WELCOME TO PANNAGAM.COM & PTV

அரசியல் கைதிகளின் விடுதலை தொடர்பாக, எதிர்வரும் 17ஆம் திகதி தீர்க்கமான முடிவு ஒன்றை தெரிவிப்பதாக, சிறிலங்கா அதிபர் மைத்திரிபால சிறிசேன, நேற்று எதிர்க்கட்சித் தலைவரும், தமிழ்த் தேசியக் கூட்டமைப்பின் தலைவருமான இரா.சம்பந்தனிடம் உறுதியளித்துள்ளார்.

நாடாளுமன்றத்தில் நேற்று சிறிலங்கா அதிபர் மைத்திரிபால சிறிசேனவை, எதிர்க்கட்சித் தலைவரும், தமிழ்த் தேசியக் கூட்டமைப்பின் தலைவருமான இரா.சம்பந்தன் மற்றும் நாடாளுமன்ற உறுப்பினர் எம்.ஏ.சுமந்திரன் ஆகியோர் சந்தித்துப் பேச்சு நடத்தினர்.

இதன்போது, அரசியல் கைதிகளின் விடுதலை தொடர்பாக, சிறிலங்கா பிரதமர், நீதியமைச்சர், சட்டமா அதிபர் ஆகியோருடன் இதுவரை நடத்தப்பட்ட பேச்சுக்களில் எந்த முடிவும் எடுக்கப்படாமை குறித்து சுட்டிக்காட்டிய அவர்கள், இந்த விவகாரத்துக்கு அரசியல் ரீதியான தீர்மானம் ஒன்றை எடுக்க வலியுறுத்தினர்.

அரசியல் கைதிகள் 10 ஆண்டுகளை சிறையில் கழித்துள்ள நிலையில், அவர்களை விடுதலை செய்வதற்கான அரசியல் தீர்மானத்தை எடுக்க வேண்டும் என்றும் சிறிலங்கா அதிபரிடம் கோரினர்.

இதன்போது கருத்து வெளியிட்ட சிறிலங்கா அதிபர், எதிர்வரும் 17ஆம் நாள் நாடாளுமன்றத்தில் பாதுகாப்பு அமைச்சின் ஆலோசனைக் கூட்டம் முடிந்த பின்னர், இதுகுறித்து பேச்சு நடத்தி தீர்வு ஒன்றை எட்டலாம் என்று உறுதியளித்துள்ளார்.

இதையடுத்து, உண்ணாவிரதப் போராட்டத்தில் ஈடுபட்டுள்ள அரசியல் கைதிகளை தொடர்பு கொண்டு, சிறிலங்கா அதிபரின்  உறுதிமொழியை தெரிவித்துள்ள நாடாளுமன்ற உறுப்பினர்  சுமந்திரன், போராட்டத்தைக் கைவிடுமாறும், கோரியுள்ளார்.

A320 ரக விமானங்களைத் தரையிறக்கும் வகையில் விமான ஓடுதளத்தை புனரமைக்கும் பணிகளை முன்னெடுப்பதற்கு தேவையான நிதியை வழங்க சிவில் விமான சேவை அதிகாரசபை மற்றும் அபிவிருத்தி சபை என்பன இணங்கியுள்ளதாக தெரிவிக்கப்பட்டுள்ளது.

அந்தவகையில் பலாலி விமான நிலைய அபிவிருத்தி நடவடிக்கைகளை எந்தவொரு வெளிநாட்டிற்கும் வழங்கப்போவதில்லை என போக்குவரத்து மற்றும் சிவில் விமான சேவைகள் அமைச்சர் நிமல் சிறிபால டி சில்வா தெரிவித்தார்.

A320 ரக விமானங்களைத் தரையிறக்கும் வகையில் விமான ஓடுதளத்தை புனரமைக்கும் பணிகளை முன்னெடுப்பதற்கு தேவையான நிதியை வழங்க சிவில் விமான சேவை அதிகாரசபை மற்றும் அபிவிருத்தி சபை என்பன இணங்கியுள்ளதாகவும் அவர் கூறினார்.

நேற்று இடம்பெற்ற கலந்துரையாடல் ஒன்றின் போதே அவர் இதனை குறிப்பிட்டுள்ளார். குறித்த விடயம் தொடர்பில் தொடர்ந்தும் பேசிய அவர், “இது தொடர்பில் கள ஆய்வுகளை மேற்கொள்ளாது புனரமைப்புப் பணிகள் ஆரம்பிக்கப்பட்டுள்ளது. இந்த விடயம் தொடர்பில் போக்குவரத்து மற்றும் சிவில் விமான சேவைகள் அமைச்சும் சுற்றுலாத்துறை அமைச்சும் இணைந்து அமைச்சரவைக்கு அறிவித்துள்ளதாகவும் அமைச்சர் நிமல் சிறிபால டி சில்வா இந்த கலந்துரையாடலின் போது தெரிவித்தார்.

இதேவேளை, பலாலி விமான நிலையத்தின் அபிவிருத்தி பணிகளை இந்தியாவிற்கு வழங்குவதற்கு நடவடிக்கை எடுக்கப்பட்டுள்ளதாக அரசாங்கத்திற்கு எதிராக குற்றம் சுமத்தப்பட்டிருந்தது.

உலகத் தமிழ் நாடக விழாவில் 12 நாடுகளில் இருந்து  14 நாடகங்கள் பங்கேற்க உள்ளனர் . 

பிரான்ஸ் தமிழர் கலை கலாசார ஒன்றியம் அறிவிப்பு. 

யாழ்.தர்மினி பத்மநாதன் .

பிரான்ஸ் தமிழர் கலை கலாசார ஒன்றியம்   ''உடல்''  சஞ்சிகையின் அனுசரணையில் பிரான்ஸ் தமிழர் கலை கலாசார ஒன்றியத்தின்தலைவர் எம் .அரியநாயகம் தலைமையில் எதிர்வரும்  ஐப்பசி  மாதம் 6 ஆம் , 7 ஆம் திகதிகளில் உலகத்த தமிழ் நாடக விழா லண்டனில் ஏற்பாடுசெய்யப்பட்டுள்ளது  12 நாடுகளில் இருந்து  14 நாடகங்கள் பங்கேற்க உள்ளன என   . பிரான்ஸ் தமிழர் கலைகலாசார ஒன்றியம் அறிவித்துள்ளதாக இலங்கைக்கான ஒழுங்கமைப்பாளர் யாழ்.தர்மினி பத்மநாதன் தெரிவித்துள்ளார். 

உலகத்த தமிழ் நாடக விழா குறித்து இன்று [28.07.2018 ] காலை யாழ்ப்பாணம் ஊடக அமையத்தில் இடம்பெற்ற ஊடகவியலாளர்களின்சந்திப்பின் போதே அவர் இதனைத் தெரிவித்தார். இது குறித்து அவர் மேலும் தெரிவிக்கையில் , 

பிரான்ஸ் தமிழர் கலை கலாசார ஒன்றியம்   ''உடல்''  சஞ்சிகையின் அனுசரணையில் எதிர்வரும் புரட்டாதி மாதம் 6 ஆம் , 7 ஆம்திகதிகளில் உலகத்த தமிழ் நாடக விழாவினை லண்டனில் திடடமிட்டுள்ளனர்.   நாடக விழாவில் கடந்த 2016 ஐ விட விட இம்முறை மிக புகழ் பெற்ற பல நாடுகளிலும் அறியப்பட்ட நாடக ஆசிரியர்கள் பங்கு கொள்ள உள்ளனர்.  

குறிப்பாக கடந்த முறை சிறப்பு விருந்தினராக அழைக்கப் பட் ட நடிகர் நாசர் இம்முறை ஆற்றுகையாளராக பங்குகொள்ளும் ஓராள் அரங்கு மிக விசேடமாக இடம் பெற உள்ளது . யாழ்ப்பாணப் பல் கலைக்கழக முன்னாள்துறைத்தலைவர் கலாநிதி சிதம்பரநாதனின் ஆற்றுகை அவரின் குழுவினர் பங்கு கொள்கின்றனர். மட்டக்களப்பில் இருந்து விமல் ராஜ அழகய்யாவின் ஆற்றுகையும் அரங்கேற உள்ளது . இவர்கள் இலங்கையில் இருந்து இவ்விரு குழுவினரும் செல்லஉள்ளனர். செல்லவுள்ளனர். 

. தமிழ் நாட்டில் இருந்து முனைவர் பார்த்திபராஜா வின் நாடகம், . பாண்டிச்சேரி பல்கலைக் கழக நாடகத்துறை கருஞ்சுழி ஆறுமுகம் . மற்றும் கோபி ஆகியோரினதும் நாடகங்கள். . சிங்கப்பூரில் இருந்து பல்வேறு ஆளுமை கொண்ட ஆனந்தக்கண்ணனின் நாடகம் . யூ .எஸ்.ஏ யிலிருந்து நம் கலை அமைப்பின் ஊடாக கஜேந்திரகுமாரின் ஆற்றுகை லண்டனிலிருந்து சாம் பிரதீபனும் , எழுச்சி மிக்கநாடகங்களை தரும் புலவர் நல்லதம்பி சிவானந்தனின் நாடகம் , ஜெர்மனியில் இருந்து ராதா சர்மாவின் நாட்டிய நாடகம் ,  யேர்மனியில்இருந்து தானாச் சேர்ந்த கூட்டம் மாணவர்களின் பு திய முயற்சியாக ஒரு நாடகம் , டென்மார்க்கிலிருந்து சிவகலையின் நாடகம் ,பிரான்சிலிருந்து ஜெ .எஸ் சேகரின் நாடகம் என்பன அரங்கேற உள்ளன .  12 நாடுகளில் இருந்து  14 நாடகங்கள். அரங்கேற உள்ளன.  

பிரான்ஸ் தமிழர் கலை கலாசார ஒன்றியமானது கடந்த 18 வருடங்களாக பிரான்ஸ் நாட்டில் பதிவு செய்யப்பட்ட சங்கமாக பாரியபடைப்புக்களை .பாரீஸ் , ஜேர்மன் , லண்டன் ஆகிய நாடுகளிலும் பல நாடகங்களை மேடையேற்றியதுடன் . கூத்திசை குறுந்தகடுகள்என்பவற்றையும் வெளியிட்டு உள்ளனர்.

