்களைப்பற்றி ஏற்படுத்திய படிமம். நீங்கள் அதிகாரத்துக்கு வருவதைக் கண்டு முஸ்லிம்கள் அஞ்சினார்கள் அவர்களுக்கு எவ்வாறு நம்பிக்கையூட்டப் போகின்றீர்கள்?

பதில்: நான் நினைக்கிறேன் என்னைப்பற்றி எதேச்சதிகாரி அல்லது சிங்கள இனவெறித் தலைவர் என்று ஏற்படுத்தப்பட்ட படிமம் போர்காலத்தின் போது உருவாக்கப்பட்ட தவறான எண்ணமாகும். 20 வருடங்களாக நான் இராணுவத்தில் இருந்தது உண்மைதான்.

ஒரு இராணுவ அதிகாரி என்ற வகையில் பயங்கரவாதத்திற்கு எதிராக நான் போராடினேன். பிறகு இராணுவத்திலிருந்து ஓய்வுபெற்று வெளிநாடு சென்றேன். சுமார் 12 வருடங்கள் அமெரிக்காவில் வாழ்ந்தேன். பிறகு திரும்பி வந்து பாதுகாப்பு செயலாளராக பணியாற்றினேன்.

ஆனால் அப்போது பாதுகாப்பு செயலாளராக மாத்திரமே மக்கள் என்னை அடையாளம் கண்டனர்.அதன்காரணத்தினால் தான் என்னை ஒரு எதேச்சதிகாரி என்று அவர்கள் நினைக்கிறார் போல.

நான் ஒரு ஒழுக்க கட்டுப்பாட்டை கடைப்பிடிக்கின்ற மனிதன். அதற்காக நான் எந்தவொரு சமூகத்திற்கும் எதிரானவன் என்று அர்த்தப்படாது. நான் ஒரு இன வெறியன் அல்ல என்பதை எனது நடவடிக்கையின் ஊடாக நிரூபித்திருக்கிறேன். சமுதாயத்தில் ஒரு பிரிவினருக்காக மாத்திரம் நான் செயற்படுவதில்லை. அதன் காரணத்தினால்தான் நாட்டை முன்னேற்றும் பணியில் எம்முடன் இணையுமாறு தமிழர்களையும் முஸ்லிம்களையும் அழைத்தேன்.

எதிரணியினர் என்னை ஒரு சர்வாதிகாரி அல்லது எதேச்சதிகாரி என்று காட்டியிருக்கலாம்.ஈனால் நான் அவ்வாறானவனல்ல. எனது நடவடிக்கையில் மக்கள் அதைக் காண்பார்கள். ஆனால் என்னுடன் இணையுமாறு அவர்களிடம் கூற விரும்புகிறேன்.

அதேவேளை வதந்திகளையும் ஊர்கதைகளையும் கேட்டு பிரசாரங்களை செய்ய வேண்டாம் என்று ஊடகங்களை விசேடமாக கேட்டுக் கொள்ள விரும்புகின்றேன்.என்னை விளங்கிக் கொள்ளுங்கள்.

என்னுடன் பேசுங்கள் என்னை சந்தியுங்கள் நான் எவ்வாறு செயற்படுகின்றேன் என்பதை பாருங்கள் .என்னைப்பற்றி சரியான படிமத்தை போடுங்கள். இது ஒரு சிறிய நாடு, வளர்ந்து வருகின்ற நாடு எங்களுக்கு ஆட்கள் உதவவேண்டும். எனது வழியில் தடைகளை போடக்கூடாது. அது எவருக்குமே உதவப்போவதில்லை.

கேள்வி: போரின் இறுதிகட்டத்தில் இடம்பெற்றதாக கூறப்படுகின்ற மனித உரிமைமீறல்கள் குறித்து உங்களது அதிகாரிகள் சிலருக்கு எதிராகவும், சில சந்தர்ப்பங்களில் உங்களுக்கு எதிராகவும் குற்றச்சாட்டுகள் முன்வைக்கப்பட்டிருக்கின்றன.  அதைப்பற்றி என்ன கூறுகின்றீர்கள்?