பிரான்ஸ் தமிழர் கலை கலாசார ஒன்றியமும் அரங்கை வலுப்படுத்த வேண்டும் அரங்காளர்களை கௌரவிக்க வேண்டும் அவர்களைஒருங்கிணைக்க வேண்டும் . ஒருங்கிணைப்பதன் மூலம் தான்  , சமூக அரசியல் பொருளாதார விடுதலைக்கான களங்களை களைஉருவாக்க முடியும் என்ற நோக்கத்தில்  '' உடல் ''என்ற நாடக சஞ்சிகையினை கடந்த 18 ஆண்டுகளாக உருவாக்கியது டன் நாடகவிழாவினையும் நடாத்தஆரம்பித்தது. . . 

உடல் சஞ்சிகையானது  ''ஒரு தேசிய இனத்தின் அடையாளத்தை அதன் மரபு சார்ந்த கலை களின் வரலாற்றை நிர்ணயிக்கிறது அதுவேமனித சமூகத்தின் வரலாறும் ஆகின்றது ''  என்ற விருது வாக்கியத்துடன் உலகளாவிய இரீதியில் அரங்காளர்களிடம் போய்ச்சேர்ந்துதான் காரணமாக , அரங்காளர்களிடமும் ஆற்றுகையாளர்களிடமும் ஆர்வலர்களிடம் இருந்தும் அதற்கான பாராட்டும் வந்துகுவியத் தொடங்கின . அதனூடாக உலகளாவிய ரீதியில் அரங்காளர்களின் தொடர்பு வந்து சேர்ந்தன . . .உடல் சஞ்சிகை எழுத்து வடிவுடன்மட்டுமன்றி செயல் வடிவிலும் செய்வதற்கான நோக்கம் எழுந்தது. 

காரணம் இன்றைய புலம் பெயர்ந்து வாழுகின்ற அரங்காளர்களை நாங்கள் ஒருங்கிணைக்க வேண்டும் . அதன் மூலம் தமிழ் நாடகக் கலைகளின் தரத்தை உலகளாவிய ரீதியில் உயர்த்தலாம் , எமது கலைகளை வேராக எமது இளம் தலை முறையினரிடம் கையளிக்கவேண்டும் அவர்கள் அதை கண்டு களிக்கவும் , உள் வாங்கவும் வேண்டும் .வளர்ந்து வரும் எமது இளம் சமுதாயம் , இளம் தலைமுறைகள்எமது கலைகளின் தொன்மையை வேராகக் கண்டு ஏனைய இனத்தவர்களும் தெரிந்து கொள்ள தமிழினத்தின் தொன்மையை தமிழககலைகளின் தொன்மையை தெரிந்து கொள்ள வேண்டும் .  

அத்துடன் புலம்பெயர்ந்து வாழும் மக்கள் மத்தியில் நாடகக் கலையை வளர்ப்பதற்கான தேடலை வளர்க்க உந்து சக்தியாக இருக்கவேண்டும் என்ற எண்ணம் .அத்துடன்  . . பிரான்ஸ் ஜெர்மனி நாட்டு கலைகளை எமது பிள்ளைகள் தேடிக் கற்றுக் கொள்ள வேண்டும் .அப்படி கற்றுக் கொள்வதால் அவர்கள் மத்தியில் எமது கலைகழும் அவர்கள் மத்தியில் போய்ச் சேரவும் , தரம் காணவும் உதவும் என்றகாரணங்களை எமது நோக்கமாக கொண்டுள்ளோம். 

உலக தரத்திதிற்கு தமிழ் நாடகம் உண்டு என்று காட்டவும் , அவர்கள் அதனைப் பார்க்கவும் வேண்டும் என்றும் எங்களுடைய தொன்மையான கூத்து வடிவம் எம்மிடம் உண்டு அவற்றையும் கற்றுக் கொள்ள வேண்டும் என்று தான் உலகளாவியநாடகவியலாளர்களை , நாடகத்தில் முனைவர் படம் பெற்றவர்களை இணைக்க வேண்டும் என்ற எண்ணம் ஏற்றப்பட்ட்து . இதன்அடிப்படையில் தான் உடல் சஞ்சிகை எழுத்து வடிவமாக இருந்து செயல் வடிவுக்கு மாறியது. இவ்வாறே  2016 இல் பாரிஸ் மாநகரில் முதலாவது உலக தமிழ் நாடக விழா நடைபெற்றது. . 

முதலாவது பாரிஸ் நாடக விழா பெரும் வெற்றியையும் , இளையோர் மத்தியில் பெரும் பாராட்டையும் கவனத்தையும் ஈர்த்துத் தந்ததுஅதற்கு சிறப்பு விருந்தினராக வந்திருந்த நடிகர் நாசரின் உரையில் எல்லோரும் ஆச்சரியம் அடைந்தனர் .. அந்தளவுக்கு பெரும் சிறப்பாகஉலகம் கண்டிராத வகையில் பாரிஸ் மாநகரில் இடம் பெற்றது . நாம் என்ன நோக்கத்தைக் கொண்டிருந்தோமோ எமது நோக்கத்தை பிரதிபலிப்பதாக நடிகர் நாசரின் உரையும் இருந்தது .எமது இளையோர் தமிழ் நாடகக் கலையை கற்றுக் கொள்ள வேண்டும்  .தொன்மையைபேணா வேண்டும் அத்தோடு ஏனைய நாட்டுக் கலைகளையும் அறிய வேண்டும் என்றும் நாசர் சொல்லி இருந்தார் .எனவே முதல் நாடகவிழா தந்த வெற்றியும் தேவையும் அடிப்படையாக வைத்து உணர்ந்து விழாவை தொடர்ந்து நடத்தவேண்டும் என்ற உந்து சக்தியால் 2ஆவது உலக தமிழ் நாடக விழாவை இவ்வருடம் இலண்டனில்திட்டமிட்டு உள்ளோm

அத்துடன்  ''உடல்  ''சஞ்சிகை சார்ந்து செயற்படுகின்ற ஒருங்கிணைப்பாளர்கள் எல்லா நாடுகளிலும் உள்ளனர்.  ஜெர்மனியில் இருந்து ஐயம்பிள்ளை சொர்ணலிங்கம் , நயினை விஜயன் பண்ணாகம் கிருஷ்ணமூர்த்தி, யாழில் யாழ் தர்மினி , சுவிஸ் , இத்தாலி,டென்மார்க்கில் என்று உடல் சஞ்சிகையில் ஒருங்கிணைப்பாளர்கள் நாடக விழாவிலும் செயற்படுகின்றனர் . இப்படி ஒவ்வொருநாட்டிலும் உள்ளனர் ,.இவர்கள் நாடகம் சார்ந்து , விழா சார்ந்து பணி புரிகின்றனர். பிரான்ஸ் கலை கலாசார ஒன்றியத்தினர் லண்டன்மாநகரில்

ஒரு குழுவை அமைத்து , புதிய இணைப்பாளர்களை இணைந்து செயற்படுகின்றனர்.   அரங்க விழாவில் பங்கு கொள்ளுதல் பொருட்டு நாடகங்கள் 30 நிமிடம் தான் இருக்க வேண்டும் , என்பதும் .  குழுவில் 7 பேர் மட்டும் உள்ளடக்க வேண்டும் .என்பதும் கட்டாயம்.    . ஏனெனில் போக்குவரத்து, தங்குமிட வசதிகள் எமது பொருளாதார நிலைக்கு ஏற்றமாதிரி திட்டமிட்டு உள்ளோம் .  . ஒவ்வொருநாடகங்களும் .தமிழ் சமூகம் சார்ந்த தமிழ் இனத்தின் விடுதலை சார்ந்து பயனுள்ள நாடகங்களை சமூகத்துக்கு தேவையானநாடகங்களை சமகால பிரச்சனையை பாடுபொருளாகக் கொண்டு படைப்பார்கள் என்ற நம்பிக்கை உண்டு. இந்த நாடகங்கள் புலம்பெயர்மக்கள் மத்தியில் ஒரு விழிப்புணர்வை ஏற்படுத்தும் என்ற நம்பிக்கை எங்களுக்கு உண்டு . ஏனெனில் எல்லோரும் சமூகம் சார்ந்தசிந்தனையாளர்கள். நாடக துறை சார்ந்த சிந்தனையாளர்கள் .விரிவுரையாளர்கள். .பொதுவாகவே அரங்க ஆற்றுகையாளர்கள் சமூகத்தின்பால் அக்கறை கொண்டவர்களாகவே இருப்பார்கள் .இன்றைய காலத்தில் தமிழினம் பல்வேறு தேவைகளை எதிர்நோக்கிக் கொண்டுஉள்ளது . புலம்பெயர் தேசத்திலும் சரி , தாயகத்திலும் சரி , தமிழகமோ, ஈழமோ , ஐரோப்பிய நாடோ எங்கும் எல்லோருடையவாழ்க்கையிலும் ஒரு தேடல் உள்ளது . தமிழினத்துக்கான தேவை உள்ளது .பிரச்சனை உள்ளது. . அவற்றை கண் கொண்டு பார்ப்பதாகஒவ்வொரு படைப்புக்களும் இருக்கும் என்பதில் பூரண நம்பிக்கை உண்டு . 