பதில்:போர் என்பது ஒரு மலர் படுக்கை அல்ல என்பதை புரிந்துக் கொள்ளுங்கள். உள்நாட்டு போராக இருந்தால் என்ன? அமெரிக்கர்களும் பிரிட்டிஷ் காரர்களும் ஈராக்கிற்கு அல்லது ஆப்கானிஸ்தானுக்கு வந்து நடத்துகின்ற போராக இருந்தாலும் இதுவே உண்மை. போர் எங்குமே மென்மை வாய்ந்ததாக இருப்பதில்லை.

ஆனால் சிறிலங்கா ஒரு வறிய நாடு நாம் அதிகாரம் குறைந்தவர்கள். அதனால் எமக்கு எதிரான விடயங்கள் வெளிச்சம் போட்டு காணப்படுகின்றன.அவ்வாறு செய்வது நேர்மையானதல்ல. நாம் ஒரு பௌத்த தேசத்தை சேர்ந்தவர்கள். மிகவும் அமைதியான நாட்டவர்கள். பல ஆயிரம் ஆண்டுகள் வரலாற்றை கொண்டவர்கள். நாம் வளமான ஒரு கலசாரத்தையும் பண்பு விழுமியங்களையும் கொண்டவர்கள்.

கேள்வி : எனவே இங்கு வாழ்வு மிகவும் அமைதியானதாக இருக்கும் என்று கூறுகிறீர்கள் ?

பதில் : ஆம். புலம்பெயர்ந்து வாழும் தமிழ் சமூகத்தவர்களும் பழைய விடயங்களை மறந்து விடுமாறு கேட்டு;க கொள்கின்றேன். கண்டிப்பதனால் எவரும் பயனடைவதில்லை. அதைவிடுத்து எமது நாட்டை அபிவிருத்தி செய்வதற்கு இன, மத, பேதங்களுக்கு அப்பால் எமது நாட்டு மக்களுக்கு உதவுவதற்கு நாம் எல்லோரும் ஒன்று சேர்ந்து பாடுபட வேண்டும்.

சிறுபான்மை இனத்தவர்கள் பெரும்பான்மை இனத்தவர்களின் மனதில் சந்தேகத்தை ஏற்படுத்தக் கூடிய சில குறிப்பிட்ட விடயங்களை செய்யும் போது பெரும்பாண்மை சமூகத்தவரும் தஙடகளது எதிர் வினையைக் காட்டுவார்கள்.

சிறுபான்மை இனத்தவர்களுக்கு சமத்துவமான உரிமைகள் இருக்கின்றன. ஆனால் சில குறிப்பிட்ட காரியங்களை அவர்கள் செய்ய கூடாது. யதார்த்த நிலையை அவர்கள் புரிந்து கொள்ள வேண்டும். முன்னேரிய சமூகங்கள் என்று சொல்லப்படுகின்ற வற்றிலும் கூட அவர்கள் என்னதான் முன்னோக்கி நகர்ந்திருந்தாலும் இத்தகைய பிரச்சினைகள் அங்கும் இருக்கத்தான் செய்கின்றன.

கேள்வி : சமூகங்களுக்கிடையில் எப்போதும் வேறுபாடுகள் இருக்கவே செய்யும் ?

பதில் : நாம் அதை விளங்கி; கொள்ள வேண்டும்.

நன்றி – வீரகேசரி

இந்தியப் பிரதமர்  நரேந்திர மோடியின் அழைப்பை ஏற்று, சிறிலங்கா அதிபர் மைத்திரிபால சிறிசேன எதிர்வரும் 29ஆம் நாள் புதுடெல்லிக்குப் பயணம் மேற்கொள்ளவுள்ளார்.

 திடீர் பயணமாக கொழும்பு வந்த இந்திய வெளிவிவகார அமைச்சர் எஸ்.ஜெய்சங்கர், சிறிலங்காவின் புதிய அதிபர் கோத்தாபய ராஜபக்சவைச் சந்தித்து பேசினார்.

இந்தச் சந்திப்பில் சிறிலங்காவுக்கான இந்திய தூதுவர் தரன்ஜித் சிங் சந்துவும் கலந்து கொண்டார்.

இதன்போது, அவரை புதுடெல்லிக்கு வருமாறு, இந்திய பிரதமரின் சார்பில் நேரில் அழைப்பு விடுத்தார்.

இதனை ஏற்றுக் கொண்டு, வரும் 29ஆம் நாள், கோத்தாபய ராஜபக்ச புதுடெல்லிக்குப் பயணம் மேற்கொள்ளவுள்ளார் என்று இந்திய வெளிவிவகார அமைச்சர் எஸ்.ஜெய்சங்கர் தெரிவித்தார்.