உடல் சார்ந்து செயற்படுகின்ற ஒருங்கிணைப்பாளர்கள் எல்லா நாடுகளிலும் உள்ளனர்.  ஜெர்மனியில் இருந்து ஐயம்பிள்ளை சொர்ணலிங்கம் , நயினை விஜயன் பண்ணாகம் கிருஷ்ணமூர்த்தி, யாழில் யாழ் தர்மினி , சுவிஸ் , இத்தாலி, டென்மார்க்கில் என்று உடல்சஞ்சிகையில் ஒருங்கிணைப்பாளர்கள் நாடக விழாவிலும் செயற்படுகின்றனர் . இப்படி ஒவ்வொரு நாட்டிலும் உள்ளனர் ,.இவர்கள்நாடகம் சார்ந்து , விழா சார்ந்து பணி புரிகின்றனர். பிரான்ஸ் காலா கலாசார ஒன்றியத்தினர் லண்டன் மாநகரில்  ஒரு குழுவை அமைத்து , புதிய இணைப்பாளர்களை இணைந்து செயற்படுகின்றனர். இதில் மிகவும் கடுமையான உழைப்பு உண்டுஇதைதான் சவாலாக பார்க்கின்றேன் . ஏனெனில் . ஒரு நாடகம் அரங்கேற்றுவது என்றால் பல சிரமம் உண்டு.   இப்போ 12 நாடுகளையும்நாடகங்களையும் ஒன்றிணைத்து ஒருங்கிணைத்து அவர்களின் தேவைகள், தங்குமிடம்,  போக்குவரத்து,  உணவு வசதிகள் என்பவற்றைசெய்து முடிப்பது என்பது என்பது எமது அங்கத்தவர்களினதும் , உறுப்பினர்களினதும், ஆதரவாளர்களினதும் உழைப்பு. மிகவும்காத்திரமான உழைப்பு இதற்கு தேவைப் படுகிது.  அதை அர்ப்பணிக்க பலர் தயாராக உள்ளனர் . எல்லாவற்றையும் ஈடுகொடுக்க

பொருளாதார நெருக்கடி உண்டு. பலரின் உதவிகள் கேட்டுள்ளோம் .  எமது மக்களின் நம்பிக்கையில் சிறுதுளி பெரு வெள்ளம் எனஉதவுவர்கள் என்ற நம்பிக்கை எமக்கு இருக்கு.  . தாயகத்திலிருந்து லண்டனுக்கு பார்வையாளர்களாக வர விரும்புபவர்கள் எந்தநாட்டில் இருந்தும் கலந்து கொள்ள முடியும் எவருக்கும் தடை இல்லை .  வர விரும்புபவர்கள் கடிதம் மூலம் ஒன்றியத்திற்கு கோரிக்கைவிடுத்தால் வீசாவுக்கான அழைப்புக் கடிதம் அனுப்பப்படும் . ஆனால் வீசா மற்றும் போக்கு வரத்து , தங்குமிடம் உட்பட நாடு திரும்பும்வரை அனைத்திலும் தாங்களே தங்களுக்கு பொறுப்பாக வேண்டும் .மேலும்

 'உடல் '  சிறப்பு இதழுக்காக ஆக்கங்களுக்கான முடிவுத் திகதி முடிவடைந்து விட்டது .ஆயினும் பலர் ஆர்வத்துடன் கட்டுரைகள் அனுப்பி உள்ளனர் .பலரினது கட்டுரைகள் காத்திருப்பில் உள்ளது. தாயகத்தை பொறுத்தவரையில் வடக்கு கிழக்கில்பல்கலைக் கழகத்தில் நாடகத்துறை கல்வியாக உள்ளது. பாடசாலைகளில் உள்ளது. ஆய்வு மாணவர்கள் உள்ளனர் . எல்லோருக்கும்இப்போ வேலைப்பளுக்கள் அதனாலோ என்னவோ பலரிடம் இருந்து கட்டுரைகள் தாமதிக்கின்றன.  கட்டுரையாளர்களின் ஒத்துழைப்பேஅவர்களின் கட்டுரைகள் சர்வதேச அங்கிகாரம் பெற உதவும் . விழாவுக்கான காலங்கள் நெருங்கத் தொடக்கி விட்டன. வேகமாக மிகச்சுருக்கமான குறுகிய நாளில் விரைவாக கட்டுரை அனுப்ப ஆர்வம் உடையவர்கள் இருப்பின் அதற்கு இறுதி சந்தர்ப்பம் வழங்கப்படும்

தாயகத்தில் உள்ளவர்கள் சிறப்பு இதழுக்காக உங்கள் கட்டுரைகளை தாயக ஒருங்கமைப்பாளரின் மின்னஞ்சல் முகவரிக்கோ  [  jaaltharmini @mail .com ] அல்லது

 oudalmozhi @gmail .com என்ற மின்னஞ்சல் முகவரிக்கோ அனுப்ப முடியும் . மேலதிக தொடர்புகளுக்கு பிரான்ஸ் தமிழர் கலை கலாசாரஒன்றியத் தலைவர் எம் . அரியநாயகம்  0033 617731192 என்ற தொலைபேசியில் தொடர்பு கொள்ள முடியும் . .மேலும் அரங்க விழாவின்சிறப்பு இதழுக்கு கட்டுரை சமர்ப்பிக்க இயலாதவர்கள் தொடர்ந்தும் வெளிவந்து கொண்டிருக்கும் உடல் சஞ்சிகைக்கு ஆக்கங்களை சமர்ப்பிக்க முடியும் . என்றார்

மரண தண்டனையை மீண்டும் நடைமுறைப்படுத்தினால், வணிகச் சலுகைகளை சிறிலங்கா இழக்கும் ஆபத்து ஏற்படும் என்று, ஐரோப்பிய நாடுகளின் தூதுவர்கள் சிறிலங்கா அதிபர் மைத்திரிபால சிறிசேனவுக்கு எச்சரிக்கை விடுத்துள்ளனர்.

போதைப் பொருள் கடத்தல் குற்றவாளிகளுக்கு மரணதண்டனையை நிறைவேற்றுவதற்கு நடவடிக்கை எடுக்கப் போவதாக சிறிலங்கா அதிபர் மைத்திரிபால சிறிசேன கடந்தவாரம் அறிவித்திருந்தார்.

இதையடுத்து. மரணதண்டனையை நிறைவேற்றுவதற்கான முயற்சிகள் சிறிலங்கா அரசாங்கத்தினால் முன்னெடுக்கப்பட்டு வரும் நிலையில், ஐரோப்பிய நாடுகள் அதற்கு கடும் எதிர்ப்பை வெளியிட்டுள்ளன.

மரணதண்டனையை நடைமுறைப்படுத்துவதை தடுத்து, மரணதண்டனைக்கு எதிரான சிறிலங்காவின் பாரம்பரியத்தை காப்பாற்றுமாறு சிறிலங்கா அதிபர், மைத்திரிபால சிறிசேனவிடம், ஐரோப்பிய நாடுகளின் தூதுவர்கள் கூட்டாக கோரியுள்ளனர்.

கனடா மற்றும் நோர்வே ஆகிய நாடுகள் இது தொடர்பாக வெளியிட்ட அறிக்கைக்கு ஆதரவு தெரிவித்து, ஐரோப்பிய ஒன்றிய தூதுக்குழு, பிரித்தானியா, பிரான்ஸ், ஜேர்மனி, நெதர்லாந்து, ருமேனியா, ஆகிய நாடுகளின் தூதுவர்கள் இந்த கூட்டு அறிக்கையை வெளியிட்டுள்ளனர்.

சிறிலங்கா அதிபர் தமது முடிவில் இருந்து பின்வாங்குவார் என்று தாம் எதிர்பார்ப்பதாகவும், மரணதண்டனையை நடைமுறைப்படுத்தினால், 28 ஐரோப்பிய நாடுகளுக்கான ஏற்றுமதி முன்னுரிமை வாய்ப்புகளை சிறிலங்கா இழக்க நேரிடும் என்றும், ஐரோப்பிய ஒன்றிய இராஜதந்திரிகள் தெரிவித்துள்ளனர்.

அதேவேளை, சிறிலங்கா மரணதண்டனையை நடைமுறைப்படுத்தினால், ஜிஎஸ்பி பிளஸ் வரிச் சலுகையை கொழும்பு  உடனடியாக இழக்கும் என்று ஐரோப்பிய ஒன்றிய இராஜதந்திர வட்டாரங்கள் ஏஎவ்பியிடம் தெரிவித்துள்ளன.

மகிந்த ராஜபக்ச ஆட்சிக்காலத்தின் மோசமான மனித உரிமைகள் நிலைமையால் ஐரோப்பிய ஒன்றியத்தின், ஜிஎஸ்பி பிளஸ் வரிச் சலுகையை சிறிலங்கா இழக்க நேரிட்டது.

7 ஆண்டுகளுக்குப் பின்னர் கடந்த 2017ஆம் ஆண்டிலேயே இந்தச் சலுகை மீண்டும் வழங்கப்பட்டது.

நவோதய மக்கள் முன்னணியின் தலைவரும் கொழும்பு மாநகர சபை உறுப்பினருமான எஸ்.கே. கிருஷ்ணா சுட்டு படுகொலை செய்யப்பட்டுள்ளார்.

இன்று காலை 7.20 மணிக்கு இவர் சுட்டு படுகொலை செய்யப்பட்டுள்ளார்.

செட்டியார் தெருவில் உள்ள அவரது காரியாலயத்திற்கு முன்பாக இன்று காலை இனந்தெரியாத நபர்களால் சுட்டு படுகொலை செய்யப்பட்டுள்ளார் என எமது செய்தியாளர் தெரிவித்தார்.

1979ஆம் ஆண்டு ஜூலை மாதம் 28ஆம் திகதி பிறந்த கிருஷ்ணா என்று அழைக்கப்படும் கிருஷ்ணபிள்ளை கிருபானந்தன் தனது 39ஆவது வயதில் உயிரிழந்துள்ளார்.

துப்பாக்கிச்சூட்டில் படுகாயமடைந்த இவர் கொழும்பு தேசிய வைத்தியசாலைக்கு கொண்டு சென்ற பின்னரே உயிரிழந்துள்ளார்.

சம்பவம் தொடர்பில் பொலிஸார் விசாரணைகளை முன்னெடுத்து வருகின்றனர்.

நவோதய மக்கள் முன்னணியின் தலைவர் கிருஷ்ணா, கொழும்பு மாநகர சபைக்கான தேர்தலில், சுயேட்சைக்குழுவில் போட்டியிட்டு வெற்றியீட்டியவராவார்.

கொழும்பு வாழ் தமிழ் மக்களுக்கு கிருஷ்ணா பல உதவிகளை செய்துவந்ததுடன், இவரது அரசியல் வளர்ச்சி ஏனைய சிறுபாண்மை கட்சிகளுக்கு பாரிய சவாலாக விளங்கியமை குறிப்பிடத்தக்கது.