இன்று ஜனாதிபதி தேர்தல் பிரச்சாரங்களின் இறுதி நாள் என்பதால் பேரணிகள் நடைபெறும் பகுதிகளில் பாதுகாப்பை வலுப்படுத்த பாதுகாப்பு படையினர் சிறப்பு ஏற்பாடுகளை செய்துள்ளதாக கூறப்படுகிறது.

விசேடமாக நாளையத்தினம் காலி,மாளிகாவத்தை மற்றும் தர்கா நகர் ஆகிய பிரதேசங்களில் நடைபெறவுள்ள மக்கள் பேரணிகளுக்கு பாதுகாப்பு படையினரால் அதிக கவனம் செலுத்திவருவதாக தகவல் வட்டாரங்கள் தெரிவித்துள்ளன.

காலி மற்றும் மாளிகாவத்தை பிரதேசங்களில் சஜித் பிரேமதாசவின் பிரச்சார பேரணி இடம்பெறவுள்ளதுடன், தர்கா நகரில் அனுரகுமார திஸாநாயக்கவின் பிரச்சார பேரணி நடைபெறவுள்ளது.

வடக்கு, கிழக்கு இணைப்பு சாத்தியமில்லை என்றால் நாடு துண்டாடப்படும் என ஜனாதிபதி வேட்பாளர் எம்.கே.சிவாஜிலிங்கம் தெரிவித்தார்.

கல்முனையில் இன்று (சனிக்கிழமை) முற்பகல் மக்கள் சந்திப்பில் ஈடுபட்ட பின்னர் இடம்பெற்ற செய்தியாளர் சந்திப்பிலேயே அவர் இவ்வாறு குறிப்பிட்டார்.

அவர் அங்கு மேலும் தெரிவிக்கையில், “தற்போதைய ஜனாதிபதி மைத்திரிபால சிறிசேனவை வெற்றிபெற வைத்த தமிழ் பேசும் மக்களுக்கு எதுவும் நடக்கவில்லை. வடக்கு, கிழக்கு இணைப்பு விடயத்தில் முஸ்லிம் மக்கள் தலைமைகள் எம்மை ஏமாற்றி விட்டனர்.

இது தவிர கிழக்கு மாகாணத்தை பிரிப்பதில் தமிழர் சார்பான வழக்காடிய மதியாபரணம் சுமந்திரன் என்பவர் அதை தள்ளுபடி செய்ய முயற்சித்த நிலையில், தற்போது வடக்கு கிழக்கு இணைய வேண்டும் என கூறி வருகின்மை வேதனை தருகிறது.

கூட்டமைப்பு என கூறுபவர்கள் ஜனாதிபதி வேட்பாளர் சஜீத்துக்கு கீழே வேலை செய்கின்றனர். வடக்கு கிழக்கு இணைப்பு சாத்தியமில்லை என்றால் நாடு துண்டாடப்படும் என்பதை பகிரங்கமாக கூற விரும்புகின்றேன்” என மேலும் தெரிவித்தார்.

கொலைகாரக் கலாசாரத்தை நாட்டில் உருவாக்க விடமாட்டேன் என ஜனாதிபதி வேட்பாளர் சஜித் பிரேமதாஸ தெரிவித்துள்ளார்.
புதிய ஜனநாயக முன்னணியின் ஜனாதிபதி வேட்பாளர் சஜித் பிரேமதாஸ கலந்து கொண்ட பொதுக் கூட்டம் நேற்று கம்புருப்பிட்டி நகரில் இடம்பெற்றது.
அங்கு உரையாற்றிய ஜனாதிபதி வேட்பாளர் சஜித் பிரேமதாஸ,
கடந்த காலங்களில் ரத்துபஸ்வல பகுதியில் இடம்பெற்றதைப் போன்று, தண்ணீர் கேட்டு போராடும் போது நாங்கள் துப்பாக்கிச்சூடு நடத்த மாட்டோம்.
எரிபொருள் மானியம் கேட்கும் போது கொலை செய்யமாட்டோம். ஊழியர் சேமலாப நிதிக்காக மக்கள் வீதியில் இறங்கி போராடும் போது நாங்கள் கொலைகார கலா சாரத்தை உருவாக்குவதில்லை.
இளைய சமூகத்தை நாங்கள் பாதுகாப்போம். மகளிர் படையணியை பாதுகாப்போம். இந்த நாட்டின் பாதுகாப்பை உறுதி செய்வதாக எனது எதிரணியினர் கூறுகின்றனர்.
எவ்வாறு பாதுகாப்பான நாட்டை உருவாக்க முடியும் என்பதை நான் கேட்க விரும்புகின்றேன்.
ஆட்சியில் இருக்கும்போது இந்த மாவட்டத்தில், பிரதேச சபை தலைவர் ஒருவர் பெண்களை துஷ்பிரயோகத்திற்கு உட்படுத்தினார்.
100ஆவது துஷ்பிரயோகத்தை அவர்களின் வீட்டில் மேற்கொண்ட போது எனது எதிராளி பாதுகாப்பு செயலாளராக எங்கு இருந்தார் என்பதை நான் கேட்க விரும்புகிறேன் என குறிப்பிட்டார்.                

எதிர்வரும் நவம்பர் 16 ஆம் திகதி இலனக்கையின் 8 வது ஜனாதிபதி தேர்தல் இடம்பெறவுள்ளது.

அந்தவகையில் 2020 இல் நாட்டை ஆளப்போகும் ஜனாதிபதி யார் என்கின்ற எதிர்பார்ப்பில் இலங்கை மக்கள் மட்டுமன்றி சர்வதேசமும் ஆவலுடன் எதிர்பார்த்துகொண்டிருக்கின்றது.

இம்முறை இலங்கை வரலாற்றில் முதல்முறையாக அதிகளவான வேட்பாளர்கள் ஜனாதிபதி தேர்தலில் களமிறங்கியுள்ளனர்.

அதிலும் மிக முக்கிய வேட்பாளர்களாக சஜித், கோத்தபாய மற்றும் அனுர குமார ஆகியோர் பேசப்படுபவர்களாக உள்ளனர்.

இந்த நிலையில் இலங்கையின் பிரபல ஜோதிடர் சுஜித் நிஷாந்தா அவர்கள் சஜித்தே ஜனாதிபதி தேர்தலில் வெற்றி பெறுவார் என கூறியுள்ளார்.

இதேவேளை குறித்த ஜோதிடர் கடந்த ஜனாதிபதி தேர்தலின்போதும் ஜனாதிபதி மைத்திரிபால சிறிசேனவே வருவார் என கூறியிருந்த நிலையில் மைத்திரிபால சிறிசேனவே அரசதலைவராக மக்களால் தேர்ந்தெடுக்கப்பட்டிருந்தார்.

சிறிலங்காவின் எட்டாவது அதிபர் தேர்தலில் போட்டியிடும் 35 வேட்பாளர்களின் இறுதிப் பட்டியல் தேர்தல்கள் ஆணைக்குழுவின் தலைவர் மகிந்த தேசப்பிரியவினால் சற்று முன்னர் வெளியிடப்பட்டுள்ளது.


கட்டுப்பணம் செலுத்திய ஆறு வேட்பாளர்கள் போட்டியில் இருந்து விலகியுள்ள நிலையில், 35 வேட்பாளர்கள் போட்டியிடுகின்றனர்.

கட்டுப்பணம் செலுத்திய வேட்பாளர்களில், ஆறு பேர் வேட்புமனுக்களைத் தாக்கல் செய்யவில்லை.

  1. சமல் ராஜபக்ச
  2. குமார் வெல்கம,
  3. திஸ்ஸ குட்டியாராச்சி
  4. ஜயந்த லியனகே,
  5. மஹிபால ஹேரத்
  6. பஷீர் சேகு தாவூத்  ஆகியோரே போட்டியில் இருந்து விலகியவர்கள் ஆவர் .