இலங்கையில் இரட்டைக் குடியுரிமையை பெற்றுக் கொள்வதற்காக வௌிநாடுகளில் வசிக்கும் இலங்கையர்கள் அதிக ஆர்வம் காட்டுவதாக குடிவரவு மற்றும் குடியகல்வு கட்டுப்பாட்டாளர் நாயகம் நிஹால் ரணசிங்க கூறினார்.

இதற்காக ஒரு மாதத்துக்கு சுமார் 1000 விண்ணப்பங்கள் அளவு கிடைப்பதாகவும், பாதுகாப்பு அமைச்சு, வெளியுறவு அமைச்சு மற்றும் உள்நாட்டலுவல்கள் அமைச்சு ஆகியவற்றின் அதிகாரிகள் அடங்கிய குழுவினால் இவை பரிசீலிக்கப்பட்டு அனுமதி வழங்கப்பட்டதன் பின்னர் விண்ணப்பதாரிகளுக்கு இரட்டைக் குடியுரிமை வழங்குவதாகவும் அவர் கூறினார்.

இவ்வாறு தெரிவு செய்யப்பட்ட 800 பேருக்கு ஜூலை முதல் வாரத்தில் இரட்டைக் குடியுரிமை வழங்கும் நடவடிக்கை இடம்பெறவுள்ளதாக அவர் கூறியுள்ளார்.

இரட்டைக் குடியுரிமை பெற்றுக் கொள்ள விண்ணப்பிப்போருக்கான கட்டணம் 3 இலட்சம் ரூபா என்பதுடன், அவர்களின் மனைவி பிள்ளைகளுக்கான கட்டணம் 50,000 ரூபா என்று தெரிவிக்கப்பட்டுள்ளது.

வடமகாணத்தில் போருக்கு பின்னரான 9 வருடங்களில் 131 விகாரைகள் அமைக்கப்பட்டுள்ளதாக கூறியிருக்கும் வடமாகாணசபை உறுப்பினர் து.ரவிகரன், முல்லைத்தீவு மாவட்டத்தில் மட்டும் 67 விகாரைகள் அமைக்கப்பட்டுள்ளதாகவும் கூறியுள்ளார்.

மேலும் முல்லைத்தீவு மாவட்டம் திட்டமிட்ட சிங்கள குடியேற்றத்திற்குள்ளாக்கப்பட்டமை இதன்மூலம் அம்பலமாவதாகவும் கூறினார்.

மேற்படி விடயம் தொடர்பாக ரவிகரன் ஊடகங்களுக்கு தகவல் தருகைளில்,

”வடமாகாணத்தில், குறிப்பாக முல்லைத்தீவு மாவட்டத்தில் திட்டமிட்டவகையில் தமிழ் மக்களின் நிலங்களில் சிங்கள மக்கள் குடியேற்றப்படுகின்றனர். மறுபக்கம் பௌத்தர்கள் வாழாத பகுதிகளில் திட்டமிட்டு பௌத்த விகாரைகள் அமைக்கப்பட்டு வருகின்றன. இதற்கு சிறந்த எடுத்துக்காட்டாக வடமாகாணத்தில் 131 விகாரைகள் போருக்கு பின்னரான 9 வருடங்களில் அமைக்கப்பட்டிருக்கின்றன.

இதன்படி யாழ்ப்பாணம் மாவட்டத்தில் 6 விகாரைகளும், கிளிநொச்சி மாவட்டத்தில் 3 விகாரைகளும், மன்னார் மாவட்டத்தில் 20 விகாரைகளும், வவுனியா மாவட்டத்தில் 35 விகா ரைகளும், முல்லைத்தீவு மாவட்டத்தில் 67 விகாரைகளும் அமைக்கப்பட்டிருக்கின்றது.

இதன் ஊடாக முல்லைத்தீவு மன்றும் வவுனியா மாவட்டங்களில் போருக்கு பின்னர் திட்டமிட்டவகையில் தமிழ் மக்களுடைய நிலங்களை அபகரித்து சிங்கள மக்கள் குடியேற்றப்படுவது மட்டுமல்லாது திட்டமிட்டவகையில் பௌத்தர்களே வாழாத பகுதியில் பௌத்த விகாரைகளும் கட்ட ப்பட்டுக் கொண்டிருப்பதை காட்டுகின்றது. இது குறித்து தமிழ் தலைவர்கள் கண்டு கொள்ளாமல் இருப்பது குறித்து மக்களே பல இடங்களில் எமக்கு கூறியுள்ளார்கள்.

இனிமேலாவது வடமாகாணத்தில் மேற்கொள்ளப்படும் திட்டமிட்ட குடியேற்றங்களை நிறுத்துவதுடன் சேர்த்து பௌத்தமயமாக்கலையும் தடுப்பதற்கான நடவடிக்கைகள் எடுக்கப்படவேண்டியது கட்டாயமாகும்” என ரவிகரன் மேலும் கூறியிருக்கின்றார்.

வவுனியா, மன்னார் ஆகிய இடங்களுக்கு தமிழ் அரச அதிபர்கள் நியமிக்கப்பட வேண்டும்.

ஆனால் சிங்களவர்களைத் தமிழ் பிரதேசங்களுக்கும் தமிழர்களைச் சிங்கள பிரதேசங்களுக்கும் நியமிக்கும் ஒரு கொள்கை உங்களுக்கிருந்தால் யாழ்ப்பாணத்திற்கு அல்லது கிளிநொச்சிக்கு சிங்களவர் ஒருவரை நியமியுங்கள். என சி.வி.விக்னேஸ்வரன் கோரிக்கை விடுத்துள்ளார்.

காணி விடுவிப்பு, கட்டமைப்பு அபிவிருத்தி, வீடமைப்பு மற்றும் அவசர தேவைகள் ஆகிய நான்கு கோரிக்கைகளை முன்வைத்து வடக்கு மாகாண முதலமைச்சர் சி.வி.விக்னேஸ்வரன், பிரதமர் ரணில் விக்கிரமசிங்கவிடம் ஆவணம் ஒன்றைக் கையளித்துள்ளார்.

இந் நிலையில் தனது கோரிக்கைகள் அடங்கிய ஆவணத்தை முதலமைச்சர் சி.வி.விக்னேஸ்வரன், தனது செயலாளர் ஊடாக பிரதமரிடம் நேற்றுக் கையளித்தார்.

குறித்த ஆவணத்திலே குறித்த விடயம் தொடர்பாக குறிப்பிடப்பட்டுள்ளது.

அந்த ஆவணத்தின் தமிழாக்கம் வருமாறு:-

அபிவிருத்தித் திட்டங்களை மீளாய்வு செய்தலும் காணிகளை விடுவித்தலும்.,

1. காணி விடுவித்தல்

படையினர் வசமுள்ள காணிகள் அனைத்தையும் மக்கள் காணிகள் ஆயின் மக்களிடமும் அரச காணிகளாகின் மாகாண காணி ஆணையாளரிடமும் கையளிக்கப்பட வேண்டும்.

2013-இல் இருந்து காணிகளை எம்மிடம் ஒப்படையுங்கள் என்று கேட்டு வருகின்றோம். அரச காணிகள் மேல் எமக்கிருக்கும் சட்ட உரித்து அரசியலமைப்பின் ஒன்பதாவது அட்டவணையின் முதலாம் நிரலின் கீழ் வரும் அனுபந்தத்தில் தரப்பட்டுள்ளன.

பாதுகாப்பு வேலைகளைப் பொலிஸாரிடம் கையளிக்கலாம். தேவையெனில் ஏதேனும் வேலைகளை படையினர் செய்ய வேண்டி வந்தால் அந்த குறிப்பிட்ட சேவைகளை எமது மேற்பார்வையின் கீழ் அவர்கள் செய்யலாம். அதற்காகப் படையினரை உரிய அதிகாரிகள் இங்கு அனுப்பலாம்.

இன்று வரையில் நிலைபெற்றிருக்கும் ஒரு இராணுவமாகவே போர் முடிந்த பின்னரும் படையினர் இங்கு குடியிருந்து வருகின்றனர். இப்போது அவர்கள் தமது தந்திரோபாயங்களை மாற்றி மக்களுக்கு உதவி செய்ய முன்வந்துள்ளனர். சோழியன் குடுமி சும்மா ஆடாது.

2. கட்டமைப்புக்களின் அபிவிருத்தி

1. (i) காங்கேசன்துறைத் துறைமுக வேலைகள் எப்போது ஆரம்பிப்பன?

(ii) தூத்துக்குடி – தலைமன்னார் படகு சேவையை மீண்டும் தொடங்க வேண்டும். தொடங்கினால் புலம்பெயர்ந்த எம் மக்கள் தமது உடைமைகளை இங்கு கொண்டுவர முடியும்.

(iii) பாக்குநீரிணையில் இருந்து வெளியேற்றி இழுவைப் படகுகளை வங்காள விரிகுடா, அரேபியன் கடல் போன்றவற்றுக்கு கொண்டு செல்ல இந்திய அரசுடன் பேச்சு நடத்த வேண்டும்.

2. பலாலி விமானத் தளத்தை சர்வதேச அல்லது பிராந்திய விமானத் தளமாக மாற்ற வேண்டும். மேலதிக மாகாண காணிகள் சுவீகரிக்கத் தேவையில்லை என்று இந்திய அரசு கூறியுள்ளது.

3. மாகாண ஏரிகள், குளங்கள் என்பன மறு சீரமைக்கப்பட வேண்டும். அப்போது நீர் மட்டத்தின் மேல் சூரிய ஒளிச் சட்டங்களை (Solar) பரவி விடலாம். இது மின்சாரத்தைத் தருவது மட்டுமல்லாது குளத்து நீர் ஆவியாக மாறுவதைத் தடுப்பதாகவும் அமையும்.

4. எமது கிராமத்தில் இருக்கும் மக்கள் அபிவிருத்தி சங்கங்களின் கட்டடங்களைப் சீரமைக்க வேண்டும். அவ்வாறு சீரமைப்பதன் பின்னர் அங்கு கணனிகள் போன்ற வசதிகள் செய்து கொடுக்கப்பட வேண்டும். இதற்கான கோரிக்கை ஏற்கனவே இந்தியத் தூதுவரிடம் கையளிக்கப்பட்டுள்ளது.