அதேவேளை, அதிபர் தேர்தலில் போட்டியிடும் 35 வேட்பாளர்களின் இறுதிப் பட்டியலில் இடம்பெற்றுள்ளோர் வருமாறு-

  1. சஜித் பிரேமதாச – ஐக்கிய தேசியக் கட்சி
  2. கோத்தாபய ராஜபக்ச – சிறிலங்கா பொதுஜன பெரமுன
  3. அனுரகுமார திசநாயக்க – தேசிய மக்கள் சக்தி
  4. றொகான் பல்லேவத்த – ஜாதிக சங்வர்த்தன பெரமுன
  5. மில்றோய் பெர்னான்டோ – சுயேட்சை
  6. ஜெனரல் மகேஸ் சேனநாயக்க – தேசிய மக்கள் இயக்கம்
  7. சிறிபால அமரசிங்க – சுயேட்சை
  8. சரத் மனமேந்திர – நவ சிங்கள உறுமய
  9. சமரவீர வீரவன்னி – சுயேட்சை
  10. சமன் பிரசன்ன பெரேரா – எமது மக்கள் சக்தி கட்சி
  11. அனுருத்த பொல்கம்பொல – சுயேட்சை
  12. ஏஎஸ்பி லியனகே – சிறிலங்கா தொழிலாளர் கட்சி
  13. ஜயந்த கேதாகொட – சுயேட்சை
  14. துமிந்த நாகமுவ – முன்னிலை சோசலிசக் கட்சி
  15. அஜந்தா பெரெரா – சிறிலங்கா சோசலிச கட்சி
  16. சமன்சிறி ஹேரத் – சுயேட்சை
  17. அசோக வடிகமங்காவ – சுயேட்சை
  18. ஆரியவன்ச திசநாயக்க – ஜனநாயக ஐக்கிய தேசிய முன்னணி
  19. வஜிரபானி விஜேசிறிவர்த்தன – சோசலிச சமத்துவக் கட்சி
  20. பத்தேகமகே நந்திமித்ர – நவ சம சமாஜ கட்சி
  21. வண. அபரகே புண்ணானந்த தேரர் – சுயேட்சை
  22. பியசிறி விஜேநாயக்க – சுயேட்சை
  23. அனுர டி சொய்சா- ஜனநாயக தேசிய இயக்கம்
  24. ரஜீவ விஜேசிங்க – சுயேட்சை
  25. வண. பத்தரமுல்லே சீலாரத்ன தேரர் – ஜனசத பெரமுன
  26. இலியாஸ் இத்ரூஸ் முகமட்- சுயேட்சை
  27. அஜந்த டி சொய்சா – ருகுணு மக்கள் முன்னணி
  28. விஜித குமார கீர்த்திரத்ன – சுயேட்சை
  29. எம்.கே.சிவாஜிலிங்கம் – சுயேட்சை
  30. எம்எல்ஏஎம். ஹிஸ்புல்லா – சுயேட்சை
  31. பிரியந்த எதிரிசிங்க – ஒக்கம வசியோ ஒக்கம ரஜவரு சவிதானய
  32. நாமல் ராஜபக்ச – தேசியங்களின் ஒற்றுமை இயக்கம்
  33. அகமட் ஹசன் முகமட் அலவி – சுயேட்சை
  34. சிறிதுங்க ஜயசூரிய – ஐக்கிய சோசலிச கட்சி
  35. சுப்ரமணியம் குணரத்தினம் – எமது தேசிய முன்னணி

சிறிலங்கா அதிபர் தேர்தலில் போட்டியிடுவதற்கு 41 வேட்பாளர்கள் கட்டுப்பணம் செலுத்தியுள்ளனர் என்று தேர்தல்கள் ஆணைக்குழு தகவல் வெளியிட்டுள்ளது.

நொவம்பர் 16ஆம் நாள் நடக்கவுள்ள அதிபர் தேர்தலுக்கான வேட்புமனுத் தாக்கல் இன்று நண்பகல் 12 மணியுடன் முடிவடைந்தது.

ஏற்கனவே 33 வேட்பாளர்கள் சார்பில் கட்டுப்பணம் செலுத்தப்பட்டிருந்த நிலையில், இன்று மேலும் 14 வேட்பாளர்கள் சார்பில் கட்டுப்பணம் செலுத்தப்பட்டது.

இதையடுத்து, கட்டுப்பணம் செலுத்தப்பட்டுள்ள வேட்பாளர்களின் எண்ணிக்கை 41 ஆக அதிகரித்துள்ளது.

நாளை காலை 9 மணி தொடக்கம் 11 மணிவரை வேட்புமனுத் தாக்கல் இடம்பெறவுள்ளது.

o edit text

அடுத்தமாதம் நடைபெறவுள்ள சிறிலங்கா அதிபர் தேர்தலில் போட்டியிடுவதற்காக ரெலோவின் தவிசாளரும், முன்னாள் நாடாளுமன்ற உறுப்பினருமான எம்.கே.சிவாஜிலிங்கமும் இன்று கட்டுப்பணம் செலுத்தினர்.