5. அரச மின்நிலைய இணைப்புடன் சேர்க்கும் முகமாக காற்றாடி, சூரிய சக்தி போன்ற பதில் மின்சார உற்பத்தி முறைகளைக் கையாள வேண்டும்.

6. கொக்கிளாயில் வடக்கு – கிழக்கை இணைக்க பாலம் ஒன்று கட்டப்பட வேண்டும்.

3. வீடமைப்பும் மீள் குடியிருத்தலும்.,

வடமாகாண சபை மூலம் 50 ஆயிரம் வீடுகள் கட்டித்தர வேண்டும். ஆனால் அரசு எம்மை நம்புவதில்லை. வீடமைப்புக்கான செலவு பணம் அனைத்தையும் அரச அதிபர்களுக்கே கொடுத்து வருகின்றீர்கள். அவர்கள் எமது அலுவலர்களைக் கொண்டே வேலைகளைச் செய்து முடிக்கின்றார்கள்.

இந்தப் பணத்தை நேரடியாக எமக்கு அனுப்புதில் என்ன தயக்கம்? மக்களால் தேர்ந்தெடுக்கும் பிரதிநிதிகள் மீது நீங்கள் நம்பிக்கை கொள்ள வேண்டும். ஆனால் எங்கள் மீது உங்களுக்கு நம்பிக்கை இல்லை.

கேப்பாப்பிலவு போன்ற இடங்கள் இன்னமும் விடுவிக்கப்படவில்லை. உடனே அவை விடுவிக்கப்பட வேண்டும். அதை விட்டு காணிகளைத் தம் கைவசம் வைத்திருக்க படையினர் முனைந்தால் அது சம்பந்தமாக வெளிப்படையான விசாரணைகள் நடைபெற இடம் அளிக்க வேண்டும்.

விசாரணை நடைபெற்றால் படையினர் கோரும் காணிகள் அவர்கள் செய்யும் வேலைக்கு தேவையானதல்ல என்பதனை நாம் எடுத்துக் காட்ட முடியும்.

4. அவசரமான தேவைகள்

(1). பிரதேச சபை வீதிகள் திருத்தப்படவேண்டும்.

போக்குவரத்துக்கு உகந்ததாக வீதிகள் சரிசெய்து கொடுக்கப்பட வேண்டும். திணைக்கள வீதிகளின் அபிவிருத்தியும் பார்க்கப்பட வேண்டும்.

(2) i. முதலமைச்சர் நிதிய நியதிச்சட்டம் ஆளுநரால் அங்கீகரிக்கப்பட்டு வர வேண்டும். தேவையில்லாமல் அதனைத் தாமதப்படுத்திக்கொண்டே இருக்கின்றார்.

ii. மாகாண, மத்திய அலுவலர்களின் வெற்றிடங்கள் உடனே நிரப்பப்பட வேண்டும்.

iii. செங்குத்தான கட்டடம் அமைக்கும் செயற்றிட்டத்தை யாழ்ப்பாணத்தில் அமைக்க அமைச்சர் பைசர் முஸ்தாபா முன் வந்தார். ஆனால் திடீரென அதற்கான நிதிகள் வேறெங்கேயோ மாற்றப்பட்டு விட்டன. விட்ட இடத்தில் இருந்து இந்த செயற்றிட்டம் தொடர ஆவன செய்ய வேண்டும்.

(3). பெரும் நகர அமைப்பு அமைச்சரால் யாழ் மாநகர சபைக் கட்டடம் அமைக்க நடவடிக்கைகள் எடுக்கப்பட்டு வந்தன. ஆரம்ப வேலைகளும் முடிந்துவிட்டன. இதற்குரிய நிதியம் வேறெங்கோ கொண்டு சேர்க்கப்பட்டுள்ளது.

(4). வலிகாமம் வடக்கில் விடுவிக்கப்பட்ட நிலங்களில் மீள்குடியமர்வு முறையாக நடப்பதை உறுதி செய்ய ஒரு சிறப்பு சிவில் செயலணி நியமிக்கப்பட வேண்டும். மயிலிட்டியிலும் நியமிக்கப்பட வேண்டும்.

(4) i. இரணைதீவில் சிவில் நிர்வாகம் மீண்டும் ஏற்படுத்தப்பட வேண்டும்.

(4) ii. வவுனியா, மன்னார் ஆகிய இடங்களுக்கு தமிழ் அரச அதிபர்கள் நியமிக்கப்பட வேண்டும்.

ஆனால் சிங்களவர்களைத் தமிழ் பிரதேசங்களுக்கும் தமிழர்களைச் சிங்கள பிரதேசங்களுக்கும் நியமிக்கும் ஒரு கொள்கை உங்களுக்கிருந்தால் யாழ்ப்பாணத்திற்கு அல்லது கிளிநொச்சிக்கு சிங்களவர் ஒருவரை நியமியுங்கள்.

எல்லைப்புற மாவட்டங்களுக்கு சிங்கள அரச அதிபர்களை நியமிப்பதால் சட்டப்படி காணிகளை உள்ளூர் மக்களுக்கு முன்னுரிமையின் அடிப்படையில் கொடுக்காமல், அவர்கள் மாகாணத்துக்கு வெளியில் இருந்து மக்களைக் கொண்டு வந்து வடமாகாண காணிகளில் குடியேற்றுகின்றார்கள்.

(4) iii. தமிழ் மொழியில் உயர் கல்வி கற்கவும் வணிகம் பற்றி கற்கவும் ஏதுவாக வடமாகாண சபை தமிழ்நாட்டுடன் ஒப்பந்தங்களில் கைச்சாத்திட அனுமதி தாருங்கள்.

(5). பதின்மூன்றாம் திருத்தச் சட்டத்தின் கீழ் அதிகாரப் பரவலாக்கம் நடைபெற்ற படியால் மகாவலிச் சட்டம், நகர அபிவிருத்தி அதிகார சபைச் சட்டம் போன்றவற்றிற்கு திருத்தங்கள் கொண்டுவரப்பட வேண்டும்.

அதாவது மாகாண அதிகாரங்களைப் பாதுகாத்து சட்டங்கள் திருத்தப்பட வேண்டும். தற்போது மாகாணங்களுக்கு எந்தவித அதிகாரமும் இல்லை என்ற அடிப்படையிலேயே அவர்கள் செயலாற்றுகின்றார்கள்.

(6). தீவிரவாத தடுப்புச் சட்டத்தை உடனே கைவாங்க வேண்டும்.

(7). அரசியல் கைதிகள் அனைவரும் பொது மன்னிப்பில் விடுதலை செய்யப்பட வேண்டும் – என்ற கோரிக்கைகளுடன் குறித்த ஆவணம் கையளிக்கப்பட்டுள்ளது.

சிறிலங்காவில் இருந்து புலம்பெயர்ந்த தமிழ் இளைஞன் ஒருவர் பிரித்தானியாவின், தென்மேற்கு லண்டனில் உள்ள, மிச்சம் பகுதியில் வெட்டிக் கொலை செய்யப்பட்டுள்ளார்.

நேற்று அதிகாலை 3.30 மணியளவில் மிச்சம் பகுதியில் உள்ள வீதியில் அருணேஸ் தங்கராஜா என்ற 28 வயதுடைய இளைஞன் வெட்டுக்காயங்களுடன் கிடந்தார்.

அவரை மீட்டு உயிரைக் காப்பாற்ற காவல்துறையினர் முயற்சித்த போதும், அந்த இடத்திலேயே மரணமானார்.

ஸ்கொட்லன்ட்யார்ட் காவல்துறையினர், இந்தக் கொலை தொடர்பான தடயவியல் ஆய்வுகளை மேற்கொண்டு வருகின்றனர்.

இந்தக் கொலை தொடர்பாக 44 வயதுடைய சந்தேக நபர் ஒருவர் கைது செய்யப்பட்டுள்ளார்.

அவர் தெற்கு லண்டனில் உள்ள காவல் நிலையத்துக்கு கொண்டு செல்லப்பட்டு தடுத்து வைக்கப்பட்டுள்ளார் என்று பிரித்தானிய ஊடகங்கள் செய்தி வெளியிட்டுள்ளன.

அமெரிக்க கடற்படையின் USNS Mercy என்ற பாரிய மிதக்கும் மருத்துவமனைக் கப்பல், நேற்று திருகோணமலைத் துறைமுகத்தை வந்தடைந்துள்ளது.

பசுபிக் ஒத்துழைப்பு திட்டத்தின் ஒரு அங்கமாக இந்த அமெரிக்க கடற்படைக் கப்பல்  சிறிலங்காவுக்கான பயணத்தை மேற்கொண்டுள்ளது.

279.49 மீற்றர் நீளமும், 32.2 மீற்றர் அகலமும் கொண்ட இந்தக் கப்பலில் முழுமையான கருவிகளைக் கொண்ட 12 அறுவைச் சிகிச்சைக் கூடங்களும், 1000 படுக்கைகளைக் கொண்ட மருத்துவமனை வசதிகளும் உள்ளன.

நவீன மருத்துவ ஆய்வு கூட, பரிசோதனை வசதிகள், மருந்தகம், ஆகியவற்றுடன் இரண்டு பிராண வாயு உற்பத்திக் கூடங்களும் இந்தக் கப்பலில் உள்ளன.

சிரியாவில் அமெரிக்க கூட்டுப்படைகள் திடீர் தாக்குதல் நடத்துவதற்கு முன்னர் பிரித்தானியாவின் நீர்மூழ்கி கப்பல் ஒன்றை ரஷ்யாவின் சக்தி வாய்ந்த போர் கப்பல் ஒன்று வேட்டையாடிய பகீர் தகவல் தற்போது வெளியாகியுள்ளது.

ரஷ்யாவின் மிகவும் சக்தி வாய்ந்த Black Hole என புனைப்பெயரால் அறியப்படும் போர் கப்பல் ஒன்று பிரித்தானியாவுக்கு கடும் சவாலை ஏற்படுத்தியுள்ளது.

பிரித்தானியாவின் HMS Astute போர் கப்பலானது 1000 மைல்கள் தொலைவில் இருந்து தாக்கும் Tomahawk ஏவுகணைகளை சிரியாவுக்கு எடுத்துச் செல்லும் வழியிலேயே குறித்த சம்பவம் நடந்துள்ளது.

பிரித்தானிய கப்பலின் நகர்வுகளை உன்னிப்பாக கவனித்து வந்த ரஷ்ய போர் கப்பல் உடனடியாக நடவடிக்கையில் இறங்கியுள்ளது.

பிரித்தானியாவின் HMS Astute போர் கப்பலானது அளவில் பெரிதானதும் தாக்குதலில் மிகவும் கொடூரமானதும் ஆகும்.

இதை அறிந்தே நீர்மூழ்கி கப்பல்களுக்கு பாதுகாப்பாக செயல்படும் ரஷ்யாவின் விமானம் ஒன்றும் குறித்த வேட்டையில் களமிறங்கியுள்ளது.

இறுதியில் ரஷ்ய போர்கப்பலே தனது திசையை மாற்றிக் கொண்டு சென்று விட்டதாகவும், ஆனால் குறித்த நிகழ்வனது சிரியா தாக்குதலுக்கு முந்தைய நாள் நடைபெற்றதும் குறிப்பிடத்தக்கது.

வடக்கு மாகாண சபைக்கான அடுத்த முதலமைச்சர் வேட்பாளர் யார் என்று இப்போது தீர்மானிக்க முடியாது என்று தமிழ்த் தேசியக் கூட்டமைப்பின் தலைவர் இரா.சம்பந்தன் தெரிவித்துள்ளார்.

வடக்கு மாகாண சபைக்கான தேர்தலில், மீண்டும் முதலமைச்சர் வேட்பாளராக சி.வி.விக்னேஸ்வரன் கூட்டமைப்பின் சார்பில் நிறுத்தப்படமாட்டார் என்று, கூட்டமைப்பின் பேச்சாளரான நாடாளுமன்ற உறுப்பினர் எம்.ஏ.சுமந்திரன் கூறியிருந்தார்.

இதுகுறித்து, இரா.சம்பந்தனிடம் நேற்று திருகோணமலையில் செய்தியாளர்கள் கேள்வி எழுப்பியிருந்தனர்.

அதற்குப் பதிலளித்த போதே, அவர் வடக்கு மாகாணசபைக்கான அடுத்த முதலமைச்சர் வேட்பாளர் யார் என்று இப்போது தீர்மானிக்க முடியாது என்று கூறியுள்ளார்.

சிறிலங்கா பிரதமர் ரணில் விக்கிரமசிங்கவுக்கு எதிரான நம்பிக்கையில்லாப் பிரேரணை தொடர்பாக, தமிழ்த் தேசியக் கூட்டமைப்பின் பங்காளிக் கட்சிகளுக்கிடையில் கலந்துரையாடல்கள் நடத்தப்பட்டு வருவதாக, கூட்டமைப்பின் நாடாளுமன்ற உறுப்பினர் மாவை சேனாதிராசா தெரிவித்துள்ளார்.

”நம்பிக்கையில்லா பிரேரணை தொடர்பான எமது நிலைப்பாடு குறித்து கூட்டமைப்பின் பங்காளி கட்சிகளுக்கிடையில் கலந்துரையாடப்பட்டு வருகிறது.

நாளையும், நாளை மறுநாளும் கூட்டமைப்பின் நடாளுமன்ற உறுப்பினர்களுக்கான கூட்டம் கொழும்பில் நடைபெறவுள்ளது.

நாங்கள் நிலைமைகளை குறித்தும்,  பிரதான அரசியல் கட்சிகளின் பிரதிபலிப்புகள் குறித்தும் கலந்துரையாடுவோம்.

அதன் பின்னர், நம்பிக்கையில்லா பிரேரணைக்கு ஆதரவு அளிப்பதா – இல்லை அதனை எதிர்ப்பதா என்று முடிவு செய்வோம்” என்றும் அவர் கூறியுள்ளார்.

பலப்பிட்டி நகரத்தில் மேற்கொள்ளப்பட்ட திடீர் தேடுதல் நடவடிக்கையின் போது காலாவதியான உணவுப்பொருட்களை விற்பனை செய்த மற்றும் அசுத்தமான முறையில் செயற்பட்டுவந்த 13 ஹோட்டல்களுக்கு எதிராக சட்டநடவடிக்கை மேற்கொள்ளப்பட்டுள்ளது.

காலி மாவட்டத்தில் சுகாதார சேவை பணிப்பாளர் அலுவலகம் மற்றும் பலப்பிட்டி பொதுமக்கள் சுகாதார சேவை அலுவலகம் இணைந்து மேற்கொண்ட நடவடிக்கையின் போதே குறித்த ஹோட்டல்கள் இனங்காணப்பட்டுள்ளமை குறிப்பிடத்தக்கது

யாழ் – சாவகச்சேரி கிராம்பு பகுதியில் , பட்டபகலில் இருவர் வர்த்தக நிலையத்தில் 12000 ரூபாய் பணத்தினை கொள்ளையடித்துச் சென்றுள்ளனர்.

வர்த்தக நிலையமொன்றிற்கு, மோட்டார் சைக்கிளில் வந்த இருவர் தம்மை புலனாய்வாளர்கள் என அறிமுகப்படுத்தியதோடு, வியாபார நிலையத்தினைச் சோதனையிட்டனர்.

பின்னர் வெளியில் செல்ல ஆயத்தமான வேளையில், பெண்ணொருவரிடம் அவர் அணிந்திருந்த தங்க சங்கிலியை அறுக்க முற்பட்டனர். குறித்த பெண் கூக்குரல் எழுப்பிய போது அவ்விருவரும் தப்பிச் சென்றுள்ளனர்.

அதன் பின்னர் சந்தேகம் கொண்ட வர்த்தக நிலைய உரிமையாளர் அவரது மேசையிலிருந்து 12000 ரூபாய் பணம் கொள்ளையடிக்கப்பட்டிருப்பதை அறிந்தார்.

குறித்த சம்பவம் தொடர்பாக சாவகச்சேரி பொலிஸார் விசாரணைகளை மேற்கொண்டு வருகின்றனர்.

அவசரகாலச்சட்டம் நீக்கப்படும் வரையில், சிறிலங்காவில் சமூக வலைத்தளங்கள் மீதான தடை நீடிக்கும் என்று, சிறிலங்கா அரசாங்க வட்டாரங்களை மேற்கொள்காட்டி கொழும்பு ஆங்கில வாரஇதழ் ஒன்று செய்தி வெளியிட்டுள்ளது.

சிறிலங்காவில் இனப்பதற்ற நிலை தீவிரமடைந்ததை அடுத்து, கடந்தவாரம், சமூக வலைத்தளங்களை முடக்கிய  அரசாங்கம், இந்த தற்காலிக தடை 72 மணித்தியாலங்கள் வரை நீடிக்கும் என்று கூறியிருந்தது. எனினும், இந்த தடை மேலும் நீடிக்கப்பட்டு வருகிறது.

இதுகுறித்து கருத்து வெளியிட்டுள்ள சிறிலங்கா அதிபரின் செயலரும், தொலைத்தொடர்பு ஒழுங்குபடுத்தல் ஆணையத்தின் தலைவருமான ஒஸ்ரின் பெர்னான்டோ, சமூக வலைத்தளங்கள் மீதான தடை எப்போது நீக்கப்படும் என்று தன்னால் இப்போது கூற முடியாது என்றும், அது நிலைமைகளைப் பொறுத்த விடயம் என்றும் கூறியுள்ளார்.

அதேவேளை, அவசர காலச்சட்டத்தின் கீழேயே, சமூக வலைத்தளங்கள் மீதும் கட்டுப்பாடுகள் விதிக்கப்பட்டுள்ளதாகவும், எனவே அவசரகாலச்சட்டம் நீக்கப்படும் வரையில் இது தொடரும் வாய்ப்புகள் இருப்பதாகவும், மூத்த சட்டத்துறை அதிகாரிகள் தெரிவித்துள்ளனர்.

சிறிலங்கா நாடாளுமன்றத்தில் அவசரகாலச்சட்டத்தை 14 நாட்கள் நடைமுறைப்படுத்த அனுமதி வழங்கப்பட்டுள்ளமை குறிப்பிடத்தக்கது.

சிறிலங்கா அரசியலில் தமது குடும்பத்தின் ஆதிக்கத்தை நிலைநிறுத்துவது தொடர்பாக, ராஜபக்ச குடும்பத்தைச் சேர்ந்த அரசியல்வாதிகள், முக்கிய கலந்துரையாடல் ஒன்றை நடத்தியிரு்ப்பதாக, கொழும்பு ஊடகம் ஒன்று தகவல் வெளியிட்டுள்ளது.

இந்தக் கலந்துரையாடலில் முக்கியமாக, 2020 அதிபர் தேர்தலில், முன்னாள் பாதுகாப்புச் செயலர் கோத்தாபய ராஜபக்சவை போட்டியில் நிறுத்துவது தொடர்பாக விரிவாக ஆலோசனை நடத்தப்பட்டுள்ளதாக கூறப்படுகிறது.

அத்துடன், தேர்தல் நடவடிக்கைகளுக்குப் பொறுப்பாக, முன்னாள் அமைச்சர் பசில் ராஜபக்சவை நியமிப்பது என்றும் முடிவு செய்யப்பட்டுள்ளதாகவும் தகவல்கள் தெரிவிக்கின்றன.

இந்தக் கலந்துரையாடலில் ராஜபக்ச குடும்பத்தைச் சேர்ந்தவர்கள பங்கேற்றனர் என்றும்  தெரிவிக்கப்படுகிறது.

அடிமேல் அடி விழுந்தால் அம்மியும் நகரும் என்பது போல, இலங்கையில் உள்ள சிங்கள தலைமை மீது, லண்டன் தமிழர்கள் தொடர் தாக்குதலில் ஈடுபட்டு வருகிறார்கள்.

நேற்று முன் தினம் இந்திக்க பெனாண்டோ இலங்கை சென்றுள்ள நிலையில். அவரது குடும்பம் லண்டனில் தங்கியுள்ளது.