சிவாஜிலிங்கத்தின் சார்பில், அவருடன் சென்ற வடக்கு மாகாணசபையின் முன்னாள் அமைச்சர் அனந்தி சசிதரன், தேர்தல்கள் செயலகத்தில் கட்டுப்பணத்தை செலுத்தியுள்ளார்.

தமிழ் தேசிய மறுமலர்ச்சி சக்தியின் சார்பில் தாம் நாளை வேட்புமனு தாக்கல் செய்யவுள்ளதாக தெரிவித்த சிவாஜிலிங்கம், தமிழ் மக்களின் விருப்பத்தின் பேரில், தாயகத்திலும், புலம்பெயர்ந்தும் வாழுகின்ற மக்களின் கோரிக்கையை ஏற்றே இந்த தேர்தலில் போட்டியிடவுள்ளதாகவும்  கூறியுள்ளார்.

தேர்தலில் போட்டியிடுவதற்காக ரெலோவின் தவிசாளர் உள்ளிட்ட கட்சிப் பதவிகளில் இருந்து விலகிக் கொள்வதற்கான கடிதத்தை தாம், செயலாளர் சிறிகாந்தாவுக்கு அனுப்பியிருப்பதாகவும் சிவாஜிலிங்கம் தெரிவித்துள்ளார்.

வரும் அதிபர் தேர்தலில் ஐக்கிய தேசியக் கட்சியின் வேட்பாளர் சஜித் பிரேமதாச தமது தரப்புக்கு சவாலாக இருக்கமாட்டார் என்று பொதுஜன பெரமுனவின் தலைவர் மகிந்த ராஜபக்ச தெரிவித்துள்ளார்.

கொழும்பில் நேற்று செய்தியாளர்கள் எழுப்பிய கேள்விக்குப் பதிலளித்த போது அவர் இவ்வாறு கூறினார்.

“சஜித் பிரேமதாசவை வேட்பாளராக ஐதேக அறிவித்திருப்பது மகிழ்ச்சி அளிக்கிறது. அவர் எமக்கு சவாலே அல்ல.  சஜித் போட்டியிட வேண்டும் என்பது தான் எனது கருத்தாக இருந்தது.

அம்பாந்தோட்டையில் தனது சொந்த தொகுதியான திஸ்ஸமகராமவில் கூட வெற்றியைப் பெற முடியாதவர் எவ்வாறு முழு நாட்டிலும் வெற்றியைப் பெற முடியும்?

அவருக்கு ஐதேக யானைச் சின்னத்தைக் கூட கொடுக்கவில்லை. சரத் பொன்சேகாவும், ஜனாதிபதி மைத்திரிபால சிறிசேனவும் போட்டியிட்ட அன்னம் சின்னத்திலேயே அவர் போட்டியிடப் போகிறார். அவர்கள் ஐதேகவினர் அல்ல. எனவே அது சரியானது.

ஆனால் சஜித் ஐதேகவின் பிரதித் தலைவர். அவருக்கு யானைச் சின்னம் வழங்கப்பட்டிருக்க வேண்டும்.

கோத்தாபய ராஜபக்ச ஜனாதிபதியாகத் தெரிவு செய்யப்பட்டால், பிரதமராக யார் நியமிக்கப்படுவார் என்பதை பொறுத்திருந்து பாருங்கள்” என்றும் அவர் கூறினார்.

அதிபர் தேர்தலில் சிறிலங்காவின் முன்னாள் இராணுவத் தளபதி ஜெனரல் மகேஸ் சேனநாயக்கவை வேட்பாளராக களமிறக்குவதற்கு திட்டமிட்டுள்ளதாக,  தேசிய மக்கள் இயக்கம் தெரிவித்துள்ளது.

நாட்டுக்கு தலைமைத்துவம் வழங்கக் கூடிய ஒரு வேட்பாளர் குறித்தும்,  அரசியல்வாதி அல்லாத ஒரு வேட்பாளரை நிறுத்துவதன் நன்மை தீமைகள் குறித்தும் தேசிய மக்கள் இயக்கம் விரிவான கலந்துரையாடல்களை நடத்தியுள்ளது.

அதிபர் தேர்தலில் போட்டியிடுவது குறித்து ஜெனரல் மகேஸ் சேனநாயக்கவிடம் கேட்டபோது, அவ்வாறான முடிவை தான் எடுக்கவில்லை என்று தெரிவித்துள்ளார்.

“நேரம் தான் எல்லாவற்றையும் தீர்மானிக்கும். நாட்டின் அரசியல் முறையில் மாற்றம் இருக்க வேண்டும். இந்த சிக்கலை தீர்க்க உதவ நான் தயாராக இருக்கிறேன். இருப்பினும், தேர்தலில் போட்டியிட நான் இதுவரை எந்த முடிவும் எடுக்கவில்லை என்று அவர் கூறியுள்ளார்.

நாட்டின் அரசியல் சூழலில் மாற்றத்தை ஏற்படுத்தும் நோக்கில் செயற்படும் புலமையாளர்களைக் கொண்ட தேசிய மக்கள் இயக்கம், முன்னதாக, முன்னாள் சட்டமா அதிபர் காமினி விஜேசிங்கவை அதிபர் வேட்பாளராக களமிறக்கத் திட்டமிட்டுள்ளதாக தகவல்கள் வெளியாகியிருந்தன.

edit text

நாசகார செயல்களை செய்யும் கொலைகாரக் கூட்டத்திற்கு சரியான பதிலடியை மக்கள் வழங்க வேண்டும் என அமைச்சர் சஜித் பிரேமதாச கேட்டுக்கொண்டுள்ளார். 

எனவே, வரும் நவம்பர் மாதத்தில் இந்த நாட்டை நடத்திச் செல்லக்கூடிய ஒருவரை தெரிவு செய்யக் கூடிய சந்தர்ப்பம் மக்களை நாடி வருகின்றது எனக் குறிப்பிட்டுள்ள அவர், இதன்மூலம் மக்கள் சரியான முடிவை எடுக்க வேண்டும் எனத் தெரிவித்தார்.

மட்டக்களப்பில் வீட்டுத்திட்ட கிராமங்களை மக்களிடம் கையளிக்கும் நிகழ்வில் நேற்று ஞாயிற்றுக் கிழமை கலந்துகொண்டு உரையாற்றும் போதே அவர் இவ்வாறு குறிப்பிட்டார்.

அவர் தெரிவிக்கையில், இந்த நாட்டிலே கட்டவிழ்த்து விடப்பட்டிருக்கின்ற காட்டுமிராண்டித்தனங்கள், அத்துமீறல்கள், ஏழைகள் மீது தொடுக்கப்பட்டிருக்கின்ற பிழை யான செயற்பாடுகளை நாங்கள் கண்டறிந்தோம்.

அந்தவகையில் தான் இவ்வாறான மக்களின் நிகழ்ச்சிகளை நடத்துவதற்கு அலங்கரிக்கப்பட்டிருந்த பதாகைகளை கிழித்தெறிந்திருக்கின்றார்கள். ஆனால் தாங்கள் வந்தால் தேசிய பாதுகாப்பைத் தருவோம் என்கின்றார்கள். 

எனது முகத்தினை அவர்கள் கிழித்தெறியலாம். ஆனால் எனது செயற்பாடுகளை முடக்க முடியாது.

இவ்வாறான செயற்பாடுகளில் ஈடுபடுகின்றவர்கள் கடந்த காலங்களில் இப்பகுதியில் மக்களுக்கு இடையூறாக கூலிப்படையாக செயற்பட்ட கொலைகாரக் கூட்டமாகும்.

இந்த கொலைகாரக்கூட்டம் அனைத்து பாகங்களிலும் காணப்படுகின்றனர். அவர்களால் நாசகரமான செயல்களை மாத்திரம் செய்ய முடியுமே தவிர நல்லசெயல்களை செய்ய முடியாது.

எதிர்வரும் நவம்பர் மாதத்தில் இந்த நாட்டை நடத்திச் செல்லக் கூடிய ஒருவரை தெரிவு செய்யக் கூடிய சந்தர்ப்பம் மக்களாகிய உங்களை நாடிவருகின்றது. 

இதன் மூலம் நீங்கள் சரியான முடிவை எடுக்கும்போது நாங்கள் சரியான முடிவை வழங்க இருக்கின்றோம் என்று தெரிவித்தார்.