இதனை அறிந்த தமிழ் அமைப்புகள், லண்டனுக்கு அவரது விசாவில் (டிப்பெண்டனாக) வந்த அவரது மனைவி பிள்ளைகளை உடனடியாக நாட்டை விட்டு வெளியேற்ற வேண்டும் என்று புதுக் கோரிக்கை ஒன்றை முன் வைத்துள்ளார்கள்.

பிரித்தானிய வெளியுளவு துறை அமைச்சர், உள் துறை அமைச்சர் என்று பல அமைச்சர்களுக்கு தமிழர் தரப்பில் இருந்து கடிதங்கள் அனுப்பப்பட்டுள்ளது. இதனை தொடர்ந்து பிரியங்க பெனாண்டோவின் குடும்பத்தார் அனைவரது விசாவும் ரத்துச் செய்யப்பட்டு , அவர்களையும் நாட்டை விட்டு திருப்பி அனுப்ப, பிரித்தானியா உடனடி நடவடிக்கையில் இறங்கவுள்ளது என மேலும் அறிகிறது.

பிரித்தானியா , அமெரிக்கா , கனடா போன்ற பல வெளி நாடுகளுக்கு இந்திக்க பெனாணோ செல்லாமல் இருக்க உலகில் உள்ள பல நாட்டு தமிழர்கள் தமது நாட்டில் உள்ள தூதரங்களுக்கு அறிவித்து வருகிறார்கள்.

உலகில் பல நாடுகளில் வாழும் தமிழர்கள் லண்டன் தமிழர்களோடு கை கோர்த்து நிற்பது. உலகத் தமிழர்களின் ஒற்றுமையை சிங்கள அரசுக்கு உணர்த்தியுள்ளது.

2009க்கு பின்னர் உலகத் தமிழர்கள் மத்தியில் பல பிரச்சனைகளை ஏற்படுத்தி, பிரித்துவிட்டதாகவும். உடைத்து விட்டதாகவும் சிங்களம் நினைத்து பெருமையடைந்தது. ஆனால் அது இறுதிவரை நடக்கவே இல்லை…

2015 அதிபர் தேர்தலின் போது, பெற்றுக் கொண்ட மக்களின் ஆணையை நிறைவேற்றுமாறு சிறிலங்கா அதிபர் மைத்திரிபால சிறிசேனவிடம், எதிர்க்கட்சித் தலைவரும், தமிழ்த் தேசியக் கூட்டமைப்பின் தலைவருமான இரா.சம்பந்தன் வலியுறுத்தியுள்ளார்.

கொழும்பு அரசியலில் ஏற்பட்டுள்ள குழப்பங்களை அடுத்து,  நேற்றுமுன்தினம் மாலை சிறிலங்கா அதிபர் மைத்திரிபால சிறிசேனவை இரா.சம்பந்தன் சந்தித்துப் பேச்சு நடத்தினார்.

இதன்போதே அவர், 2015 அதிபர் தேர்தலின் போது, மக்களுக்கு வழங்கிய வாக்குறுதிகளை நிறைவேற்றுமாறு கோரியுள்ளார்.

இந்தச் சந்திப்புக் குறித்து, எதிர்க்கட்சித் தலைவர் செயலகத்தின் பேச்சாளர் ஒருவர் கருத்து வெளியிடுகையில்,

“2020 வரை, தற்போதைய கூட்டு அரசாங்கம் தொடர வேண்டும் என்பதே எதிர்க்கட்சித் தலைவரின் கருத்தாக இருந்தது.

எனினும், கடந்த அதிபர் தேர்தலில் மக்கள் வழங்கிய ஆணையை சிறிலங்கா அதிபருக்கு அவர் நினைவுபடுத்தினார்.

புதிய அரசாங்கம் பதவியேற்றாலும் கூட சிறிலங்கா அதிபர் தனது பதவிக்காலத்தில், மக்களின் ஆணையை நிறைவேற்ற வேண்டும் என்றும் சுட்டிக்காட்டியுள்ளார்.” என்று கூறினார்.

மைத்திரிபால சிறிசேன பொலன்னறுவவுக்குப் புறப்பட முன்னர், அதிபரின் வதிவிடத்தில் இந்தச் சந்திப்பு இடம்பெற்றது.

நடிகர் கமல்ஹாசன் தனது கட்சியின் பெயரை வரும் 15-ம் தேதியன்று தேர்தல் ஆணையத்தில் பதிவு செய்ய நேரம் கேட்டுள்ளார்.

முன்னாள் முதல்வர் ஜெயலலிதாவின் மறைவிற்கு பின்னர் நடிகர் கமல்ஹாசனும், ரஜினியும் அரசியலுக்கு வரப்போவதாகவும், விரைவில் கட்சியின் பெயரை அறிவிக்க போவதாகவும் தெரிவித்துள்ளனர். அதன்படி ட்விட்டரில் தொடர்ச்சியாக கருத்துக்களை தெரிவித்து வந்த கமல், பிப்ரவரி 21-ம் தேதி அப்துல் கலாம் இல்லத்திலிருந்து தன்னுடைய அரசியல் பயணத்தை ஆரம்பித்து, அன்றே தன்னுடைய கட்சியின் பெயரையும் அறிவிக்க உள்ளார். மேலும் பயணத்தின் முதல்கட்ட நிறைவாக முன்னாள் முதல்வர் ஜெயலலிதாவின் பிறந்தநாளான பிப்ரவரி 24 அன்று, மதுரையில் மாபெரும் பொதுக்கூட்டம் நடைபெறும் எனவும் தெரிவித்திருந்தார்.

இந்நிலையில் நடிகர் கமல்ஹாசன், தனது கட்சியின் பெயரை வரும் 15-ம் தேதியன்று தேர்தல் ஆணையத்தில் பதிவு செய்ய நேரம் கேட்டுள்ளதாக செய்திகள் வெளியாகியுள்ளன. முன்னதாக நடிகர் கமல், திமுக தலைவர் கருணாநிதியை நேரில் சந்தித்து ஆசி பெற கோபாலபுரத்தில் தேதி கேட்டிருப்பதாக செய்திகள் வெளியாகியிருந்தது குறிப்பிடத்தக்கது.

பிரான்ஸ் – பரிஸ் நகரில் இலங்கை தமிழர் ஒருவர் கொடூரமான முறையில் படுகொலை செய்யப்பட்டுள்ளதாக அந்நாட்டு பொலிஸார் தெரிவித்துள்ளனர்.

25 வயது மதிக்கத்தக்க இளைஞர் ஒருவரே உடலின் பல பாகங்கள் வெட்டப்பட்ட நிலையில் சடலமாக மீட்கப்பட்டுள்ளதாக அந்நாட்டு பொலிஸார் தெரிவித்துள்ளனர்.

பரிஸ் – 14 Montparnasse பகுதியில் அமைந்துள்ள உணவகம் ஒன்றில் பணியாற்றி வந்த குறித்த இளைஞர், உணகவத்தின் நிலகீழ் அறையிலிருந்து சடலமாக மீட்கப்பட்டுள்ளார்.

நேற்று காலை பணிக்காக உணவகத்திற்கு வந்த சக ஊழியல் ஒருவர் வழங்கிய தகவலுக்கு அமைய பொலிஸார் சடலத்தை மீட்டுள்ளனர்.

குறித்த உணவகத்தில் மோதல் ஏற்பட்டமைக்கான அறிகுறிகள் காணப்படுவதாக பொலிஸார் தெரிவித்துள்ளனர்.

தொடர்ந்து விசாரணைகளை மேற்கொண்ட பொலிஸார், குறித்த இளைஞரை கொலை செய்தது அதே உணவகத்தில் பணிப்புரியும் 34 வயதுடைய நபர் என்பதை உறுதி செய்துள்ளனர்.

இந்நிலையில், சந்தேகநபரை கைது செய்ய முற்பட்ட போது அவரும் தற்கொலை செய்துகொண்டுள்ளதாக தெரிவிக்கப்படுகின்றது.

கொலை மற்றும் தற்கொலை செய்துக்கொண்டமைக்கான காரணம் தெரிவிக்கப்படவில்லை. சம்பவம் தொடர்பில் அந்நாட்டு பொலிஸார் தீவிர விசாரணைகளை மேற்கொண்டு வருகின்றனர்.

முன்னாள் ஜனாதிபதி மகிந்த ராஜபக்ச குற்றவாளியாக இணங்காணப்பட்டால் ஏழு ஆண்டுகளுக்கு குடியுரிமை இல்லாது போகும் என அமைச்சர் மகிந்த சமரசிங்க தெரிவித்துள்ளார்.

எனினும், இதனை அறிந்துகொள்ளாது நாடாளுமன்ற உறுப்பினர் உதய கம்மன்பில கருத்து வெளியிட்டு வருவதாகவும் அவர் கூறியுள்ளார்.

ஸ்ரீ லங்கா சுதந்திர கட்சியின் தலைமையகத்தில் இன்று நடைபெற்ற செய்தியாளர் சந்திப்பில் கலந்துகொண்டு கருத்து தெரிவித்த அமைச்சர் இதனை குறிப்பிட்டுள்ளார்.

தொடர்ந்தும் பேசிய அவர், “ஏழு ஆண்டுகளுக்கு குடியுரிமையை இரத்து செய்வது மட்டுமல்ல. இவ்வாறான நபர்கள் எந்தவொரு சந்தர்ப்பத்திலும் வாக்கு கேட்கவும் முடியாது.

அத்துடன், நாடாளுமன்ற உறுப்புரிமையை வகிக்க தகுதி இல்லை என நாடாளுமன்றத்தில் சட்டம் ஏற்படுத்தப்பட வேண்டும். உண்மையாக இது ஆணைக்குழுவின் வலுவான பரிந்துரையாகும்.

இதேவேளை, ஒன்றிணைந்து அரசாங்கம் ஒன்றை ஏற்படுத்த ஜனாதிபதி அழைப்பு விடுத்துள்ளார். எனினும், சுதந்திர கட்சியில் இருந்து விலகி சென்றவர்கள் அதனை ஏற்றுக் கொள்ள மறுத்துள்ளனர்.

ஊழல்கள் மோசடிகளுக்கு ஜனாதிபதி எடுத்து வரும் கடுமையான நடவடிக்கைகள் காரணமாகவே அவர்கள் மறுப்பு வெளியிட்டு வருகின்றனர் என அமைச்சர் மகிந்த சமரசிங்க மேலும் தெரிவித்துள்ளார்.

உள்ளூராட்சிமன்ற தேர்தல் எதிர்வரும் பெப்ரவரி மாதம் நடைபெறவுள்ள நிலையில், 32 அபேட்சகர்களுடன் 483 பேர் இதுவரையில் கைது செய்யப்பட்டுள்ளதாக பொலிஸ் ஊடக பிரிவு தெரிவிக்கின்றது.

இது குறித்து மேலும் தெரியவருவதாவது,

உள்ளூராட்சி மன்ற தேர்தல் எதிர்வரும் பெப்ரவரி மாதம் 10 ஆம் திகதி நடைபெறவுள்ள நிலையில் 32 அபேட்சகர்களுடன்  483 பேர் கைதுசெய்யப்பட்டுள்ளதாக தெரியவருகின்றது. 

இதன்படி 116 தேர்தல் வன்முறை பதிவாகிய வேளையில் தேர்தல் வன்முறையில் ஈடுபட்டுக்கொண்டிருந்த களத்தில் பொலிஸாரால் கைது செய்யப்பட்டவர்கள் 222 பேர் அதில் 20 பேர் தேர்தல் அபேட்சகர்களாவர். 

அதனுடன் தேர்தல் வன்முறை முறைப்பாடுகள் 260 பதவாகியுள்ள நிலையில் 261 பேர் கைது செய்யப்பட்டுள்ளனர். அதில் 12 அபேட்சகர்களும் உள்ளடங்குகின்றனர்.

இந்த தேர்தல்கால வன்முறைகளில் பாரியளவில் கட்டுப்படுத்த நடவடிக்கை எடுக்கப்பட்டுள்ள நிலையில் இக்காலத்தில் பொது மக்களுக்கு இடையூறாக பேரணிகள், போராட்டங்கள் மற்றும் ஒலிபெருக்கி பயன்பாடு என்பவை முற்றாக தடைசெய்யப்பட்டுள்ளது. 

நாடளாவிய ரீதியில் தேர்தல் குறித்து அனைத்து தரப்பினருக்கும் பொலிஸாரால் அறிவுறுத்தப்பட்டுள்ளதுடன் பொலிஸ் பாதுகாப்பும் பலப்படுத்தப்பட்டுள்ளதாகவும் பொலிஸ் ஊடகம் தெரிவித்துள்ளது. 

வட பகுதி கடற்பரப்பில் பெருந்தொகை தங்கம் மீட்கப்பட்டுள்ளதாக கடற்படையினர் தெரிவித்துள்ளனர்.

யாழ். காங்கேசன்துறை கடற்பரப்பில், மீன்பிடிப் படகொன்றில் நங்கூரத்திற்கு அருகில் மறைத்து வைக்கப்பட்டிருந்தநிலையில் குறித்த தங்கம் மீட்கப்பட்டுள்ளது.

வட கடல் ஊடாக இந்தியாவிற்கு தங்கம் கடத்தப்படுவதாக காங்கேசன்துறைகடற்படையினருக்கு கிடைத்த இரகசிய தகவலுக்கு அமைய நேற்று இரவு மேற்கொள்ளப்பட்ட தேடுதல் நடவடிக்கையில் இந்த தங்கம் கைப்பற்றப்பட்டுள்ளது.

கைப்பற்றப்பட்ட தங்கம் சுமார் 7 கிலோகிராம் என கடற்படையினர் குறிப்பிட்டுள்ளனர்.

தங்கத்துடன் வடமராட்சியை சேர்ந்த இரண்டு நபர்களும் கைது செய்யப்பட்டுள்ளதாக பொலிஸார் தெரிவித்துள்ளனர்.

குறித்த தங்கத்தின் பெறுமதி 5 கோடி ரூபாய் என மதிப்பிடப்பட்டுள்ளதாக கடற்படையினர் தெரிவித்துள்ளனர்.

கைப்பற்றப்பட்ட தங்கம் இன்று யாழ். தெல்லிப்பழையிலுள்ள சுங்கப்பிரிவினரிடம் கையளிக்கப்படுவதுடன் சந்தேகநபர்களையும் நீதிமன்ற நடவடிக்கைக்கு உட்படுத்துவதாக கடற்படையினர் தெரிவித்தனர்.

யாழ்ப்பாணத்தில் 2017ஆம் ஆண்டு குழந்தைகள் பிறப்பு வீதம் அதிகரித்துள்ளதாக யாழ்.போதனா மருத்துவமனை வட்டாரங்கள் தெரிவித்துள்ளன.

2017ஆம் ஆண்டு யாழ்.போதனா மருத்துவமனையில் 5,746 குழந்தைகள் பிறந்துள்ளன.   இது 2016ஆம் ஆண்டில் பிறந்த குழந்தைகளின் எண்ணிக்கையுடன் ஒப்பிடுகையில், 12 வீதம் அதிகமாகும்.

அதேவேளை, 2017ஆம் ஆண்டில் சிசு மரண வீதமும் குறைவடைந்துள்ளதாக மருத்துவமனை வட்டாரங்கள் தெரிவித்துள்ளன.

மருத்துவ வசதிகள் அதிகரிப்பு, கடந்த சில ஆண்டுகளில் மருத்துவமனைப் பணியாளர்களின் சேவையின் தரத்தில் ஏற்பட்டுள்ள கணிசமான முன்னேற்றங்கள் என்பனவற்றினால், சிசு மரணவீதம் கணிசமாக குறைந்துள்ளதாக கூறப்படுகிறது.

யாழ். போதனா மருத்துவமனையில் மருத்துவர்கள் உள்ளிட்ட 1700 பேர் பணியாற்றுகின்றனர். இங்கு நாளாந்தம், 900 தொடக்கம் 1600 வரையான நோயாளர்கள் வருகின்றனர் என்பது குறிப்பிடத்தக்கது.

மகிந்த ராஜபக்ச ஆட்சிக்காலத்தில் இடம்பெற்ற ஊழல்கள், மோசடிகள் போன்ற மோசமான செயல்கள் குறித்து விசாரிக்க நியமிக்கப்பட்ட அதிபர் ஆணைக்குழுவின் இறுதி அறிக்கை இன்று சிறிலங்கா அதிபர் மைத்திரிபால சிறிசேனவிடம் கையளிக்கப்படவுள்ளது.

பல்வேறு ஊழல், மோசடிகள் தொடர்பாக நடத்தப்பட்ட விசாரணைகள் குறித்த 1000 பக்கங்களைக் கொண்ட இந்த அறிக்கையில், எதிர்காலத்தில் எவ்வாறு இத்தகைய மோசடிகளைத் தடுப்பது மற்றும் பெரியளவிலான ஊழல் மோசடிகளை எவ்வாறு கையாள்வது என்பது குறித்த பரிந்துரைகளும் உள்ளடக்கப்பட்டுள்ளன.

ஆணைக்குழுவின் தலைவரான மேல்முறையீட்டு நீதிமன்ற நீதிபதி பத்மன் சூரசேன  இந்த அறிக்கையை இன்று சிறிலங்கா அதிபரிடம் கையளிப்பார்.

இந்த ஆணைக்குழு மகிந்த ராஜபக்ச ஆட்சிக்காலத்தில் இடம்பெற்ற 34 பிரதான ஊழல், மோசடிகள் குறித்து விசாரணைகளை நடத்தியிருந்தது.

"நத்தார் தின ஒளியானது நம்பிக்கை இழந்து வாழும் எமது மக்களின் மனங்களில் நம்பிக்கையையும் சமாதானத்தையும் மீள் உயிர்ப்பிக்கிறதாக அமைய வேண்டும்". இவ்வாறு எதிர்க்கட்சித்தலைவர் இரா.சம்பந்தன் விடுத்துள்ள நத்தார் வாழ்த்துச் செய்தியில் தெரிவித்துள்ளார்.

அதில் அவர் மேலும் கூறியுள்ளதாவது,

கிறிஸ்து நாதரின் பிறப்பினை கொண்டாடும் அனைத்து கிறிஸ்தவர்களுக்கும் எனது மனங்கனிந்த நத்தார் தின வாழ்த்துக்கள். சுமார் இரண்டாயிரம் வருடங்களுக்கு முன் நிகழ்ந்த கிறிஸ்து நாதரின் பிறப்பானது மக்களுக்கு சமாதானத்தையும் நம்பிக்கையையும் கொண்டு வந்தது.

நத்தார் பண்டிகையின் நிகழ்வுகளானது கிறிஸ்து நாதர் வெளிக்காட்டிய தாழ்மை,அன்பு,பிறரை நேசித்தல், மற்றும் தியாகம் போன்ற பண்புகளை எமக்கு மீள ஞாபகமூட்டி நிற்கின்றன. மேலும் அன்பு, மனதுருக்கம், பிறரை நேசித்தல், உண்மை ,சமத்துவம் மற்றும் சமூக நீதி போன்றவை தொடர்பில் கிறிஸ்து நாதரின் போதனைகளானது இன்றும் எமது சமூகங்களுக்கு தொடர்புடையதாக இருப்பதுமன்றி எப்போதும் அவை தொடர்புடையதாகவே காணப்படும். நத்தார் தின ஒளியானது நம்பிக்கை இழந்து வாழும் எமது மக்களின் மனங்களில் நம்பிக்கையையும் சமாதானத்தையும் மீள் உயிர்ப்பிக்கிறதாக அமைய வேண்டுமென பிரார்த்திப்பதோடு, இந்த நத்தார் பண்டிகை காலங்களை வசதியற்று இயலாமையில் உள்ள எம் சக மக்கள் மீதான எமது கரிசனையை வெளிக்காட்டும் காலங்களாக அனுஷ்டிக்குமாறும் வேண்டிக்கொள்கிறேன். இனிய நத்தார் தின வாழ்த்துக்கள்-, இவ்வாறு, எதிர்க்கட்சி தலைவர் இரா. சம்பந்தன் விடுத்துள்ள நத்தார் வாழ்த்துச் செய்தியில் தெரிவித்துள்ளார்.